Amós 7:1-17
7 Reypa cosëchanta shuntayta usharkur kikinkunapa cosëchanta runakuna manaraq shuntayta qalaykuptinmi TAYTA DIOS revelamar rikatsimarqan tsaytsika chukluskunata kay patsaman juntaqpaq kachamunanpaq kashqanta.*
2 Tsay chukluskuna lapan qewakunata mikur ushaykaqta rikatsimaptinmi kayno ruwakurqä: “TAYTA DIOS, noqakunata perdonaykalämay. Mana perdonamaptikiqa Jacobpita miraqkuna walka kaqlanpis lapanïchari ushakäshaq”.
3 Tsawraqa TAYTA DIOS kuyapämashpan kayno nimarqan: “Ruwakamaptikiqa chukluskunata manami kachamushaqtsu”.
Revelacioncho ninata Amós rikashqan
4 Tsaypitanami TAYTA DIOS revelacioncho rikatsimarqan Israel nacionta ninawan castigashqanta. Tsay ninaqa patsa rurinpita pashtamuq yakuta tsakitsirmi intëru Israel nacionta usharqan.*
5 Tsawraqa kayno ruwakurqä: “TAYTA DIOS, ama tsayno ushakaykatsilämaytsu. Noqakunata mana perdonamaptikiqa Jacobpita miraqkuna walka kaqlanpis lapanïchari ushakäshaq”.
6 Tsawraqa TAYTA DIOS kuyapämashpan kayno nimarqan: “Ruwakamashqaykipita manami tsaytapis rurashaqtsu”.
Revelacioncho plomädata Amós rikashqan
7 Tsaypitanami revelacioncho Tayta Diosta rikarqä perqa murälla nawpancho plomädan aptashqa ichiraykaqta.
8 Tsaymi tapumarqan kayno nir: “Amós, ¿imatataq rikaykanki?”
Niptinmi kayno nirqä: “Albañilpa plomädan aptashqa runa ichiraykaqtami rikaykä, Tayta”.
Tsawraqa kayno nimarqan: “Plomädawan murälla derëchu kashqanta o wiksu kashqanta musyashqannömi Israel runakuna imano kawashqantapis musyashaq. Jutsata rurar kawashqanpita manami perdonashaqnatsu.
9 “Isaacpita miraqkuna* ruratsishqan *altarkunatami ushakätsishaq.Israel nacioncho lapan capillakunatapis juchutsishaqmi.Espädäta aptakurkurmi aywashaq rey Jeroboampita miraqkunata ushakätsinäpaq”.
Cüra Amasías profëta Amóspa contran sharkushqan
10 Amós tsayno wilakuptinmi Bet-elcho kaq cüra Amasías Israel runakunapa mandaqnin rey Jeroboamta wilakatsirqan kayno nir: “Qampa contrayki rimarmi Amós puriykan. Israel runakuna pay nishqanta cäsupaptinqa nacionnintsi ushakanqapaqmi.
11 Payqa puriykan kayno nirmi: ‘Jeroboamqa espädawan wanutsishqami kanqa. Tsaynöpis Israel runakunataqa juk nacionmanmi prësu apakärinqa’ ”.
12 Tsaypitanami Amósta cüra Amasías kayno nirqan: “¡Profëta, kaypita jukla aywakuy! Wilakushqaykipita gänapakuyta munarqa Judá nacionman kutiykur tsaycho wilakuy.
13 Kay Bet-elcho Israel nacionpa templun kaptinmi Diosta adorananpaq reypis shamun. Tsayno kaykaptinqa kaycho ama wilakuytsu”.
14 Tsayno niptin Amós kayno nirqan: “Noqa manami profëtatsu ni profëtapa tsurintsu kä, sinöqa uyshakunata mitsikur y munti hïguskunata shuntalarmi kawä.
15 Uyshakunata mitsikur puriykaptïmi TAYTA DIOS kayno nimarqan: ‘Israel runakunaman ayway wilakuynïta wilapänaykipaq’.
16 Kanan shumaq mayamay TAYTA DIOS qampaq nishqanta.“Qamqa kaynömi niykanki: ‘Ama wilakuytsu Israel runakunapa contran.Isaacpita miraqkunapaq imatapis ama rimakuytsu’.
17 “Tsaymi TAYTA DIOS kayno nin:‘Qampa warmikimi kay markacho *wayrapakuq warmi rikakunqa.Warmi tsurikikunata y olqu tsurikikunatami espädawan wanutsipäkunqa.Chakraykikunatapis suertita jitaypami rakipänakunqa.Kikikinami wanunkipaq Diosta mana cäsukuqkuna tashqan nacioncho.Israel mayikikunatami karu nacionman prësu apakärinqapaq’ ”.
Ichic wilacuycuna
^ 7.4-5 Joel 1.19-20.
^ 7.9 Isaacpita miraqkunaqa Israel runakunami kaykan.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
