Amós 3:1-15
3 Israel y Judá runakuna, Egiptupita jorqamushuqniki TAYTA DIOS kayno nishqanta mayapäkuy:
2 “Kay patsacho tsaytsika runakuna kaptinpis qamkunalatami akrashqä kuyashqä runakuna kanaykipaq.*Tsaymi jutsata rurapäkushqaykipita castigashayki”.
3 Maypapis ishkan aywananpaqqa puntata wilanakunraqmi.
4 Leonpis munticho qaparan uywata mikunanpaq tarirraqmi.León malwapis machaypita chikikamun mikunanpaq tsarirraqmi.
5 Pishqukunapis trampaman yaykun ima mikuytapis churapaptinraqmi.Ima uywatapis tsarirraqmi trampapis juchun.
6 *Cornëtatapis tukan markacho imapis mantsariypaq kaptinraqmi.Tsaynölami markacho ima desgraciapis pasan Tayta Dios castigaptinraq.*
7 Sirviqnin profëtakunata manaraq wilarqa TAYTA DIOS manami imatapis espantaypaq kaqkunata rurantsu.*
8 León qaparashqanta mayar ¿piraq mana mantsakunmantsu?TAYTA DIOS nishqanta mayar ¿piraq mana wilakunmantsu?*
9 Wilakuqkuna, Asdod markaman aywaykur nishqäta palaciuncho reyta wilapay.Egiptumanpis aywaykur nishqäta palaciuncho reyta wilapay.Wilapar kayno nipäkunki:“Samaria markaman y nawpan jirkankunaman lapayki shapäkamuy.Tsaychömi rikapäkunkipaq markacho lutanta rurarkaykaqta y mana kuyapaypa runakunata nakarkaykätsiqta.
10 Paykunaqa ali rurayta manami yachapäkuntsu.Suwakushqalantami palaciunkunachöpis tsararkaykan”.
11 Tsayno kashqanpitami Samaria runakunata TAYTA DIOS kayno nin:“Contraykikuna maytsaypita shamurmi atacashunkipaq.Amparakunaykipaq sharkatsishqayki jatusaq perqa murällakunatapis lapantami juchutsinqapaq.Palaciuykikunapitapis lapan tarishqantami apakärinqapaq”.
12 TAYTA DIOSMI kayno nin:“Uyshata leonpa shiminpita qechuptin atakshulan o rinrilan quëdashqannölami Samariacho taq Israel runakunapis walkaqla quëdanqa.Damascupita rantimushqan kuyaylapaq sillëtacho jamaraq runakunapis walkaqlami quëdanqa”.
13 Lapanta mandaq TAYTA DIOS kaynömi nin:“Nishqäkunata shumaq mayapäkuy.Jacobpita miraq lapan runakunata kayno wilapäkuy:
14 ‘Jutsa rurashqanpita Israel runakunata juzganä junaq Bet-elcho kaykaq *altarkunata lapantami ushakätsishaq.*Ushakätsiptïmi altarpa esquïnancho kaykaq waqrankuna pakikar pampaman shikwanqa.
15 Usya witsan tänanpaq ruratsishqan wayitapis y tamya witsan tänanpaq ruratsishqan wayitapis lapantami juchutsishaq.*Marfilwan adornashqa wayikunatapis lapantami juchutsishaq.Lapan jatun wayikunatami ushakätsishaq’ ”.TAYTA DIOSMI tsayno nin.
Ichic wilacuycuna
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ 3.8 Jer. 20.9; 1Cor. 9.16.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 3.14 2Rey. 23.15.
^ marfil Marfilqa elefantipa waqshunmi kaykan (\xt 1Rey. 10.18; 22.39; Sal. 45.8; Cant. 5.14; 7.4; Amós 3.15; 6.4; Apoc. 18.12).
