2 Timoteo 1:1-18
1 Noqa Pablutami Tayta Dios churamashqa Jesucristupa *apostolnin kanäpaq. Jesucristuta chaskikurmi Tayta Dios promitishqanno *mana ushakaq kawayta tarishqä.
2 Timoteo,* kuyay tsurïno kaptikimi kay cartata apaykätsimü. Papänintsi Tayta Dios y Señornintsi Jesucristo kuyapäshushpayki ali kawanaykipaq yanapaykuläshunki.
Mana penqakuypa wilakunanpaq yätsishqan
3 Unay aylükuna sirvishqan Tayta Diosta sirvirmi tsakaypapis junaqpapis qampaq manakur agradëcikuykä.
4 Waqaykar quëdamushqaykita yarparmi kushikunantsipaq kutimuyta munaykä.
5 Noqa musyämi Tayta Diosman yärakur pay munashqanno kawashqaykita. Tsayno kawaykanki awilayki Loida y mamayki Eunicipis Tayta Diosman yärakur kawashqannömi.
6 Tsayno kawaykarqa mana mantsakuypa Tayta Diosta imaypis sirviy. Makïta umaykiman churaykur qampaq manakushqä hörami sirviqnin kanaykipaq Tayta Dios churashushqanki.
7 Manami jaka shonqu kanantsipaqtsu Tayta Dios churamashqantsi, sinöqa mana mantsakuypa wilakunantsipaq, pïmaytapis kuyanantsipaq y shumaq tantiyakuykur imatapis ruranantsipaqmi.
8 Tsayno kaykaptinqa mana penqakuypa Jesucristupa wilakuyninta wilakuy. Tsaynöpis ama penqakuytsu ali wilakuyninta wilakushqäpita prësu wichqarashqäpitapis. Imano nakarpis ali wilakuyninta wilakuy. Tsayno wilakunaykipaqmi Tayta Dios yanapaykäshunki.
Tayta Dios salvamashqantsita Pablo wilakushqan
9 Tayta Diosmi salvamashpantsi qayamashqantsi pay munashqanno *santu kanantsipaq. Manami imatapis alita rurashqantsipitatsu salvamashqantsi, sinöqa jutsayuq kaptintsipis kuyapämashpantsimi salvamashqantsi. Tsayno kuyapämashqantsi kay patsata manaraq kamar Jesucristuman churamashqantsi karmi.
10 Kuyapämashqantsita musyatsimashqantsi salvamaqnintsi Jesucristuta kay patsaman kachamurmi. Paymi wilakuynincho nishqanno wanuyta vincirkur *mana ushakaq kawayta qomashqantsi.
11 Ali wilakuyninta [mana Israel runakunata] wilapänäpaq Tayta Dios churamashqa kaptinmi *apostolnin kar yachaykätsï.
12 Tsayno wilakushqäpita carcilcho nakarpis Jesucristumanmi yärakuykä. Paymi shuntamänan junaqyaq munayninwan yanapamanqa. Tsaymi carcilcho wichqararpis mana penqakütsu.
13 Timoteo, Jesucristupa wilakuyninta yachatsishqänöla qampis yachatsiy. Jesucristo kuyashushqaykinöla payman yärakur pïmaywanpis kuyanakur kaway.
14 Jesucristupa wilakuyninta pipis lutanta yachatsiptinqa wawqi panikunata tantiyatsiy mana chaskipänanpaq. Tantiyatsinaykipaqqa Espíritu Santumi yanapashunki. Paymi noqantsiwan imaypis kaykan yanapamänantsipaq.
Pabluta Onesíforo ali yanapashqan
15 Musyashqaykinöpis Asia provinciacho taq wawqi panikuna lapanmi japaläta kachariykamar aywakärishqa. Tsaynölami Figeluwan Hermógenespis aywakärishqa.
16 Onesíforuta y aylunkunatapis Señor Jesucristo yanapaykulätsun. Carcilcho prësu kaykaptïpis mana penqakuypami atska kuti yanapamashqa.
17 Tsaynöpis Romaman chaykamur tarimashqanyaqmi ashimarqan.
18 Musyashqaykinöpis Éfeso markacho shumaqmi yanapamashqantsi. Runakunata juzganan junaq Señor Jesucristo payta kuyapaykulätsun.
Ichic wilacuycuna
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ 1.2 Hech. 16.1-3.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
