2 Timoteo 4:1-22
4 Tayta Diospa jutincho y kawaqkunata y wanuqkunata juzgaq [Señor] Jesucristupa jutinchömi qamta kayno nï:
2 Chaskikunan o mana chaskikunan kaptinpis Tayta Diospa palabranta imaypis wilakuy. Mana ajayaypa shumaq tantiyatsiy, anyapay y shakyätsiy.
3 Shamuq watakunachöqa Jesucristupa wilakuyninta manami mayayta munapäkunqanatsu. Tsaypa trukanqa lutan yachatsikuqkunata ashirmi paykuna yachatsishqalanta chaskikuyta munapäkunqa.
4 Manakaqkunalata mayayta munarmi rasun kaq yachatsikuyta mana chaskikunqatsu.
5 Qam itsanqa Tayta Dios munashqanno kawanaykipaq shumaq tantiyakuy. Imano nakarpis payman yärakuy. Wilakuyninta pïmaytapis wilapay. Mana qelanaylapa Tayta Diosta sirviy.
6 Noqaqa wanunäpaqnami kaykä. Sacrificiuman jichashqan vïnu *altarcho ushakashqannömi* noqapis ushakänäpaqna kaykä.
7 Ali soldädunömi lapanta cumplishqä. Yalinakuqnömi chayanäpaq kaqman chayashqä. Yärakushqänölami imaypis yärakushqä.
8 Kananqa shuyaraykä ali juzgaq juez Señor Jesucristo kutimunan junaq corönata entregamänantami. Tsay coröna kaykan nawpancho jutsaynaqta chaskimashqanmi. Manami noqalatsu corönata chaskishaq, sinöqa Jesucristuta shuyarpaqkuna lapanmi chaskipäkunqa.
Carcilcho kashqanta wilapashqan
9 Timoteo, tinkunantsipaq jukla aywaykalämuy.
10 Wawqintsi Demasmi* kikin munashqanno kawayta munashpan kacharimar Tesalónica markaman aywakushqa. Crescentitami kachashqä Galacia provinciaman, Titutanami* kachashqä Dalmacia markaman.
11 Lucaslanami* noqawan kaykan. Shamurqa Marcusta* pushakarkamunki. Payqa Tayta Diospa wilakuyninta wilakuptï alimi yanapamanqa.
12 Wawqintsi Tíquicutanami* Éfesuman kachaykämü.
13 Troaschömi* Carpupa wayincho capötïta kachaykamurqä. Shamurqa capötïta y librükunatapis apakalämunki. Mana qonqaylapa pergamïnükunatapis apakalämunki.
14 Fiërru takaq Alejandrumi* pasaypa conträ rikakushqa. Tsayno kashqanpita Señor Jesucristumi juzganqa.*
15 Alejandrupitaqa alcäbu qampis kakunki. Wilakushqantsikuna lutan kashqantami wilapaykan.
16 Autoridäkunapa nawpancho puntata declaraptï manami pipis favornï sharkushqatsu. Lapanmi japaläta kachariykamashqa. Tsayno ruramashqanpita Tayta Dios perdonaykulätsun.
17 Paykuna kacharimaptinpis Tayta Diosqa noqawan kaykarmi shakyätsimashqa. Tsaymi mana Israel autoridäkunapa nawpanchöpis ali wilakuyninta wilakunäpaq yanapamashqa. Wanutsimänanpaq kaykaptinpis leonpa shiminpitanömi Tayta Dios salvamashqa.
18 Tsaynölami lapan mana alikunapitapis salvamanqa. Nirkurmi *mandaykashqancho imayyaqpis kawanäpaq pushakamanqa. ¡Tayta Dios imaypis alabashqa kaykulätsun! Amén.
Carta ushanan
19 Salüdüta qoykulanki Priscilata y Aquilata.* Onesíforupa* ayluntapis salüdüta qoykulanki.
20 Corintuchömi Erasto* quëdakamushqa. Trófimutanami* Miletucho qeshyaykaqta kachaykamurqä.
21 Tamya killa manaraq chayamuptin imaykatapis kachaykur shamunki. Eubulo, Pudente, Lino, Claudia y lapan wawqi panikunami salüdunta apatsikamun.
22 Señor Jesucristo imachöpis yanapaykuläshunki. Tsaycho kaqkunata lapaykita kuyapaykuläshunki. [Amén.]
Ichic wilacuycuna
^ 4.6 Éxo. 29.38-41.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 4.10b 2Cor. 8.23; Gál. 2.3; Tito 1.4.
^ 4.12 Hech. 20.4; Efe. 6.21-22; Col. 4.7-8.
^ 4.13 Hech. 20.6.
^ 4.14a 1Tim. 1.20.
^ 4.14b Sal. 62.12; Rom. 2.6.
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 4.19a Hech. 18.2, 18.
^ 4.19b 2Tim. 1.16-17.
^ 4.20a Hech. 19.22; Rom. 16.23.
^ 4.20b Hech. 20.4; 21.29.
