Génesis 26:1-35
26 Tsay witsanmi fiyupa muchuy karqan. Tsay karqan Abraham kawashqan witsan kashqannömi.* Tsayno kaptinmi Gerar markaman Isaac aywakurqan. Gerarchömi filisteo runakunapa mandaqnin rey Abimelec tarqan.
2 Tsaychömi TAYTA DIOS yuriparkur Isaacta kayno nirqan: “Egiptuman ama aywaytsu. Tänaykipaq nishqä partilachöraq
3 jäpa runano täkuykay. Noqaqa imaypis qamwanmi kaykäshaq.* Tsaynöpis qamta bendicionnïta qoshpämi qampita miraqkunata kay intëru jalqakunata y raqrakunata qoykushaqpaq. Tsaynöpami cumplishaq papäniki Abrahamta promitishqäta.
4 Qoylarkunanöpis yupayta mana atipaypaq kananpaqmi qampita miraqkunaman bendicionnïta churashaq. Paykunatami qoykushaqpaq intëru kay jalqakunata y raqrakunata. Paykunapitami pïmay runakunapis bendicionnïta chaskinqapaq.*
5 Tsayno kanqa mandamientükunata, leynïkunata y yachatsishqäkunata Abraham cumplishqanpitami”.
6 Tayta Dios tsayno niptinmi Isaacqa Gerarcho tarqan.
7 Tsaycho taq runakunami Isaacta tapurqan Rebeca iman kashqantapis. Rebeca kuyaylapaq kaptinmi Isaac yarparqan warmin rayku runakuna wanutsinanpaq kashqanta. Tsaymi mana wilakurqantsu Rebeca warmin kashqanta. Rasun kaqta ninanpa trukan “payqa panïmi” nirqan.
8 Tsaypita juk tiempu pasarkuptinnami filisteo runakunapa mandaqnin rey Abimelec ventänanpa rikachakuykashqancho rikarqan Rebecata Isaac kuyar shulwapaykaqta.*
9 Tsayno rikaykurmi Isaacta qayaykatsir Abimelec kayno nirqan: “Payqa warmikimi kashqa ¿aw? Warmiki kaykaptinqa ¿imanirtaq ‘panïmi’ nirqayki?”
Tsaymi Isaac kayno nirqan: “Tsayno nishqä warmï rayku wanutsipäkamänanpaq kashqanta yarparmi, tayta”.
10 Tsayno niptinmi Abimelec kayno nirqan: “¿Imanirtaq tsaynöqa lulapämashqanki? Jinachi mayqan runapis warmikiwan pununman karqan. Tsayno lulapämar jinachi jutsata ruratsipäkamankimanpis karqan”.
11 Tsaypitanami lapan runakuna musyananpaq Abimelec kayno nirqan: “Kay runata o warminta pipis achäquita ashipaq kaqqa wanutsishqami kanqa”.
12 Tsay watami Isaacqa tsaycho murukurqan. TAYTA DIOS bendicionninta churaptinmi shuntaytapis mana atipashqanyaq mikuynin wayurqan.
13 Tsaynöpa Isaac pasaypa rïcuyaptinmi imaykanpis atska karqan.
14 Uyshankunapis, cabrankunapis y wäkankunapis atskamanmi mirarqan. Chakranta arupänanpaq ashmayninkunapis tsaytsikami karqan. Tsayno rïcuyaptinmi filisteo runakunaqa chikishpan
15 Isaacpa taytan Abraham uchkutsishqan yaku pözukunata pampapäkurqan.
16 Tsaypitanami Isaacta Abimelec kayno nirqan: “Kaypita aywakuy. Noqakunapita masmi rïcuyashqanki”.
17 Tsayno niptinmi Isaac aywakur Gerar raqra nawpan pampachöna tarqan.
18 Tsayman chayaykurmi taytan Abraham uchkutsishqan pözukunata Isaac pitsatsirqan. Tsay pözukunatami Abraham wanuykuptin filisteo runakuna pampatsashqa karqan. Pitsarkatsirnami jutinta Isaac churaparqan taytan churapashqannöla.
19 Tsay pampacho mushuq pözuta oqtiykashqanchömi Isaacpa ashmayninkuna chuya yakuta tarirqan.
20 Tsaymi Gerarcho taq uysha mitsiqkunawan Isaacpa uysha mitsiqninkuna yakuta qechunakur pelyapäkurqan. Tsaypitami Isaac tsay pözupa jutinta churaparqan Esek* jutin kananpaq.
21 Tsaypita Isaacpa ashmayninkuna juktana yaku pözuta oqtitsirqan. Tsay jananpis yapaymi pelyarqan. Tsaymi tsay pözupa jutinta Isaac churaparqan Sitna* jutin kananpaq.
22 Tsayno pelyaptinmi juk lädupana aywakur tsaychöpis pözuta oqtitsirqan. Piwanpis tsay janan mana pelyarnami jutinta churaparqan Rehobot* jutin kananpaq. Tsaymi nirqan: “Kananmi itsanqa TAYTA DIOS yanapaykämantsi kaycho jawkana täkunantsipaq. Tsaymi wamrantsikunapis uywantsikunapis atskaman miranqapaq”.
23 Tsaycho taykashqanpitami Beersebaman aywakurqan.
24 Tsayman chayashqan tsakaymi TAYTA DIOS yuriparkur Isaacta kayno nirqan:“Noqami kaykä papäniki Abraham yärakushqan Dios.Qamwan kaykaptïqa ama mantsakuytsu.Sirvimaqnï Abrahamta promitishqa karmi bendicionnïta qoykushayki.Tsaynölami qampita miraqkunatapis bendicionnïta qoykushaqpaq atskaman mirananpaq”.
25 Tsaychömi *altarta perqarkur Isaacqa TAYTA DIOSTA adorarqan. Tsaycho taptinmi ashmayninkuna juk pözuta uchkurqan yakuta jorqunanpaq.
Isaacwan Abimelec promitinakushqan
26 Juk kutichömi Abimelec aywarqan Gerar markapita Isaacwan parlananpaq. Abimelecwanmi* aywarqan yätsiqnin Ahuzat y soldädunkunapa mandaqnin Ficolpis.
27 Chayaykuptinmi Isaac kayno nirqan: “Ajayämar markaykipitapis qarqaykämarqa ¿imapaqtaq shapäkamushqanki?”
28 Tsayno niptinmi paykuna kayno nirqan: “Noqakuna tantiyakärishqä qamta TAYTA DIOS imachöpis yanapaykäshushqaykitami. Tsaymi *pactuta ruranantsipaq shapäkamushqä.
29 Kanan promitimay imaypis ali kawanantsipaq. Manami qamkunata chikipäkushqätsu, tsaypa trukanqa imaypis alimi kawarqantsi. Yarqakamurpis jawkalami shapäkamurqayki. Qamtaqa TAYTA DIOSMI imaykachöpis yanapaykäshunki”.
30 Tsayno niptinmi ali alita Isaac yanukatsir paykunawan mikurqan y upurqan.
31 Waraynin* tutanami Abimelecwan Isaac promitinakurqan ali kawapäkunanpaq. Nirkurnami Isaac kaqpita kushishqa kutikärirqan.
32 Tsay junaqmi Isaacpa ashmayninkuna wilarqan uchkupäkushqan pözucho yaku kaykaqta.
33 Tsaymi tsay pözupa jutinta Isaac churaparqan Seba* jutin kananpaq. Tsaypitami kananyaqpis tsay markapa jutin kaykan Beerseba.*
Esaúpa warminkuna
34 Esaú chusku chunka (40) watayuq kaykashpanmi Beeripa tsurin Juditwan tarqan. Beeriqa heteo runami karqan. Tsaynölami Esaú tarqan Elónpa tsurin Basematwanpis. Elónpis heteo runami karqan.
35 Tsay warmikunawan Esaú taptinmi Isaac y Rebeca pasaypa rabyanarqan.
Ichic wilacuycuna
^ 26.1 Gén. 12.10.
^ 26.3 Gén. 26.24; 28.15; 31.3; 39.2.
^ 26.4 Gén. 12.1-3; 13.14-15; 15.18-21; 22.16-18.
^ 26.8 Wakin runakunaqa wayluykaqta nipäkun.
^ 26.20 Esek ninanqa pelyatsikuq ninanmi.
^ 26.21 Sitna ninanqa chikinakuy ninanmi.
^ 26.22 Rehobot ninanqa jawka y tranquïlu ninanmi.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 26.26 Gén. 21.22.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 26.31 Wakin runakunaqa warantin nipäkun.
^ 26.33a Seba ninanqa juramentu ninanmi.
^ 26.33b Beerseba ninanqa Juramentu Pözu ninanmi.
