2 Timoteo 2:1-26
2 Timoteo, kuyay tsurïno kaptikimi qamta kayno nï: Jesucristo yanapaykäshuptikiqa mana ajayaypa pay munashqanno kaway.
2 Runakunapa nawpancho yachatsishqäta yärakuypaq kaq wawqikunata yachatsiy paykunapis wakinkunata yachatsinanpaq.
3 Jesucristupa ali soldädun kaykarqa imano nakarpis pay munashqanno kaway.
4 Manami pï soldädupis soldädu kaykashqanta kachariykur juk ruraykunaman jatikantsu. Tsaypa trukanqa mandaqnin nishqantami ruran.
5 Tsaynölami yalinakuypa cörriqkunapis premiuta chaskinanpaq reglamentu nishqanno cörripäkun. Tsayno mana cörrirqa manami ima premiutapis chaskintsu.
6 Chakra muruq runapis murushqan mikuy wayuptin puntatami yawan.
7 Kay nishqäkunata shumaq yarpachakuptikiqa Señor Jesucristumi yanapashunki shumaq tantiyakunaykipaq.
8 Timoteo, rey Davidpa aylunpita Jesucristo yurishqanta y wanurkurpis kawarimushqanta mana qonqaypa wilakuy. Tsaytami noqapis wilakuykä.
9 Tsayno wilakushqäpitami pasaypa nakaykä. Kananpis runata wanutsiqnömi carcilcho wichqaraykä. Wichqaraptïpis Jesucristupa wilakuynintaqa imapis manami tsapantsu.
10 Tsaymi imano nakarpis mana ajayaypa Jesucristupa wilakuyninta wilakuykä. Tsaynöpami akrashqan kaqkuna Jesucristuta chaskikäriptin Tayta Dios salvanqa gloriacho imayyaqpis kawananpaq.
11 Kay wilakuyqa rasun kaqmi kaykan:Jesucristuwan wanushqana kaykarqa paywanmi kawashunpaq.*
12 Nakayta awantarqa paywanmi mandashunpaq.*Ñëgaptintsiqa paypis ñëgamäshunmi.*
13 Promitishqantsita mana cumpliptintsipis payqa cumplinmi.Payqa promitishqanta manami kutirikuykuntsu.
Dios munashqanno wilakunanpaq yätsishqan
14 Kay nishqäkunata wawqi panikunata imaypis yarpätsiy. Tayta Diospa jutincho tantiyatsiy manakaq yachatsikuykunata mana chaskipänanpaq. Tsaykunata chaskiparqa manami Tayta Dios munashqannötsu kawapäkun. Tsaynöpis wawqi panikunata pasaypami jaqayätsin.
15 Tayta Dios munashqanno wilakuyninta shumaq yachatsiy. Ali yachatsirqa ali aruq ashmay mana penqakushqannömi qampis mana penqakunkitsu.
16 Lutan yachatsikuqkunawan ama rimanakuytsu. Paykunawan rimanakuptikiqa wawqi panikunapa shonqun waranlan waranlanmi chukruyan.
17 Lutan yachatsikuyqa cáncer qeshyanömi maytsaymanpis chayaykan. Himeneuwan Filetumi lutankunata yachatsir purirkaykan.
18 Paykunaqa nirkaykan kawarimushqanöna kaykar wanurqa manana kawarimunantsipaq kashqantami. Tsayno yachatsir pantakätsiptinmi wakin wawqi panikunaqa Jesucristuman mana yärakunnatsu.
19 Wakinkuna mana yärakuptinpis Tayta Dios akrashqan kaqkunaqa ali cimientushqa wayinömi kaykan. Tsaymi Diospa palabrancho kayno qelqaraykan: “Payman yärakuqkunataqa Tayta Dios *reqinmi”.*
Tsaynöpis kaynömi niykan: “Tayta Diosman* yärakuqkunaqa jutsata ama rurapäkutsunnatsu”.
20 Rïcu runapa wayincho manami qorilapitatsu ni qellaylapitatsu plätukuna kaykan, sinöqa kaykanmi qerupitapis mitupitapis. Qoripita y qellaypita kaq plätukunaqa manami lutala manijanantsipaqtsu kaykan. Qerupita y mitupita kaqkunami itsanqa waran waran manijanantsipaq kaykan.
21 Pipis qori plätuno kananpaqqa jutsata mana ruraypa kawatsun y lutan yachatsikuyta ama chaskitsuntsu. Tsaynöpami qoripita rurashqa manëjuta rïcu runa utilizashqanno paytapis alita rurananpaq Tayta Dios utilizanqa.
Timoteo imano kawananpaqpis nishqan
22 Wakin mözukuna lutankunata ruraptinpis qamqa ama ruraytsu. Tsaypa trukanqa Tayta Dios munashqanno kaway, payman yärakuy, pïmaytapis kuyay y lapan runakunawanpis ali kaway. Tsaynöpis Señor Jesucristuta alabar Tayta Dios munashqanno kawaqkunawan imaypis juntakay.
23 Manakaq yachatsikuykunapita wakin runakuna rimanakuptinpis tsayman ama jatikaytsu. Tsayno rimanakurqa jaqayätsinakunmi.
24 Señor Jesucristupa sirviqnin kaykarqa piwanpis mana rimanakuypa kaway. Tsaynöpis lapan runakunawan ali kaway, shumaq yachatsiy y imapitapis pacienciakuy.
25 Contrayki sharkuqkunata ali shimilaykipa tantiyatsiy. Tsayno tantiyatsiptiki capazchari Tayta Dios yanapanqa jutsankunata kacharir pay munashqannöna kawapäkunanpaq.
26 Tsayno kawarqa diablupa makincho kaykashqanpita yarqur Tayta Diospa makinchönami kawanqa.
Ichic wilacuycuna
^ 2.12a Rom. 8.17; 1Ped. 4.13.
^ 2.12b Mat. 10.33; Luc. 12.9.
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ 2.19 Núm. 16.5; Juan 10.14; 1Cor. 8.3.
^ 2.19 Wakin qepa kaq griego copiakunaqa Cristuman ninmi.
