Gálatas 6:1-18
6 Espíritu Santu munashqanno kawaq wawqi panikuna, yärakuq mayiki jutsata rurashqanta musyarqa mana jamurpaylapa tantiyatsipäkuy. Cuidädu kikikikunapis jutsa rurayman ishkinkiman.
2 Jukniki juknikipis shakyätsinakur yanapanakäriy. Tsaynöpami Jesucristo yachatsimashqantsi mandamientunta cumplirkaykanki.*
3 Imatapis mana musyaykar runa tukurqa kikilaykikunami engañakurkaykanki.
4 Runa tukunaykipa trukanqa kikikikuna imano kawarkaykashqaykitapis shumaq tantiyakäriy. Tsaynöpami ali tukur kushikunaykipa trukanqa Tayta Dios munashqanno kawashqaykipita kushikärinkipaq.
5 Lapantsimi kawashqantsiman tupu Tayta Diosta cuentata qoshunpaq.
6 Jesucristupa wilakuyninta yachakuqkunaqa yachatsiqninta imalawanpis yanapatsun.
7 Shumaq tantiyakushun. Tayta Diosta manami engañayta kamäpakuntsitsu. Imatapis murushqantsitaqa tsaytami cosechantsi.
8 Tsaynölami jutsa ruraycho kawarqa wanur ushakäshunpaq. Espíritu Santu munashqanno kawarmi itsanqa mana ushakaypa imayyaqpis kawashun.
9 Tsayno kaykaptinqa mana ajayaypa alikunalata rurashun.* Tsayno kawaptintsiqa Tayta Diosmi imay karpis premiuta qomäshunpaq.
10 Tsayta musyaykarqa kashqanman tupu pïmaytapis yanapashun. Jesucristuman yärakuq mayintsi kaptinqa masraq yanapashun.
Carta ushanan
11 Kay cartapa ushanantaqa kikïmi jatusaq letrakunawan qelqaykämü.
12 *Señalakärinaykipaq yachatsishuqnikikunaqa Israel mayinkuna ali rikananta munalarmi yachaykätsishunki. Contran sharkunanta mantsakurmi Jesucristo cruzcho wanushqanpita salvakushqantsitaqa mana yachatsipäkuntsu.
13 Paykunaqa señalakurpis *Moisés qelqashqan leykunata manami cumplipäkuntsu. Tsayno karpis leyta cumplitsishqanpita alabakunalanpaqmi señalakärinaykita munarkaykan.
14 Noqaqa manami imapitapis alabakütsu. Alabakunäpa trukanqa Señor Jesucristo noqantsi rayku cruzcho wanushqanpitami kushikü. Cruzcho wanushqa kaptinmi kay mundu* noqapaq crucificashqano kaykan y noqapis kay mundupaq crucificashqanömi kaykä.
15 Tsaymi [Jesucristucho kaptintsiqa] señalakushqa kashqantsitsu ni mana señalakushqa kashqantsitsu välin. Mushuq kamashqa runana kashqantsimi itsanqa rasunpa välin.*
16 Tsayta tantiyakuq runakunataqa Tayta Dios kuyapar ali rikaykulätsun. Paykunaqa Tayta Dios kuyashqan Israel runakunami karkaykan.*
17 [Señor] Jesucristupa ali wilakuyninta wilakushqäpita maqamashqan siräkuna kaykanmi. Tsayno kaykaptinqa yachatsishqäta pipis manakaqman ama churatsuntsu.
18 Wawqi panikuna, Señornintsi Jesucristo kuyapäshushpayki imaypis yanapaykuläshunki. Amén.
Ichic wilacuycuna
^ 6.9 2Tes. 3.13.
^ señalakushqan Señalakuyqa chiwlakunanpa punta qaranta kutsurir jorqushqanmi kaykan. Abrahamwan Tayta Dios pactuta rurashqanta yarpashpanmi Israel runakunaqa tsayno señalakärin. Tsaymi olqu wamrakunata yurishqanpita pusaq junaqniyuq kaykaptin señalapäkun. Tsaytami castellänucho “circuncisión” nipäkun (Gén. 17.9-14; Col. 2.11; 1Cor. 7.18-20).
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
^ 6.14 Kay mundupaq parlarqa runakuna mana alita rurashqanpaq y mana ali yarpashqanpaqmi parlan.
^ 6.15 Juan 3.3-7; 2Cor. 5.17.
^ 6.16 Wakin runakunaqa kay versïculuta kayno ninanpaqmi traducin: Tsayta tantiyakuq runakunata y kuyashqan Israel runakunatapis Tayta Dios kuyapar ali rikaykulätsun.
