Amós 2:1-16
2 TAYTA DIOSMI kayno nin:“Moab nacioncho taq runakunapa jutsankunaqa aypämushqanami kaykan.*Paykunaqa Edom nacionpa mandaqnin reypa tulunkunata uchpayashqanyaqmi rupatsipäkurqan.Tsayno rurapäkushqanpitami fiyupa castigashaq.
2 Tsaymi imaykatapis nina rupar ushashqanno Moab nacionta y Queriotcho palaciukunata ushakätsishaq.Pelyacho qaparpar *cornëtanta tukarkaykaptinmi moabita runakunata soldädukuna wanutsir ushakätsinqa.
3 Tsay nacionpa mandaqnin reytami ushakätsishaq.Mandäshiqninkunatapis wanutsishaqmi”.TAYTA DIOSMI tsayno nin.
Judá nación runakunata Tayta Dios juzgananpaq nishqan
4 TAYTA DIOSMI kayno nin:“Judá nacioncho taq runakunapa jutsankunaqa aypämushqanami kaykan.Paykunaqa mandamientükunata y leynïkunata mana cäsukurmi unay aylunkuna adorashqan ïdulukunata adorarkaykan.Tsayno rurashqanpitami fiyupa castigashaq.
5 Tsaymi imaykatapis nina rupar ushashqanno Judá nacionta y Jerusaléncho palaciukunata ushakätsishaq”.*
Israel nación runakunata Tayta Dios juzgananpaq nishqan
6 TAYTA DIOSMI kayno nin:“Israel runakuna, qamkunapapis jutsa rurashqaykikunaqa aypämushqanami kaykan.Qamkunaqa jutsaynaq runakunatami rantikurkaykanki.Lanqipa chaninnöla jaqayki kaykaptinpis waktsa runakunata ashmay kananpaqmi rantikurkaykanki.Tsayno rurapäkushqaykipitami fiyupa castigashayki.
7 Waktsakunata y humildikunatami munashqaykita rurarkaykätsinki.Juez kaykarpis quejakamushqanta manami arreglapäkunkitsu.Wakinnikiqa taytaykiwan tsay warmilawanmi tarkaykanki.Tsayno rurar *santu jutïta manakaqmanmi churarkaykanki.
8 Prenda kachapäshushqayki röpata qeshtaykurmi *altarkuna nawpancho punurkaykanki.*Tsaynöpis manakaqpita multata pägatsishqayki qellaywanmi vïnuta rantirkur juk dioskunata adorapäkushqayki capillakunacho upyarkaykanki.
9 “Qamkunata kuyarmi amorreo runakunata ushakätsishqä.* *Cedru qerukunano jatusaq kaykaqta y encina yörakunano chukru kaykaqtami tsay runakunata asulashqä.Yörapa wayuynintapis sapintapis elqätsiqnömi elqätsishqä.
10 Amorreo runakuna tashqanman chayanaykipaq kikïmi Egiptupita qamkunata jorqamurqä.Kikïmi chusku chunka (40) wata chunyaq jirkakunapa qamkunata pushamurqä amorreo runakuna tashqan markakunata qoykunäpaq.*
11 Tsurikikunapitami wakinta akrashqä profëta kananpaq.Wakintanami akrashqä nazareo runa kananpaq.*Israel runakuna, ¿manaku tsayno kananpaq kamakätsishqäta tantiyapäkukunki?”TAYTA DIOSMI tsayno nin.
12 “Tsayno akraykaptïpis qamkunaqa nazareo runakunata mana munaykaqtami vïnuta uputsishqanki.Tsaynölami profëtakunatapis michashqanki wilakuynïta mana wilakärinanpaq.
13 Tsayno kapäkushqaykipitami töchi töchi cargashqa aywaykaq carrëta imatapis aqashqanno qamkunatapis ushakätsishayki.
14 Noqapa makïpitaqa mayjina cörrishpaykipis manami qeshpipäkunkipaqtsu.Ni kalpasapa kashpaykipis defiendikuyta manami kamäpakunkipaqtsu.Ni mayjina geniuyuq karpis manami salvakärinkipaqtsu.
15 Flëchayta munarpis manami kamäpakunkipaqtsu.Mayjina cörriq karpis manami aywayta atipankipaqtsu.Cawalluta muntakurkur qeshpirpis manami salvakärinkipaqtsu.
16 Tsay junaqqa mayjina geniuyuq karpis armaykikunata kachariykurmi qeshpir aywakärinkipaq”.TAYTA DIOSMI tsayno nin.
Ichic wilacuycuna
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 2.8 Prendata kachapashqan röpata patsa tsakaptin kutitsinanpaq nishqanta musyanaykipaq liyinki Éxo. 22.26-27; Deut. 24.12-13.
^ 2.9 Egiptupita Canaánman Israel runakuna chayarmi Tayta Dios yanapaptin amorreo runakunata ushatsirqan. Nirkurmi paykuna tashqan markakunacho Israel runakuna tarqan.
^ 2.9 Deut. 3.8-11.
^ 2.10 Éxo. 20.2; Deut. 8.2-16.
^ 2.11 Núm. 6.1-8.
