2 Samuel 5:1-25
5 Tsaypitanami lapan trïbu Israel runakuna Hebrón markaman aywaykur Davidta kayno nipäkurqan: “Noqakunaqa yawarniki karmi rey kanaykita munapäkü.
2 Rey Saúl mandaykashqan witsanpis qammi Israel soldädukunata pushararqayki guërracho pelyapäkunanpaq. Tsaynöpis rey kanaykipaqmi TAYTA DIOS kayno nishushqanki: ‘Qamtami akrashqä kuyashqä Israel runakunapa mandaqnin rey kanaykipaq. Tsaymi uysha mitsiqno Israel runakunata shumaq rikankipaq’ ”.
3 Tsayno nipäkuptinmi TAYTA DIOSPA nawpancho Israel mayor runakunawan *pactuta David rurarqan. Tsaychömi umanman aceitita winapäkurqan mandaqnin rey kananpaq.
4 Kimsa chunka (30) watayuq kaykarmi David mandayta qalaykurqan. Payqa Israel nacioncho chusku chunka (40) watami rey karqan.
5 Judá runakunapa mandaqnin rey kar Hebróncho tarqan qanchis wata soqta killa. Tsaypitanami Israel y Judá runakunapa mandaqnin rey kar Jerusaléncho tarqan kimsa chunka kimsa (33) wata.*
Jerusalén markata David shuntashqan
1 Crónicas 11.4-9
6 Tsaypitanami soldädunkunawan rey David aywarqan Jerusaléncho taq jebuseo runakunata* atacananpaq. Tsawraqa jebuseo runakuna kayno nirqan: “Qamkunaqa manami imanöpapis kayman yaykamuyta kamäpakunkipaqtsu. Yaykamuptikiqa qaprakuna y weqrukunalami ichipäshunkipaq”.
7 Tsayno niykaptinpis Davidqa jebuseo runakunata vincirkur *Sión jirkancho kaykaq jiruruypa perqashqa markata tsarikurkurqan. Tsaypita patsami kananyaqpis tsay markata *Davidpa Markan nipäkun.
8 Manaraq yaykurmi soldädunkunata David kayno nirqan: “ ‘Qaprakuna y weqrukunalami ichipäshunki’ nimashqantsi runakunataqa pasaypami chikipä. Kananqa paykunata atacanantsipaq markaman yaykuq yaku uchkulapa tsay markaman yaykushun”.
David tsayno nishqanpita patsami pitapis chikir imaypis kayno nipäkun: “Qaprakunapis ni weqrukunapis templuman manami yaykunqatsu”.
9 Jerusalénchöna David tarmi jutinta churaparqan Davidpa Markan nir. Tsaypitami tumariq murallatsirqan Milo patak perqapita hasta palaciuyaq.
10 Lapanta mandaq TAYTA DIOS yanapaptinmi David mas munayniyuq rikakurqan.
Yanapaqninkunata Davidman Hiram kachashqan
1 Crónicas 14.1-2
11 Tsaypitami Tiro markapa mandaqnin rey Hiram Davidman runakunata kacharqan imachöpis yanapanakunanpaq. Tsaynölami carpintërukunata y rumi laqlaqkunata kacharqan Davidpa palaciunta sharkatsinanpaq. Tsaynölami cedru qerukunatapis apatsirqan.
12 Tsawraqa David tantiyakurqan TAYTA DIOS Israel runakunata kuyar rey kananpaq churashqanta.
Davidpa tsurinkuna Jerusaléncho yurishqan
1 Crónicas 3.5-9; 14.3-7
13 Hebrón markapita aywakur Jerusaléncho tarnami warminkuna y *concubïnankuna mas kananpaq David ashirqan. Paykunachömi olqupis warmipis tsurinkuna yurirqan.
14 Jerusaléncho yuriq olqu tsurinkunapa jutinkunami karqan Samúa, Sobab, Natán, Salomón,
15 Ibhar, Elisúa, Nefeg, Jafía,
16 Elisama, Eliada y Elifelet.
Filisteo runakunata David vincishqan
1 Crónicas 14.8-17
17 Israel nacionpa mandaqnin rey David kashqanta mayaykurmi lapan filisteo runakuna wanutsinanpaq ashiq aywapäkurqan. Tsayta mayaykurmi Davidqa pakarashqan kaqman aywarqan.
18 Filisteo runakuna chayaykurmi campamentunta rurapäkurqan Refaim pampacho.
19 Tsaymi TAYTA DIOSTA manakur David kayno nirqan: “¿Aywämanku filisteo runakunata atacanäpaq? ¿Paykunata vincinäpaq yanapamankimanku?”
Tsayno manakuptin TAYTA DIOS kayno nirqan: “Aw, yanapashaykimi”.
20 Tsaymi Davidqa soldädunkunawan Baal-perazimman chayaykur filisteo runakunata vincirqan. Vincirkurmi David kayno nirqan: “Juchu shamur imaykatapis apakushqanno conträkunata vincinäpaqmi TAYTA DIOS yanapamashqa”.
Tsaypitami tsay pampapa jutinta churaparqan Baal-perazim jutin kananpaq.
21 Tsaychömi filisteo runakuna ïdulunkunata kachariykur aywakärirqan. Tsaytanami soldädunkunawan David shuntarkur rupatsipäkurqan.
22 Tsaypita filisteo runakuna yapay Davidta atacananpaq Refaim pampaman kutipäkurqan.
23 Tsaychöpis David yapay tapukuptin TAYTA DIOS kayno nirqan: “Nawpaqpaqa ama yaykapäkuytsu. Tsaypa trukanqa balsamu yörakuna kashqanpa tumashpayki qepanpa aywapäkuy.
24 Tsaycho pakakuykur shuyarpanki. Balsamu yörakuna puntankunapa puriqtano mayar musyanki nawpaykita filisteo runakunata ushakätsinäpaq aywaykashqäta. Tsawraqa jukla yaykapäkunki atacanaykipaq”.
25 Tsaymi TAYTA DIOS mandashqanno rurashpan filisteo runakunata David vincirqan. Gabaón markapita Gezer markayaqmi qati qatiykur wanutsipäkurqan.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 5.4-5 1Rey. 2.11; 1Crón. 3.4; 29.27.
^ 5.6 Jos. 15.63; Jue. 1.21.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ concubïna Concubïnaqa manami runapa legïtimu warmintsu karqan. Concubïnanwanqa manami pakaylapatsu purikurqan, sinöqa warminwannömi tarqan (Jue. 8.31; 19.1-4; 2Sam. 5.13; 15.16; 16.21-22; 20.3; Est. 2.9).
