Génesis 29:1-35
29 Tsayno aywarmi Jacob chayarqan inti jeqamunan läducho taq runakuna kashqanman.
2 Tsay jirkachömi pözuta rikarqan. Tsay pözupa nawpanchömi kimsa punta uyshakuna y cabrakuna kaykarqan. Lapan uywakunapis tsay pözupitami yakuta upupäkuq. Tsay pözutaqa jatunkaray läja rumimi tsapararqan.
3 Tsay läjataqa lapan mitsikuqkuna chayaykurmi kichapäkuq uyshankuna y cabrankuna yakuta upunanpaq. Yakuta upurkuptinnami yapay läja rumiwan tsaparkuq.
4 Tsaycho kaykaq runakunawan tinkurmi Jacob tapurqan kayno nir: “Taytakuna, ¿maypitataq kanki?”
Tsawraqa kayno nipäkurqan: “Haránpitami karkaykä”.
5 Tsawraqa Jacob kayno nirqan: “Qamkuna paqta reqinki Nacorpa wilkan Labánta”.
Tsayno niptinmi kayno nipäkurqan: “Aw, reqipäkümi”.
6 Yapaypis Jacob tapurqan: “¿Alitsuraq kaykälan?”
Tsawraqa mitsikuqkuna nirqan: “Aw, Labánqa alimi kaykan. Taqay uyshankuna y cabrankuna qatishqa aywaykämuq jipashqa Labánpa tsurin Raquelmi”.
7 Tsawraqa Jacob kayno nirqan: “Inti jatunraq kaykaptinqa ¿imanirtaq uyshakunatapis y cabrakunatapis ayluraykätsinki? Yakuta upurkatsir yapay mitsiyraq”.
8 Tsaymi kayno nipäkurqan: “Mitsikuq mayïkuna chayamunantaraqmi shuyarpaykä. Shuntakarkurraqmi pözu tsaparaq rumita wititsipäkü”.
9 Tsayno parlarkaykaptinmi Raquel chayarqan papäninpa uyshankunata y cabrankunata qatishqa. Raquelqa karqan uyshakunata y cabrakunata mitsikuqmi.
10 Uywankunata qatishqa prïman Raquel chayaykaqta rikarmi Jacobqa pözu kaqman aywaykur tsaparaykaq rumita wititsirqan. Nirkurmi uyshakunata y cabrakunata yakuta uputsirqan.
11 Tsaypitanami Jacobqa Raquelta winchikushpan mutsarqan.* Tsaycho reqinakurmi kushikuypita waqarqan.
12 Nirkurmi Jacob wilarqan Rebecapa wawan y Labánpa sobrinun kashqanta. Tsayta musyarmi Raquel warakayla aywarqan papänin Labánta wilananpaq.
13 Paninpa wawanwan tinkushqanta wilaykuptinmi Labánqa warakayla aywarqan tinkunanpaq. Tinkurkurnami kushikushpan makalakurkur mutsarqan. Wayinman pushaykuptinmi Jacob wilarqan ima pasashqantapis.
14 Tsayno wilapaptinmi Labán kayno nirqan: “¡Rasunpami qamqa aylü kaykanki!”
Raquelpaq y Leapaq kashqa Jacob arupashqan
Tsaycho juk killa Jacob arupar täparaykaptinnami
15 Labán kayno nirqan: “Aylü karpis manami walälaqa arupämankimantsu. Wilamay arushqaykipita aykata päganäpaqpis”.
16 Labánpaqa ishkaymi jipash tsurinkuna karqan. Qechpa kaqpa jutinmi karqan Lea. Shulka kaqpa jutinnami karqan Raquel.
17 Lea kuyaylapaq nawiyuq kaptinpis Raquelmi mas kuyaylapaqqa karqan.
18 Raquelta kuyarmi Jacobqa Labánta kayno nirqan: “Shulka kaq tsuriki Raquelpaq qanchis wata arupäshayki, papä”.
19 Tsaymi Labán kayno nirqan: “Tsurïta jäpa runawan tätsinäpa trukanqa alimi kanman qamwan tätsiptï. Tsayno kaptinqa kaylachöna täkushun”.
20 Tsaymi tiyun Labánta Jacob aruparqan qanchis wata Raquelpaq kashqa. Raquelta pasaypa kuyaptinmi qanchis wata manapis aykälata pasarirqan.
21 Qanchis watata cumplirkurnami Labánta Jacob kayno nirqan: “Arupänäpaq parlashqantsita cumplishqänami, tayta. Kananqa tsurikiwan tätsimayna”.
22 Tsayno niptinmi Labánqa lapan reqinakushqan runakunata qayatsirqan casaray fiestaman.
23 Tsay tsakaymi tsurin Leata pusharkur Jacobta mana musyatsiylapa oqlaparkurqan. Tsaymi Leawan Jacob punurqan.
24 Leapa ashmaynin kananpaqmi Labánqa entregaykurqan Zilpa jutiyuq jipashta.
25 Patsa wararkuptinnami Jacobqa tantiyarqan Leawan punushqanta. Tsaymi Labánta kayno nirqan: “¿Imanirtaq kayta ruramashqanki? Raquelpaq kashqa arupaykaptïqa ¿imanirtaq Leata oqlaparkamashqanki?”
26 Tsayno niptinmi Labán kayno nirqan: “Kaychöqa qechpa kaqraqmi puntata runawan tan. Tsaypitaraqmi shulka kaqqa runawan tan.
27 Juk semänayaqraq Leawan tay. Tsaypitaqa Raqueltapis entregashaykichari yapay qanchis wata mas arupämänayki kaptinqa”.
28 Tsayno niptinmi Jacob awnirqan qanchis wata mas arupänanpaq. Leawan tashqan semänarkuptinnami Labánqa tsurin Raquelwanpis tätsirqan.
29 Raquelpapis ashmaynin kananpaqmi Bilha jutiyuq jipashta qoykurqan.
30 Tsaypitanami Jacob Raquelwanpis punurqan. Leata kuyashqanpita Raquelta mas kuyarmi tiyun Labán nishqannöla yapay qanchis wata aruparqan.
Jacobpa tsurinkuna yurishqan
31 Jacob mana kuyashqanta rikarmi TAYTA DIOS destinarqan Lea wawayuq kananpaq. Raqueltami itsanqa qoluqyätsirqan.
32 Lea qeshyaq rikakurmi wacharqan olqu wamrata. Yuriptinmi kayno nirqan: “Lakikuptïmi TAYTA DIOS kuyapämashqa wawayuq kanäpaq. Kananmi itsanqa runä kuyamanqa”.
Tsaymi wamranpa jutinta churaparqan Rubén* jutin kananpaq.
33 Tsaypita yapay Leapa wawan yurirqan. Tsaymi kayno nirqan: “TAYTA DIOSMI rikamashqa runä mana kuyamashqanta. Tsaymi yanapamashqa yapay wawayuq kanäpaq”.
Tsayno nirmi wamranpa jutinta churaparqan Simeón* jutin kananpaq.
34 Tsaypita yapaymi Leapa olqu wawan yurirqan. Tsaymi kayno nirqan: “Kimsatana tsurinta wachaykaptïqa noqalatanami runä kuyamanqa”.
Tsayno nirmi wamranpa jutinta churaparqan Leví* jutin kananpaq.
35 Tsaypita mas jukpis Leapa wawan karqanraqmi. Yuriptinmi kayno nirqan: “Kananqa TAYTA DIOSTAMI alabashaq”.
Tsayno nirmi wamranpa jutinta churaparqan Judá* jutin kananpaq. Tsaypitaqa wawan manami karqannatsu.
Ichic wilacuycuna
^ 29.11 Paykunapa costumbrinchöqa imaypis winchinakur qaqlancho mutsanakäriqmi.
^ 29.32 Rubén ninanqa olqu wawäta rikay ninanmi. Tsaynöpis nakashqätami rikamashqa ninanmi.
^ 29.33 Simeón ninanqa Tayta Diosmi rikashqa ninanmi.
^ 29.34 Leví ninanqa kuyan ninanmi.
^ 29.35 Judá ninanqa alabanza ninanmi.
