Génesis 34:1-31
34 Leapa wawanmi karqan Dina. Paymi tsay läducho taq jipashkunata watukuq aywarqan yanasan kaptin.
2 Heveo runa Hamorpa tsurinmi karqan Siquem. Hamorqa karqan tsaycho taq runakunapa autoridäninmi. Siquemqa Dinata rikaykurmi pasaypa munapashpan tsaripakurqan.
3 Nirkurnami Siquemqa Dina kuyananpaq imaykanöpapis shonqunman yakuyta munarqan.
4 Tsaymi Siquemqa Hamorta kayno nirqan: “Papä, tsay jipashta warmïpaq ashipaykalämay”.
5 Jacobtami wilarqan tsurin Dinata Siquem tsaripakushqanta. Tsayno kaptinpis tsurinkuna uywankunawan jirkacho kaptinmi paykuna kutimunanyaq upälakurqan.
6 Tsayyaqmi Siquempa papänin Hamor aywarqan Jacobwan parlananpaq.
7 Jacobpa tsurinkuna jalqapita kutiykamurmi paninta Siquem tsaripakushqanta musyaykur fiyupa rabyakärirqan. Tsayno tsaripakushqan pasaypa penqaypaqmi karqan. Tsaytaqa imaypis ama ruraykunmantsu karqan.
8 Tsaymi paykunawan parlar Hamor kayno nirqan: “Tsurï Siquemmi panikipaq pasaypa löcutashqa puriykan. Tsaymi shamushqä tsurïwan panikita tätsinantsipaq.
9 Tsaynöpami compädrita rurar juk aylunölana kashunpaq. Tsaymi tsurïkunapis qamkunapa warmi tsurikikunawan tanqa y qamkunapapis noqakunapa tsurïkunawan tanqapaq.
10 Kaylachöna täkushun. Täkärinaykipaq munashqaykita maynintapis akrakuy. Tsaynöpis ima negociulatapis rurakur chakraykitapis rantipäkuy”.
11 Tsaynölami Siquempis Dinapa papäninta y turinkunata kayno nirqan: “Panikita awniykalämay, taytakuna. Awnimaptikiqa imatapis munashqaykitami qoykuläshayki.
12 Panikita awnimaptikiqa costumbri kashqanpita masta manamaptikipis kamaripäshaykimi. Imaykanöpapis noqa munä panikita awnipäkamänaykitami”.
13 Tsayno niptinmi paninta tsaripakushqanpita Jacobpa tsurinkuna rabyashqa kar Siquemta y papänin Hamorta janan shonqula awnipäkurqan.
14 Tsaymi kayno nirqan: “Noqakunaqa manami panïta tätsïmantsu *señalaküni runawanqa. Señalaküni runa mashä karqa penqaypaqmi kanqa.
15 Noqakuna señalakushqa kashqäno qamkunapis lapan olqukuna señalakunayki kaptinqa panïta awnishaykimi.
16 Señalakuptikiqa tsurikikunata warmi tsurïkunawan tätsishunmi. Tsaynölami warmi tsurikikunawan tsurïkunata tätsishun. Tsaynöpami lapantsipis tsay aylunöla kashunpaq.
17 Nishqäno mana señalakäriptikiqa panïta pushakurkurmi aywakärishaqpaq”.
18 Tsayno niptinmi Hamor y tsurin Siquemqa paykuna nishqanno señalakunanpaq awnirqan.
19 Tsaypita aywakurmi Dinata kuyashpan Siquemqa jukla cuerpunta señalakurqan. Payqa karqan papäninpa ayluncho mas respitädu mözumi.
20 Tsaypitami papänin Hamorwan aywarqan marka yaykuna punkuman. Tsaychömi runakunata kayno nipäkurqan:
21 “Jacob aylu runakunaqa ali runami karkaykan. Paykuna kaycho tänanpaq jirkantsikunapis y chakrantsikunapis jäkuykanmi. Tsayno kaykaptinqa kaycho täkushpan ima negociutapis rurakäritsun. Tsaynöpami warmi tsurinkunawan tsurintsikunata tätsishunpaq y paykunapis warmi tsurintsikunata tsurinkunawan tätsinqapaq.
22 Itsanqa tsay aylunöla kanantsipaq paykuna munan señalakushqa kashqanno noqantsipis olqu kaqkuna señalakunantsitami.
23 Paykuna nishqanta awniptintsiqa noqantsiwanmi kaycho tanqapaq. Tsaynöpami lapan imaykankunapis y uywankunapis noqantsipaqna kanqa”.
24 Tsayno niptinmi tsaycho juntakaq runakuna awnirqan Hamor y Siquem nishqanta. Tsaymi lapan olqukuna cuerpunta señalakurqan.
25 Tsaypita kimsa junaqtami markaman yaykurqan Dinapa turinkuna Simeón y Leví. Cuerpunta señalakushqanpita nanaywan kaptinmi ichipänanpaq valorninpis karqantsu. Tsayno karkaykaptinmi espädawan lapanta wanutsipäkurqan.
26 Tsaynölami Hamorta y tsurin Siquemtapis espädawan wanutsirqan. Nirkurnami Siquempa wayinpita Dinata pushakurkur aywakärirqan.
27 Tsaypitami Jacobpa wakin kaq tsurinkunapis markaman yaykushpan tarirqan lapan runakuna wanushqa jitarpaykaqta. Paninta tsaripakushqanpita tsay markacho tarishqan kaqtaqa imaykantapis apakärirqan.
28 Tsaynöpis apakärirqan uyshakunata, cabrakunata, wäkakunata, bürrukunata y imaykatapis markacho y chakracho tarishqan kaqtaqa.
29 Wayikunacho imaykatapis tarishqanta lapanta aparmi wamrakunata y warmikunatapis prësu apakärirqan.
30 Tsayno rurashqanta musyaykurmi Jacobqa Simeónta y Levíta kayno nirqan: “Kananqa ¿imamantaq jitarpamashqanki? Wanutsipäkushqaykita mayaykurqa cananeo runakuna y ferezeo runakunaqa fiyupami chikipäkamanqa. Paykunaqa wilanakushpan lapantsitachari wanutsimäshunpaq. Ashmaynintsi runakunapis walkala kaykaptinqa ¿imanöpataq ichipäshun?”
31 Tsayno niptinmi paykuna kayno nirqan: “Tsawraqa ¿panïta jinachi *wayrapakuq warmitanöpis tsaripakunqa?”
Ichic wilacuycuna
^ señalakushqan Señalakuyqa chiwlakunanpa punta qaranta kutsurir jorqushqanmi kaykan. Abrahamwan Tayta Dios pactuta rurashqanta yarpashpanmi Israel runakunaqa tsayno señalakärin. Tsaymi olqu wamrakunata yurishqanpita pusaq junaqniyuq kaykaptin señalapäkun. Tsaytami castellänucho “circuncisión” nipäkun (Gén. 17.9-14; Col. 2.11; 1Cor. 7.18-20).
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
