2 Tesalonicenses 3:1-18
3 Wawqi panikuna, noqakunapaq Tayta Diosta manakuykulay ali wilakuyninta maytsaymanpis chayatsipäkunäpaq. Tsaynöpis manakuykulay qamkunata wilapaptï kushishqa chaskikushqaykinöla wakin runakunapis chaskikärinanpaq.
2 Tsaynöpis Tayta Diosta manakuykulay fiyu runakunapita tsapämänanpaq. Musyapäkushqaykinöpis manami lapan runakunatsu Jesucristuman yärakärin.
3 Tayta Diosmi imaypis yanapaykäshunki payman yärakärinaykipaq y ima jutsamanpis *Satanás mana ishkitsishunaykipaq.
4 Tayta Dios tsayno yanapashuptikimi musyapäkü yachatsishqäta imaypis cäsukärinaykipaq kashqanta.
5 Tayta Dios yanapaykuläshunki pay kuyakuq kashqanno qamkunapis lapan shonquykikunawan kuyakuq kanaykipaq. Tsaynöpis yanapaykuläshunki imano nakarpis Jesucristo kawashqanno kawapäkunaykipaq.
Wawqi panikunata arukunanpaq yätsishqan
6 Wawqi panikuna, Señor Jesucristupa jutinchömi qamkunata kayno nï: Yachatsishqäta mana cäsukuq qela wawqi panikunawanqa ama juntakaytsu.
7 Musyapäkunkimi noqakunata rikakamashqaykino qamkunapis kawanaykipaq kashqanta. Qamkuna kaqcho kar manami imaypis jitarpäkushqätsu.
8 Pipa mikuynintapis dembaldilaqa manami mikushqätsu, sinöqa mana afanakärinaykipaq tsakaypa junaqpami arukärishqä.*
9 Apóstol kar yanapamänaykipaq manakunä kaptinpis manami manakärirqätsu, sinöqa arukärirqä qamkunapis rikakamar arukärinaykipaqmi.
10 Qamkuna kaqcho kashpämi yachatsipäkurqä aruyta mana munaq kaqtaqa pachanta mana qarapäkunaykipaq.
11 Tsayno yachaykätsiptïpis ¿imanirtaq wakin wawqi panikuna arukärinanpa trukanqa runapa asuntunman jatikar purirkaykan?
12 Señor Jesucristupa jutinchömi tsayno kawaq wawqi panikunata kayno nï: Wayin wayin purinaykipa trukanqa mikupäkunaykipaq arukäriy.
13 Wawqi panikuna, mana ajayaypa ali kaqkunalata imaypis rurapäkuy.*
14 Kay cartacho qelqamushqäta mayqanpis mana chaskikuptinqa paywan amana juntakaynatsu. Tsaynöpaqa penqakushpan capazmi tantiyakunmanpis.
15 Itsanqa ama chikipäkuytsu, sinöqa wawqikitano y panikitano shumaq tantiyatsipäkuy.
Carta ushanan
16 Ima pasapäkushuptikipis ali kawayta qomaqnintsi Tayta Dios yanapaykuläshunki ali kawapäkunaykipaq. Tayta Dios qamkunawan imaypis kaykälätsun.
17 Kay cartata nishqänöla juk qelqapämashqa kaptinpis ushanantaqa noqa Pablumi qelqarkamü. Lapan cartata apatsishqäkunachöpis ushanantaqa kikïmi qelqä.
18 Señornintsi Jesucristo kuyapäshushpayki imaypis yanapaykuläshunki. [Amén.]
Ichic wilacuycuna
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 3.8 Hech. 18.3; 1Tes. 2.9.
