2 Samuel 3:1-39
3 Saúlpa soldädunkunawan Davidpa soldädunkuna atska watami guërracho karqan. Tsayno pelyar Davidpa soldädunkuna vinciptinmi Saúlpa soldädunkunaqa walkayaykarqanna.
Hebrón markacho Davidpa tsurinkuna yurishqan
1 Crónicas 3.1-4
2 Hebrón markacho kaykaptinmi Davidpa wakin tsurinkuna yurirqan:Qechpa tsurinpa jutinmi karqan Amnón. Payqa Jezreelpita kaq Ahinoampa wawanmi karqan.
3 Amnónpa qepanman yuriq tsurinpa jutinmi karqan Quileab. Quileabqa karqan Carmel markacho taq Nabalpa viüdan Abigailpa wawanmi.Quileabpa qepanman yuriq tsurinpa jutinmi karqan Absalón. Absalónqa karqan Maacapa wawanmi. Maacaqa karqan Gesur markapa mandaqnin rey Talmaipa tsurinmi.
4 Absalónpa qepanman yuriq tsurinpa jutinmi karqan Adonías. Adoníasqa karqan Haguitpa wawanmi.Adoníaspa qepanman yuriq tsurinpa jutinmi karqan Sefatías. Sefatíasqa karqan Abitalpa wawanmi.
5 Sefatíaspa qepanman yuriq tsurinpa jutinmi karqan Itream. Itreamqa karqan Eglapa wawanmi.
Hebróncho David taykaptinmi tsay tsurinkuna yurirqan.
Davidwan Abner amistashqan
6 Davidpa soldädunkunawan pelyananpaq Saúlpa soldädunkunata pushararmi Abner mas munayniyuq rikakurqan.
7 Saúlpa *concubïna warminmi karqan Ajapa tsurin Rizpa. Juk junaqmi Abnerta qayaykatsir Is-boset kayno nirqan: “¡Imanirtaq papänïpa concubïnanwan punushqanki!”
8 Tsayno niptinmi Abner pasaypa rabyashqa kayno nirqan: “¡Acäsu noqaqa Judá runakunapa täpakuq alqun imatsu kaykä tsayno nimänaykipaq! Noqaqa imaypis papäniki Saúlta respitashpämi lapaykita yanapashqä. Tsaymi mana munashqätsu Davidpa munaynincho kanaykitapis. ¿Tsayno yanapaykaptïku kananqa nimanki tsay warmiwan punushqäta?
9 Kananpitaqa manami yanapashaykinatsu. Tsaypa trukanqa Davidtanami yanapashaq. TAYTA DIOS fiyupa castigamätsun Davidta promitishqankunata lapanta chaskinanpaq mana yanapaptïqa.
10 Rey kanaykipa trukanqa Davidnami lapan Israel runakunapa y Judá runakunapa mandaqnin rey kanqa. Paymi Dan markapita Beerseba markayaq mandanqa”.*
11 Tsayno niptinmi Abnerta mantsakushpan Is-bosetqa imatapis mana nirqantsu.
12 Tsawraqa wilakuqkunata Hebrónman Abner kacharqan Davidta kayno ninanpaq: “Qampa munaynikichömi kay nación kaykan. Tsayno kaykaptinqa *pactuta rurashun wakin Israel runakunatapis munaynikiman churamunäpaq”.
13 Tsayno niptinmi David kayno nirqan: “Alimi kanman qamwan pactuta ruraptintsi. Itsanqa pactuta ruranantsipaq pushamunki Saúlpa warmi tsurin Micalta. Payta mana pushamushpaykiqa ama chayamunkitsu”.
14 Nirkurmi Saúlpa tsurin Is-bosetman propiukunata David kacharqan kayno ninanpaq: “Warmï Micalta kutitsipaykamay, tayta. Paywan tänäpaq pachak (100) filisteo runakunata wanurkatsir chiwlakunanpa jana qaranta kutsurirmi taytayki Saúlman apaparqä”.*
15 Tsawraqa runan Paltielwan taykaptin Micalta Is-boset rakitsimurqan. Paltielmi karqan Laispa tsurin.
16 Micalta rakirkur Abner pushakuptinmi runan Paltiel waqaraykar qepanta aywarqan hasta Bahurim markayaq. Tsaypitanami wayinpa kutikunanpaq Abner niptin kutikurqan.
17 Nirkurnami Israel mayor runakunata Abner kayno nirqan: “Nawpapita patsanami munashqanki David mandamaqnintsi rey kananta.
18 Kananqa rey kananpaq payta churashun. TAYTA DIOSPIS kaynömi nirqan: ‘Sirvimaqnï Davidtami yanapashaq Israel runakunata filisteo runakunapa munayninpita jorqunanpaq. Paymi Israel runakunata lapan contrankunapa munayninpita jorqunqa’ ”.
19 Tsaynölami Benjamín trïbu runakunawanpis Abner parlarqan. Nirkurna Hebrónman aywaykur Davidta wilarqan kayno nir: “Israel autoridäkuna y Benjamín autoridäkunapis lapanmi munarkaykan rey kanaykita”.
20 Tsayno niptinmi David kushikushpan Abnerpaq y pushashqan ishkay chunka (20) soldädukunapaq atska mikuyta yanukatsirqan.
21 Tsaypitanami Abner kayno nirqan Davidta: “Kananqa aywashaq Israel runakunata shuntamunäpaq. Juntakarkurmi rey kanaykipaq qamwan pactuta ruranqa. Tsaymi yarpashqaykino mandankipaq”.
Nirkurnami Abnerqa David despachaptin jawkala aywakurqan.
Abnerta Joab wanutsishqan
22 Davidwan parlashqanpita Abner yarquriptilannami Davidpa soldädunkunawan Joab chayarqan guërracho qechumushqankunata atska qepinkuna aparishqa.
23 Soldädunkunawan Joab chayaptinmi wilapäkurqan Nerpa tsurin Abner Davidman chayashqanta y jawkala kutikunanpaq David despachashqanta.
24 Tsayno wilaptinmi rey Davidman aywaykur Joab kayno nirqan: “¡Imatataq rurashqanki, tayta! ¡Imanirtaq aywakunanpaq Abnerta kacharishqanki!
25 ¿Manaku tantiyakunki Nerpa tsurin Abner lulapäshunalaykipaq shamushqanta? Payqa imata rurashqaykitapis rikapakuq y musyapakuqmi shamushqa”.
26 Tsayno nir David kaqpita yarqurirmi runakunata Joab kacharqan Davidta mana musyatsiylapa Abnerta kutitsimunanpaq. Tsaymi Sira nishqan pözupita patsa Abnerta kutitsimurqan.
27 Hebrón markaman Abnerta chayaykatsiptinmi pakaylapa parlananpaq marka yaykunaman Joab pusharqan. Tsaychömi wawqin Asaelta wanutsishqanpita kikintapis pachanpa tuksirirqan wanuqpaq.
28 Wanutsishqanta wilaptinmi David kayno nirqan: “TAYTA DIOS musyanmi Nerpa tsurin Abnerta mana wanutsishqäta ni payta wanutsinanpaq pitapis mana minkakushqäta.
29 Abnerta wanutsishqanpita Joabmi jutsayuq kaykan. Tsayno rurashqanpita lapan aylunkuna y aylunkunapita miraqkuna imayyaqpis yawarta chiwlar o *leprawan karpis nakapäkutsun. Tsaynöpis weqru kar tukrulawan puritsun, espädawan wanutsishqa katsun y imaypis muchuylacho katsun”.
30 Tsaynömi wawqin Abisaiwan Joab Abnerta wanutsirqan wawqin Asaelta Gabaóncho pelyar wanutsishqanpita.
31 Tsaypitana Joabta y paywan kaykaq runakunata David kayno nirqan: “Abner wanushqanpita lakikushpayki röpaykita rachirir qachqa röpata jatikäriy”.
Nirkur pampaq apaptin rey Davidpis aywarqan.
32 Tsaychömi David lapan runakunawan Abnerpaq qaparayparaq waqapäkurqan. Tsaynömi Hebróncho Abnerta pampapäkurqan.
33 Tsawraqa Abnerpaq lakikushpan rey David kayno nir cantarqan:“¡Ay Abner! ¡Imanirtaq upa runatano wanutsishushqanki!
34 Wanutsishunaykipaqqa makikipis manami watarashqatsu.Chakikipis manami manyarashqatsu.Qamtaqa jutsasapa runakunami wanutsishushqanki”.
Abnerpaq David tsayno cantaptinmi runakuna masraq waqapäkurqan.
35 Nirkurnami Davidta runakuna ruwarqan patsa manaraq tsakaptin imalatapis mikunanpaq. Tsayno ruwaptinpis kaynömi nirqan: “Patsa manaraq tsakaptin tantata o imalatapis mikuptïqa Tayta Dios pasaypa castigamätsun”.
36 Abnerta David kuyashqanta tantiyarmi lapan runakuna kushikurqan. David rurashqankunaqa lapanpis paykunapaq alimi karqan.
37 Tsay junaq Israel runakuna tantiyakurqan Nerpa tsurin Abner wanushqanpita rey David jutsaynaq kashqanta.
38 Nirkurmi yanapaqninkunata David kayno nirqan: “Kanan junaq Israel nacioncho ali runami wanushqa.
39 Itsanqa rey kaykarpis Sarviapa wawankuna Joabta y Abisaita manami ima ruraytapis kamäpakütsu. Paykunataqa lutanta rurashqanman tupu TAYTA DIOS castigatsun”.
Ichic wilacuycuna
^ concubïna Concubïnaqa manami runapa legïtimu warmintsu karqan. Concubïnanwanqa manami pakaylapatsu purikurqan, sinöqa warminwannömi tarqan (Jue. 8.31; 19.1-4; 2Sam. 5.13; 15.16; 16.21-22; 20.3; Est. 2.9).
^ 3.10 1Sam. 15.28.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 3.14 1Sam. 18.27.
^ lepra Lepra qeshyaqa runapa qarancho tukuy casta qerikunami karqan. Israel nacioncho lepra qeshyawan qeshyaykaqkunaqa markapita juk läduchömi täkäriq (Lev. 13.45-46). Paykunataqa runakuna manami yataylapis yataqtsu (Lev. 22.5). Tsayno kaptinpis Jesucristo munayniyuq karmi leprawan qeshyaykaqkunata yataykur aliyätsirqan (Mar. 1.40-43).
