Génesis 18:1-33
18 Mamre runapa chakran encina yörakuna kashqancho taykaptinmi Abrahamta TAYTA DIOS yuriparqan. Tsay hörami aläpa shanaptin toldun punkucho Abraham lantukur jamaraykarqan.
2 Tsaychömi Abraham elaqpita rikarqan kimsa runakuna ichiraykaqta. Tsaymi chaskikunanpaq* apurädu aywar nawpanman qonqurpakuykur
3 kayno nirqan: “Pasakunaykipaqpis jamapäriyraq, taytakuna. Juklaqa ama pasakuytsu.
4 Yakuta apatsimushaq chakikita maylakärinaykipaq. Nirkur kay yöra sikilanchöpis jamapärishun.
5 Wamaqlanta chayamuynikita imalatapis yanukaratsimushaq. Mikukurkurnami pasakärinkipaq”.
Tsayno niptin paykuna kayno nirqan: “Alichari kanman, tayta”.
6 Tsawraqa Abraham warakayla toldunman yaykuykur Sarata kayno nirqan: “Ishkay chunka (20) kïlu mas alinnin harinapita tantata jukla ruramuy”.
7 Tsaypitanami Abrahamqa wäkankuna kaqman jukla aywar werannin turituta apamurqan. Nirkurmi ashmayninta mandarqan pishtarkur jukla yanukunanpaq.
8 Nirkurnami mantequïllata, lëchita y yanukatsishqan aytsata apaykur yöra sikincho jamaraykaq qorpankunata qararqan. Paykuna mikuptinmi alcäbula kaykarqan imatapis munashqanta kamaripänanpaq.
9 Mikurkurnami Abrahamta tapupäkurqan kayno nir: “¿Maychötaq kaykan warmiki Sara?”
Tsawraqa Abraham kayno nirqan: “Toldu rurinchömi kaykan”.
10 Tsayno niptinmi juknin kayno nirqan: “Watan kananno watukuq kutimuptï rasunpami olqu wawayuqna warmiki Sara kaykanqa”.*
Punku waqtalancho jamararmi Saraqa tsayno rimashqanta mayarqan.
11 Abraham y Saraqa chachanami kapäkurqan. Chakwanna kaptin killa qeshyanpis unaynami chawarqan.
12 Tsayno parlashqanta mayarmi Saraqa kayno nir shonqulancho asikurqan: “Chakwanna kaykarqa y runäpis awkinna kaykaptinqa ¿imanöpataq wawata tarïman?”
13 Tsawraqa Abrahamta TAYTA DIOS kayno nirqan: “¿Imanirtaq asikushqa Sara? ¿Imanirtaq yarpaykan chakwanna kashpan wawata manana tarinanpaq kashqanta?
14 ¿Imalaqa sasa kantsuraq noqapaq? Watan kananno watukuq kutimuptï rasunpami olqu wawayuqna Sara kaykanqa”.*
15 Tsayno nishqanta mayaykur Sara fiyupa mantsakashpan kayno nirqan: “Noqaqa manami asikushqätsu”.
Tsayno niptin TAYTA DIOS kayno nirqan: “Noqa musyämi asikushqaykita”.
Sodoma markapaq Tayta Diosta Abraham manakushqan
16 Nirkurnami qorpankuna* Sodoma markapa pasakurqan. Abrahampis paykunata yanaqarmi karuyaqraq aywarqan.
17 Aywaykashqanchömi TAYTA DIOS yarpachakurqan kayno nir: “Imata ruranäpaq yarpaykashqätapis ¿manatsuraq Abrahamta wiläman?
18 Paypita miraqkunaqa jatun nacionmi kanqapaq. Tsaynöpis paypitami kay patsacho lapan casta runakunapis bendicionnïta chaskipäkunqa.
19 Paymi tsurinkunata y paypita miraqkunatapis munashqäno imaypis kawapäkunanpaq yachatsinqa. Tsaypaqmi payta akrashqä. Tsayno ruraptinmi Abrahamta promitishqäkunata lapanta cumplishaq”.
20 Tsayno yarpachakurirmi Abrahamta TAYTA DIOS kayno nirqan: “Sodomacho y Gomorracho taq runakunapaqmi maytsay runakunapis rimapäkun pasaypa jutsasapa kashqanta.
21 Tsaymi kanan aywaykä runakuna nishqanno jutsayuq kashqanta o jutsaynaq kashqantapis musyanäpaq”.
22 TAYTA DIOSWAN Abraham parlashqanyaqmi ishkay kaq qorpankunaqa Sodomaman nawpakurqan.
23 Nawpanman witiykushpanmi TAYTA DIOSTA Abraham tapurqan kayno nir: “Jutsasapa runakunata ushakätsirqa ¿jutsaynaq kaqkunatapis ushakätsinkitsuraq?
24 Tsay jatun markachöqa capazchari pitsqa chunkalapis (50) jutsaynaq runakuna kaykan. Pitsqa chunka jutsaynaq runakuna kaptinqa ¿tsay markata mana kuyapaypatsuraq ushakätsinkiman?
25 Jutsaynaq runakunatawan jutsasapa runakunata iwal ama ushakaykatsilaytsu, Tayta. Kay patsacho taq lapan runakunapa jueznin kaykarqa jutsaynaq runakunatapis ¿ushakätsinkimantsuraq?”
26 Abraham tsayno ruwakuptinmi TAYTA DIOS kayno nirqan: “Sodoma markacho pitsqa chunka jutsaynaq runakunata tarirqa manami tsay markata ushakätsishaqtsu”.
27 Tsawraqa Abraham kayno nirqan: “Yapay tapuptï ama rabyakuykulaytsu, Tayta. Noqaqa polvuno y uchpanölami kä.
28 Pitsqa chunka jutsaynaq runakuna kananpaq capazchari pitsqalapis pishiykan. ¿Tsayla pishiykaptintsuraq tsay markata ushakaykatsinkiman?”
Tsayno ruwakuptinmi TAYTA DIOS kayno nirqan: “Chusku chunka pitsqata (45) jutsaynaq runakunata tarirqa manami ushakätsishaqtsu”.
29 Yapay Abraham kayno nirqan: “Capazchari chusku chunkalapis (40) jutsaynaq runakunaqa tsaycho karkaykan”.
Tsayno niptinmi TAYTA DIOS kayno nirqan: “Jutsaynaq runakunata chusku chunkalatapis tarirqa manami ushakätsishaqtsu”.
30 Yapaymi Abraham ruwakurqan: “Tsaynöla yaparir yaparir ruwakuptï ama rabyakuykulaytsu, Tayta. Capazchari kimsa chunkalapis (30) jutsaynaq runakuna kaykan”.
Tsayno niptinmi TAYTA DIOS nirqan: “Jutsaynaq runakunata kimsa chunkalatapis tarirqa manami tsay markata ushakätsishaqtsu”.
31 Abraham yapay nirqan: “Masta tapukuptï ama rabyaykulaytsu, Tayta. Ishkay chunkalatapis (20) jutsaynaq runakunata tarishpaykiqa ¿ushakätsinkimantsuraq?”
Tsayno niptin TAYTA DIOS nirqan: “Ishkay chunkalatapis tarirqa tsay runakunata manami ushakätsishaqtsu”.
32 Yapaypis Abraham tapurqan: “Yaparir yaparir tapuptï ama rabyaykulaytsu, Tayta. Kananlanami tapukushayki. Chunkala jutsaynaq runakuna kaptinqa ¿imatataq ruranki?”
Niptinmi TAYTA DIOS nirqan: “Tsay markacho chunkalatapis jutsaynaq runakunata tarirqa manami ushakätsishaqtsu”.
33 Abrahamwan parlayta usharkurmi TAYTA DIOS aywakurqan. Abrahamnami tashqan kaqman kutikurqan.
Ichic wilacuycuna
^ 18.14 Jer. 32.27; Luc. 1.37; Rom. 9.9.
^ 18.16 Tsay kimsa qorpakunaqa manami runakunatsu karqan, sinöqa ishkay angilkunawan Tayta Diosmi. Tsayta musyanaykipaq liyinki Gén. 18.17; 19.1.
