3 Juan 1:1-14
1 Kuyay wawqi Gayo:*
Noqa *mayor wawqi karmi qamta rasunpa kuyar kay cartata apaykätsimü.
2 Kuyay wawqi, Tayta Diostami manakuykä ali kawashqaykiman tupu lapanchöpis alila kanaykipaq y mana qeshyaypa kawanaykipaq.
3 Jesucristo yachatsishqannöla kawaykashqaykita wawqikuna chayamur wilamaptinmi pasaypa kushikushqä.*
4 Tayta Dios munashqanno wamräkuna* kawarkaykashqanta musyarmi pasaypa kushikü.
Gayo yanapakuq kashqanpita Juan kushikushqan
5 Kuyay wawqi Gayo, juk lädupita shamuq wawqikunata yanapar alitami ruraykanki.
6 Paykuna chayamurmi kuyapäkuq kashqaykita juntakashqächo wilamashqa. Yapay kutimuptinpis juk markaman aywananpaq yanapaykulanki. Tsayno ruraptikimi Tayta Diospis kushikunqa.
7 Jesucristupa ali wilakuyninta wilakur purirmi Tayta Diosta mana cäsukuq runakunataqa imatapis manakärintsu.
8 Tsaymi Tayta Diospa wilakuqninkunataqa noqantsi yanapanantsi. Tsayno rurarmi paykunawan iwal wilakuqno kashun.
Diótrefes mana cäsukuq kashqan
9 Wilakuqkunata yanapanantsipaq tantiyatsirmi juk cartata qamkunaman apatsimurqä. Tsayno kaptinpis Diótrefes manashi yätsishqäkunata cäsukamantsu. Payqa mandaq kashqanman atiënikurshi munashqanta ruraykan.
10 Tsaynöpis noqakunapa wasäta rimarshi puriykan. Karupita shamuq wawqikunatapis manashi chaskintsu. Patsatsiqkunatapis michanshi mana patsatsinanpaq. Michaykaptinpis patsatsiptinqa juntakashqaykipita qarqunshi. Tsayno rurashqanpita chayamurnami olqüpäshaq.
Demetrio cäsukuq kashqan
11 Kuyay wawqi Gayo, ama Diótrefesno kaytsu, sinöqa alilata ruray. Alita ruraq kaqqa Diospa wamranmi kaykan. Mana alita ruraq kaqmi itsanqa Diosta mana *reqintsu.*
12 Demetriupaqmi itsanqa lapan runakunapis parlapäkun Tayta Diospa wilakuynin nishqanno kawaykashqanta. Noqakunapis rikashqämi tsayno ali kawaykashqanta. Qamkuna musyankimi wilashqä rasun kaq kashqanta.
Carta ushanan
13 Yätsinäpaq maspis kaykanraqmi. Itsanqa cartalacho manami qelqamushaqtsu.
14 Kikï shamurnami mastaqa tantiyatsishayki.*
(15)Tayta Dios yanapaykuläshunki makincho ali kawanaykipaq. Kaycho reqinakushqaykikunapis lapanmi salüdunta apatsikamun. Tsaycho reqinakushqäkunata cada ünunta salüdüta qoykulanki.
Ichic wilacuycuna
^ mayor wawqi Mayor wawqikunaqa iglesiacho yachatsiqkunami kaykan (1Tim. 3.2). Bernabéwan apóstol Pablumi mushuq iglesiakunacho mayor wawqikunata churapäkurqan (Hech. 14.23). Apóstol Pedrumi wilamantsi wawqi panikunata imano rikananpaq kashqantapis (1Ped. 5.1-4). Wawqi panikunata imano rikashqanpitami mayor wawqikuna Tayta Diosta cuentata qonqa (Heb. 13.17). Mayor wawqikuna imano kawananpaq kashqantapis Bibliachömi wilamantsi (1Tim. 3.2-7; Tito 1.5-9). Mayor wawqi kananpaq pitapis manaraq churar imano kawashqantapis shumaq musyashun (1Tim. 5.22).
^ 1.4 Wamrankunapaq parlarqa yärakuq mayinkunapaqmi parlarqan.
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ 1.11 1Juan 2.29; 3.6, 9-10.
