Filemón 1:1-25
1 Wilakuq mayï kuyay Filemón:
Noqa Pablumi, Jesucristupa wilakuyninta wilakushqäpita carcilcho kaykar Timoteuwan kay cartata apaykätsimü.
2 Salüdüta qoykulanki panintsi Apiata, wilakuq mayintsi Arquiputa* y wayikicho juntakaykur Tayta Diosta alabaq wawqi panintsikunatapis.
3 Papänintsi Tayta Dios y Señor Jesucristo kuyapäshushpayki ali kawanaykipaq yanapaykuläshunki.
Yärakuq mayinkunawan Filemón ali kawashqan
4 Wawqi Filemón, manakushqä hörami qampaq Tayta Diosta imaypis agradëcikü.
5 Señor Jesucristuman yärakuykashqaykita y yärakuq mayintsikunawan kuyanakuykashqaykitami wilamashqa.
6 Tsaymi manakuykä Jesucristuman yärakunaykipaq y noqantsi rayku wanushqanpita ali kaqkunata ruranaykipaq.
7 Wawqi Filemón, kuyakuq kashpayki yärakuq mayintsikunata shakyaykätsishqaykita musyarmi noqapis pasaypa kushikü.
Onésimuta Filemón chaskinanpaq Pablo ruwakushqan
8 Wawqi Filemón, Jesucristupa wilakuyninta wilakushqäpitami carcilcho wichqaraykä. Tsaynöpis awkinnami kaykä. Prësu kaykashqäman ashmayniki Onésimo* chayamuptin ali wilakuyta wilapaptïmi Jesucristuta chaskikushqa. Tsaymi kananqa tsurïnöna kaykan.
Tsayno kaptinmi qamta ruwakü Onésimuta kachamuptï ali chaskinaykipaq. Jesucristupa apostolnin kar qamta obligarpis obligämanmi. Tsayno karpis manami obligayta munätsu, sinöqa kuyakuq kaptikimi Onésimuta ali chaskiykunaykipaq ruwakü.
9 -
10 -
11 Ashmayniki karpis nawpata manami shumaqlaqa yanapashurqaykitsu. Kananmi itsanqa Jesucristuta chaskikushqana kar qamtapis y noqatapis ali yanapamäshun.
12 Tsaymi pasaypa lakiykarpis Onésimuta kutiykätsimü. [Payta kikïtano chaskiykulay.]
13 Ali wilakuyta wilakushqäpita prësu wichqarashqäyaq trukayki yanapamänanpaq quëdatsikuptïpis alimi kanman.
14 Tsayno kaptinpis ashmaynikitaqa manami tsararäkümantsu, sinöqa kikikiraqmi ninkiman yanapamänanpaq o mana yanapamänanpaqpis.
15 Capazchari Tayta Dios kamakätsishqa Onésimo juk tiempula qampita yarqamunanpaq. Tsaymi kananqa Jesucristuta chaskikushqana kar imayyaqpis wawqikina kaykan.
16 Kananpita mananami ashmaynilaykinatsu kanqa, sinöqa kuyay wawqintsinami. Tsayno kaykaptinqa noqa kuyashqäno makikiman kutimuptin qampis kuyaykulanki.
17 Tsaymi yärakuq mayï kaptiki ruwakü noqata chaskimashqaykino paytapis chaskiykunaykipaq.
18 Ashmayniki Onésimo suwapäshushqayki kaptinqa o jaqayki kaptinqa noqami pägaläshayki.
19 Päganäpaq kaqtaqa kikïmi qelqaykämü. Itsanqa ama qonqaytsu Jesucristupa ali wilakuyninta wilapashqäpita qampis jaqä kashqaykita.
20 Wawqi Filemón, yärakuq mayï kaptikimi ruwakü kay nishqäta ruranaykipaq. Ruwakushqäta ruraptikiqa kushikushaqmi.
21 Kay cartatami apaykätsimü imatapis nishqäta ruranaykipaq kashqanta musyar. Nishqäpita mastaraq ruranaykipaq kashqantapis musyämi.
22 Tayta Diosta manakushqaykino carcilpita yarqamurqa watukuq shamushaqmi. Chayamuptï patsatsimänaykipaq juk cuartuta jakaykatsilay.
Carta ushanan
23 Epafrasmi* salüdunta qampaq apatsikamun. Paypis Jesucristupa ali wilakuyninta wilakushqanpitami noqawan juntu prësu wichqaraykan.
24 Tsaynölami wawqintsi Marcos,* Aristarco,* Demas* y Lucaspis* salüdunkunata apatsikamun. Paykunami lapanchöpis yanapaykäman.
25 Señor Jesucristo kuyapäshushpayki imaypis yanapaykuläshunki. [Amén.]
Ichic wilacuycuna
^ 1.24b Hech. 19.29; 27.2; Col. 4.10.
^ 1.24c Col. 4.14; 2Tim. 4.10.
^ 1.24d Col. 4.14; 2Tim. 4.11.
