Génesis 14:1-24
14 Tsay witsan Sinar markapa mandaqnin rey kaykarqan Amrafel. Elasar markapa mandaqnin rey kaykarqan Arioc. Elam markapa mandaqnin rey kaykarqan Quedorlaomer. Goim markapa mandaqnin rey kaykarqan Tidal.
2 Tsay reykunami guërracho karkaykarqan Sodoma markapa mandaqnin rey Berawan, Gomorra markapa mandaqnin rey Birsawan, Adma markapa mandaqnin rey Sinabwan, Zeboim markapa mandaqnin rey Semeberwan y Bela markapa mandaqnin reywanpis. Bela markapa jukaq jutin karqan Zoar.
3 Tsay pitsqa reykunami soldädunkunata shuntarqan Sidim pampaman. Tsay pampachömi kananqa *Kachi Lamar kaykan.
4 Tsay reykunataqa rey Quedorlaomer munaynincho tsarararqan chunka ishkay watami. Tsaypita juk wata pasarkuptinnami pitsqan reykuna wilanakur Quedorlaomerpa contran sharkurqan.
5 Tsaymi juknin watacho Quedorlaomer yanapaqnin reykunawan y soldädunkunawan aywapäkurqan Astarot Karnaimman. Tsaychönami refaíta runakunawan pelyashpan wanutsipäkurqan. Tsaynölami Ham markapa aywar zuzita runakunata wanutsipäkurqan. Tsaypita Save-quiriataimpa aywar emita runakunatapis wanutsipäkurqan.
6 Nirkur Seir jalqakunapa aywar horeo runakunatapis wanutsipäkurqan. Qeshpiq horeo runakunatanami qatikacharqan Parányaq. Tsayqa kaykan chunyaq jirka nawpanchömi.
7 Tsaypita kutimurmi Quedorlaomer y paywan aywaqkuna chayarqan En-mispatman. Tsaypa jukaq jutin karqan Cades. Tsay kinraypami amalecita runakunata asularqan. Tsaypita pasarnami Hazezon-tamar particho taq amorreo runakunatapis asularqan.
8 Tsaymi Sodomapa, Gomorrapa, Admapa, Zeboimpa y Belapa mandaqnin reykuna kamarikärirqan Sidim pampacho guërrata rurananpaq. (Bela markapa jukaq jutinmi karqan Zoar.)
9 Tsaychömi tsay pitsqa reykuna chuskun reykunawan pelyapäkurqan. Tsay chuskun reykunami karqan Elampa mandaqnin rey Quedorlaomer, Goimpa mandaqnin rey Tidal, Sinarpa mandaqnin rey Amrafel y Elasarpa mandaqnin rey Arioc.
10 Sidim pampachöqa brea* pözukunami atska karqan. Tsaymi Sodomapa y Gomorrapa mandaqnin reykuna soldäduntin pelyapita qeshpiykashqancho tsay brea pözukunaman jeqakurpurqan. Wakin kaq reykunami soldädunkunawan qeshpipäkurqan jalqakunaman.
11 Tsay pelyacho vinciq chusku reykunami soldädunkunawan Sodoma y Gomorra runakunaman yaykuykur lapan imaykantapis alinnin kaqtaqa apakärirqan. Tsaynölami lapan mikuyninkunatapis apakärirqan.
12 Abrampa sobrinun Lottapis Sodoma markacho taykaptinmi prësu tsarirkur lapan imaykantawan apakärirqan.
13 Tsayno aparkaykaptinmi juk runa qeshpiykur Abramta wilarqan.
(Abramqa hebreo runami karqan. Payqa taykarqan Mamripa encina munti chakranchömi. Mamre karqan amorreo runami y Escolpa y Anerpa wawqinmi. Paykunaqa Abramwan yanapanakunanpaqmi wilanakushqa karqan.)
14 Sobrinun Lotta prësu aparkaykashqanta mayaykurmi Abramqa shuntarqan makincho yurishqan ashmayninkunata. Tsay runakuna karqan kimsa pachak chunka pusaqmi (318). Paykunata pushakurkur aywarmi prësu apaykashqan qepanta Abram qatiparqan Dan markayaq.
15 Tsaycho taripaykurmi ashmayninkunawan tsakaypa elaqpita atacashpan paykunata vincirqan. Tsayno vincirmi qatipäkurqan Hoba markayaq. Tsay marka kaykan Damasco markapa norti kaq lädunpami.
16 Nirkurmi lapan apakushqankunata qechurkamur kutitsimurqan. Tsaynöpami sobrinun Lottapis imaykankunatawan kutitsimurqan. Warmitapis olqutapis prësu apashqantaqa kutitsimurqanmi.
Abramta Melquisedec bendicionta qoshqan
17 Quedorlaomerta y payta yanapaq reykunata vinciykur Abram kutiykämuptinmi Sodoma markapa mandaqnin rey tariparqan Save pampaman. Tsay pampapa jukaq jutinmi kaykan Mandaq Reypa Pampan.
18 Tsawraqa Salem markapa mandaqnin rey Melquisedecpis tsayman chayaykurmi Abramta qararqan tantata y vïnuta. Melquisedecqa poderniyuq Tayta Diosta sirviq cürami karqan.*
19 Nirkurmi Abramta bendicionta qoshpan Melquisedec kayno nirqan:“Jana patsata y kay patsata kamaq poderniyuq Tayta Dios bendicionninta qoykuläshunki.
20 Poderniyuq Tayta Dios alabashqa kaykulätsun.Paymi yanapashushqanki contrapartiki runakunata vincinaykipaq”.
Tsayno niptinmi Abram qechurkur kutitsimushqanpita Melquisedecta *diezmuta qoykurqan.*
21 Sodomapa mandaqnin reynami Abramta kayno nirqan: “Marka mayïkunataqa kachapaykamay. Tsaypita kaqtaqa imaykatapis apakuy”.
22 Tsayno niptin Abram kayno nirqan: “Jana patsata y kay patsata kamaq poderniyuq TAYTA DIOSPA jutincho jurarmi nishqä
23 qampa kaqtaqa juk hïlulaykitapis ni lanqi watulaykitapis mana apanäpaq. Tsaynöpami alabakuykankinatsu kayno nir: ‘Noqapitami Abrahamqa rïcuyashqa kaykan’.
24 Ashmaynï runakuna mikushqalanna katsun. Aywäshimaq runakuna Aner, Escol y Mamrimi itsanqa derëchunta apakärinqa”.
Ichic wilacuycuna
^ Kachi Lamar Kachi Lamarqa (Gén. 14.3; Núm. 34.3) chusku pachak ishkay kimsa (423) metru bajo el nivel del marmi kaykan. Anchunmi chunka pusaq kilömetru kaykan y largunnami pusaq chunka (80) kilömetru. Kachi Lamarmanqa Jordán mayumi yaykuykan. Maypapis yaku mana yarquptinmi tsay lamarqa pasaypa pochquq kaykan. Tsaymi ima jachapis ni ima pescädupis tsaycho kantsu. Kachi Lamarpa jukaq jutinmi kaykan Arabá Lamar (Deut. 3.17; Jos. 3.16) y jukaq jutinnami kaykan inti jeqamunan kaq lädu qocha (Eze. 47.18; Zac. 14.8). Kananqa runakuna reqipäkun Mar Muerto jutiwanmi.
^ 14.10 Breaqa yana mituno pasaypa sinigami kaykan.
^ 14.18 Hebreo idiömacho kaynömi nin: Melquisedecqa El-Eliónta sirviq cürami karqan. El-Eliónqa Tayta Diospa jukaq jutinmi karqan. Tsaynölami nin Gén. 14.19-20, 22 versïculukunachöpis.
^ diezmu Diezmuqa cada chunkapita jukta Tayta Diospaq rakishqanmi kaykan. Tsaytaqa rakin qellaypita, uywakunapita y mikuykunapitami (Gén. 14.17-20; Deut. 14.22; Mat. 23.23).
