2 Samuel 4:1-12
4 Hebróncho Abner wanushqanta mayaykurmi Is-boset ima ruraytapis mana kamäpakurqantsu. Tsaynölami lapan Israel runakunapis pasaypa mantsakarqan.
2 Is-bosetmi asaltantikunata imaypis kachaq runakunata asaltananpaq. Tsay asaltantikunapa cabecïllankunami karqan Baana y Recab. Paykunaqa karqan Beerot markacho taq Rimónpa tsurinkunami. Beerot markaqa Benjamín trïbu runakuna tashqanchömi kaykan.
3 Benjamín trïbu runakuna manaraq tsaycho taptinmi tsaycho taq cananeo runakuna qeshpir aywakärirqan Gitaim markaman. Tsaychömi tsay runakuna kananyaq tarkaykan.
4 Saúlpa tsurin Jonatánpami juk tsurin karqan Mefi-boset. Mefi-boset pitsqa watayuq kaykaptinmi taytan Jonatánta y awkilun Saúlta Jezreel markacho filisteo runakuna wanutsipäkurqan. Tsayta mayaykurmi ashmaqnin warmi Mefi-bosetta aparikurkur qeshpiykätsiptin wamra tunikurqan chakin moqaqpaq. Tsay junaqpitanami ishkan chakin weqruyarqan.*
5 Juk junaqmi Rimónpa tsurinkuna Recab y Baana aywapäkurqan Saúlpa tsurin Is-bosetpa wayinman. Chayananpaqqa pasaypa shanaptinmi cämancho Is-boset punukashqa kaykänaq.
6 Wayi punku täpaq warmipis trïguta wayraykashqancho punukashqa kaykänaq. Tsaymi Recab y wawqin Baana wayi rurinman yaykuykur
7 cämancho punuraykaptin Is-bosetta wanutsipäkurqan. Nirkurmi umanta roqurishpan apakurkur *Arabá pampapa aywaq nänipa tsay tsakay waraylata aywapäkurqan.
8 Hebrónman chayaykur rey Davidman aparmi kayno nipäkurqan: “Kay umaqa contrayki Saúlpa tsurin Is-bosetpa umanmi kaykan, tayta. Qamta wanutsiyta munashushqaykipitami kananqa Saúltapis y tsurinkunatapis TAYTA DIOS ushakätsishqa”.
9 Tsayno niptinmi David kayno nirqan: “Lapan conträkunapita salvamaq TAYTA DIOS mayaykaptinmi qamkunata kayno nï:
10 Kushikunäpaq kashqanta yarparmi Saúl wanushqanta juk runa wilamarqan. Jina kaqtami tsariykur kikinta Siclag markacho wanutsirqä.*
11 Payta wanutsishqänölami qamkunatapis wanutsishayki jutsaynaq runata wayincho punuraykaqta wanutsishqaykipita. Tsaymi kananqa kikikikunatapis ushakätsishayki”.
12 Tsayno nirkushpannami soldädunkunata David nirqan paykunata wanutsinanpaq. Wanurkatsir makinkunata chakinkunata roqurishpanmi Hebróncho kaykaq pözu nawpanman ayankunata warkupäkurqan. Is-bosetpa umantanami Abner pamparashqan nawpanman Hebróncho pamparqan.
Ichic wilacuycuna
^ Arabá Arabáqa jatun pampami kaykan. Galilea qocha sur kaq kuchunpitami qalaykun. Tsaypita sur kaq lädupami Jordán mayu kuchunkunapa Kachi Lamaryaq pasan. Kachi Lamarpitanami Puka Lamarcho kaq Golfo de Acabayaq chayan. Arabápa anchunmi chunka kilömetruno kaykan. Largunnami kimsa pachak ishkay chunka (320) kilömetruno kaykan. Arabápa ishkan lädupa jirkakuna kaptinmi tsaki kaykan. Norti kaq lädu chakrakunatami Jordán mayu yakuwan parqupäkun. Sur kaq lädu chakrakunatami itsanqa yaku mana kaptin mana parqupäkuntsu (Deut. 1.7; 2.8; 3.17; 4.49).
^ 4.10 2Sam. 1.1-16.
