Génesis 15:1-21
15 Tsaypitanami Abramta revelar TAYTA DIOS kayno nirqan: “Abram, ama mantsariytsu. Noqami tsapäshuqniki escüdu kaykä. Qammanmi bendicionnïta churamushaq”.
2 Tsayno niptinmi Abram kayno nirqan: “TAYTA DIOS, tsurïpis mana kaykaptinqa manakaqlapaqchari imaykatapis kamaripämanki. Wanukuptïqa lapan imaykäkunawanpis Damascupita ashmaynï Eliezerlachari quëdanqa.
3 Tsuriynaq kanäpaq destinamashqa kaykaptikiqa makïcho yuriq ashmaynilächari imaykäwanpis quëdanqa”.
4 Tsayno niptin TAYTA DIOS kayno nirqan: “Manami ashmaynikitsu imaykaykikunawanpis quëdanqa, sinöqa kikikipa tsurikimi”.
5 Nirkurnami Abramta waqtaman pushaykur TAYTA DIOS kayno nirqan: “Jana patsata rikay. ¿Qoylarkunata yupayta kamäpakunkiku?”
Nirkurmi kayno nirqan: “Tsaynömi qampita miraqkunapis yupayta mana atipaypaq kanqapaq”.*
6 Tsayno nishqanta Abram criyiptinmi jutsaynaqtana TAYTA DIOS chaskirqan.*
7 Tsaypitanami TAYTA DIOS kayno nirqan: “Noqaqa TAYTA DIOSMI kaykä. Caldeo runakuna tashqan Ur markapitami jorqamurqä kay rikatsishqä chakrakunata qamta qoykunäpaq”.
8 Tsayno niptin Abram kayno nirqan: “TAYTA DIOS, ¿imanöpataq musyashaq kay rikatsimashqayki parti rasunpa noqapaq kashqanta?”
9 Tsayno niptinmi TAYTA DIOS kayno nirqan: “Apamuy juk ternërata, juk cabrata y juk carnita. Tsay uywakuna katsun kimsa watayuq. Tsaynöpis apamuy juk kulkushta y juk pushapa palumata”.
10 Tsayno niptinmi Abram aparqan tsay uywakunata. Nirkur pulanpa cuartutsaykur churarqan wak läduman kay läduman.* Palumata y kulkushtami itsanqa mana cuartutsarqantsu.
11 Tsay churashqan aytsakunata mikunanpaq wiskulkuna shamuptinmi Abram washäkurqan.
12 Patsa tsakaykaptinnami Abram wanuypanöraq punukäkurqan. Tsaymi sueñuynincho pasaypa yanawyaykaq tsakayta rikar fiyupa mantsakarqan.
13 Tsay hörami TAYTA DIOS kayno nirqan: “Qampita miraqkunami chusku pachak (400) wata juk markacho jäpa runakunapa ashmaynin kar nakapäkunqa.*
14 Tsayno kaptinpis tsay marka runakunatami castigashaq. Nirkurnami qampita miraqkunata imaykayuqtana jorqamushaq.*
15 Manaraq tsaykuna pasaptinmi qamqa awkinyaypa wanushpayki unay ayluykikuna kaqman aywakunkipaq.
16 Chusku pachak wata pasarkuptinnami qampita miraqkuna kay taykashqaykiman kutipäkamunqa. Kutimunanpaqqa kaycho taykaq amorreo runakunapa jutsankuna aypämushqanami kanqa”.
17 Patsa tsakarpuptinnami qoshtaykaq shanshayuq kanala y qerupa puntancho rupaykaq ninapis yurirkurqan. Tsaykunami churaraykaq aytsa chawpinpa pasarqan.*
18 Tsay junaqmi Abramwan *pactuta rurar TAYTA DIOS kayno nirqan: “Kay tashqayki partita qampita miraqkunatami qoykushaq. Lindërunmi kanqa Egipto mayupita Éufrates jatun mayuyaq.*
19 Tsaychömi taykan ceneo runakuna, cenezeo runakuna, cadmoneo runakuna,
20 heteo runakuna, ferezeo runakuna, refaíta runakuna,
21 amorreo runakuna, cananeo runakuna, gergeseo runakuna y jebuseo runakunapis”.
Ichic wilacuycuna
^ 15.5 Rom. 4.18; Heb. 11.12.
^ 15.10 Jer. 34.18-19.
^ 15.13 Éxo. 1.1-14; Hech. 7.6.
^ 15.14 Éxo. 12.36; Hech. 7.7.
^ 15.17 Tsay witsan tsaycho taq runakunapa costumbrin kaynömi karqan: Imatapis promitishqanta cumplinanpaq parlarqa uywakunatami pulanpa cuartutsaykur wak läduman kay läduman churarqan. Nirkurnami tsay aytsa chawpinpa pasaq kayno nir: “Noqatapis ishkayman kutsumätsun promitishqäta mana cumpliptïqa”. Tsaymi qoshtaykaq shanshayuq kanala y qerupa puntancho rupaykaq nina aytsa chawpinpa pasaykaqta rikar Abram tantiyarqan kikin Tayta Dios tsaypa pasaykashqanta. Tsayno pasarmi Abramta Tayta Dios tantiyatsirqan promitishqanta cumplinanpaq.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
