Génesis 1:1-31
1 Imapis manaraq kaptinmi Tayta Dios kamarqan jana patsatapis y kay patsatapis.*
2 Kay patsaqa manami kanan kaykashqannötsu karqan, sinöqa yanawyaykaq yakulami karqan. Tsay yaku jananchömi Tayta Diospa Espïritun kuyuykarqan.
3 Tsawraqa Tayta Dios kayno nirqan: “¡Atsikyaq katsun!”*
Niptinmi atsikyarqan.
4 Atsikyaqta kamarkurmi Tayta Dios rikarqan ali kashqanta. Tsaymi kamakätsirqan tsakaypis atsikyaqpis kananpaq.
5 Tsaypitana atsikyaqpa jutinta churarqan junaq kananpaq y yanawyaykaqtana tsakay kananpaq. Tsaykunatami kamarqan punta kaq junaqcho.
6 Tsaypitami Tayta Dios kayno nirqan: “Ishkayman yaku rakiränanpaq yaku chawpincho azulyaraykaq katsun”.*
7 Nishqannölami azulyaraykämuqta kamarqan. Tsaynöpami wakin kaq yaku quëdarqan kay patsacho y wakin kaqnami azulyaraykämuqpa janancho. Nishqannölami lapanpis karqan.
8 Azulyaraykämuqpa jutintami Tayta Dios churaparqan jana patsa jutin kananpaq. Tsaytami kamarqan ishkay kaq junaqcho.
9 Tsaypitanami Tayta Dios kayno nirqan: “Ura kaq yaku juk patsalaman juntakätsun tsaki patsa rikakänanpaq”.*
Tsay nishqannölami lapanpis kamakarqan.
10 Tsaki kaqpa jutintami Tayta Dios churaparqan patsa jutin kananpaq. Y juntakashqa kaq yakutami lamar nirqan. Tsayno kamarkurmi Tayta Dios rikarqan ali kashqanta.
11 Nirkur kayno nirqan: “Alpapita winamutsun tukuy casta jachakuna. Tsay jachakuna kanqa muruyuq qewakuna y tukuy niraq wayuq yörakunapis”.
Nishqannölami lapanpis karqan.
12 Tsaymi winamurqan tukuy niraq jachakuna y tukuy niraq wayuq yörakunapis. Tsaykunata kamarkurmi Tayta Dios rikarqan ali kashqanta.
13 Tsaykunatami kamarqan kimsa kaq junaqcho.
14 Tsaypitanami Tayta Dios kayno nirqan: “Jana patsacho atsikyaqkuna katsun junaqpis tsakaypis kananpaq, junaqkunata watakunata yupapäkunanpaq y murunanpaq cosechananpaq imay kashqantapis musyapäkunanpaq.
15 Tsaynöla atsikyaqkuna ciëlucho katsun patsata atsikyapänanpaq”.
Nishqannölami lapanpis kamakarqan.
16 Tsaynömi kamarqan intita, killata y qoylarkunatapis. Intita kamarqan junaqpa atsikyänanpaq y killatana kamarqan tsakaypa atsikyänanpaq.
17 Tsaykunata Tayta Dios jana patsaman churarqan kay patsaman atsikyamuptin
18 tsakaypis junaqpis kananpaqmi. Tsaykunata kamarkurmi Tayta Dios rikarqan ali kashqanta.
19 Tsaykunatami kamarqan chusku kaq junaqcho.
20 Tsaypitana Tayta Dios kayno nirqan: “Yakucho lapan casta kawaqkuna y patsa jananpa päriqkunapis atska katsun”.
21 Tsayno nirmi Tayta Dios kamarqan lamarcho jatusaq mantsariypaq uywakunata. Tsaynöpis kamarqan lamarcho, qochakunacho y mayukunacho tukuy niraq pescädukunata. Tsaynömi kamarqan tukuy niraq päriqkunatapis. Tsaykunata kamarkurmi Tayta Dios rikarqan ali kashqanta.
22 Nirkurnami bendicionninta qor kayno nirqan: “Lamarcho kawaqkuna y patsa jananpa päriqkunapis, atskaman mirapäkuy”.
23 Tsaykunatami pitsqa kaq junaqcho kamarqan.
24 Tsaypitanami Tayta Dios kayno nirqan: “Tukuy niraq uywakuna katsun: ashmana kaq y mana ashmana kaqpis. Tsayno katsun pachalanpa y lätaypa puriqkunapis”.
Nishqannölami lapanpis kamakarqan.
25 Tsaynöpami Tayta Dios kamarqan tukuy niraq ashmana kaq y mana ashmana kaq uywakunata y pachalanpa y lätaypa puriqkunatapis. Tsaykunata kamarkurmi Tayta Dios rikarqan ali kashqanta.
26 Nirkurnami kayno nirqan: “Kananqa runata kamashun kikintsi niraqta.* Noqantsino kananpaqmi payta kamashun.* Paypa munayninchömi kanqa pescädukuna, päriqkuna, ashmana kaq y mana ashmana kaq uywakuna y pachalanpa y lätaypa puriqkunapis”.
27 Kikin niraqtami runata Tayta Dios kamarqan.Payno kananpaqmi kamarqan.Olqutapis warmitapis paymi kamarqan.*
28 Nirkurnami bendicionninta qorqan kayno nir:“Kay patsa juntananyaq mirapäkuy.Munaynikicho katsun pescädukuna, päriqkuna y kay patsacho lapan kawaqkunapis”.*
29 Tsaypitana kayno nirqan: “Mikupäkunaykipaqmi kamashqä kay patsacho lapan mikuna kaq jachakunata y wayuq kaq yörakunatapis.
30 Uywakuna, päriqkuna y pachalanpa y lätaypa puriqkuna mikupäkunanpaqmi jachakunatawan qewakunata kamashqä”.
Nishqannölami lapanpis kamakarqan.
31 Lapan kamashqankuna pasaypa ali kashqantami Tayta Dios rikarqan. Tsaykunatami kamarqan soqta kaq junaqcho.
Ichic wilacuycuna
^ 1.1 Juan 1.1-3.
^ 1.6 Tsay witsanmi runakuna yarparqan azulyaraykaq chukru kashqanta. Tsaynöpis yarparqan uchku uchku kaptin tamyamushqanta.
^ 1.26 Unay reykuna nipäkurqan paykunala Dios niraq kashqantami. Tsaynöpis nipäkurqan Dios niraq kar paypa jutincho runakunata mandashqantami. Kay textuchömi itsanqa niykan lapan runakunapis Dios niraq kashqanta. Pay niraqta runata kamashqanta nirqa Tayta Diosta mandäshir kay patsacho kaqkunata shumaq rikanantsipaq kashqantami niykan.
^ 1.26 Gén. 9.6; 1Cor. 11.7.
^ 1.27 Mat. 19.4; Mar. 10.6.
^ 1.28 Gén. 5.1-2; 9.1.
