Génesis 36:1-43
36 Kaychömi qelqaraykan Esaúpa tsurinkunapita y paykunapita miraqkunapitapis. Esaúpa jukaq jutinmi karqan Edom.
2 Esaúqa tarqan cananea warmikunawanmi.* Jukaq warminpa jutinmi karqan Ada. Payqa karqan heteo runa Elónpa tsurinmi. Jukaq warminpa jutinnami karqan Aholibama. Payqa karqan heveo runa Zibeónpa wilkan y Anápa tsurinmi.
3 Tsaynöpis Esaú tarqan prïman Basematwan. Basematqa karqan Ismaelpa tsurin y Nebaiotpa paninmi.*
4 Adapa wawanmi karqan Elifaz. Basematpa wawannami karqan Reuel.
5 Aholibamapa wawankunanami karqan Jeús, Jaalam y Coré. *Canaáncho Esaú taykaptinmi paykuna yurirqan.
6 Wawqin Jacobwan taykashqanpitami Esaúqa aywakurqan lapan warminkunata, tsurinkunata y ashmayninkunatapis pushakurkur. Canaáncho taykar imaykankunatapis apakurkurmi aywakurqan.
7 Jacobpis Esaúpis rïculantaq kaptinmi tashqan parti mana ayparqantsu juntu tänanpaq. Uywankunapis tsaytsika kaptinmi qewapis mana ayparqantsu mitsikunanpaq.
8 Tsaynöpami Esaú aylu runakunaqa lapan aywakärirqan Seir jalqakunaman. Esaúpa jukaq jutinmi karqan Edom.
9 Seir jalqakunacho taykarmi Esaú aylukuna atskaman mirapäkurqan. Paykunatami nipäkuq edomita runakuna kashqanta. Kay runakunami karqan Esaúpita miraqkuna:
10 Esaúpa warmin Adacho yurirqan Elifaz.Warmin Basematchönami yurirqan Reuel.
11 Elifazpa tsurinkunami karqan Temán, Omar, Zefo, Gatam y Cenaz.
12 Elifazpa *concubïna warmin Timnachöpis Amalec jutiyuq tsurin karqan. Paykunami karqan Esaúpa y warmin Adapa wilkankuna.
13 Reuelpa tsurinkunami karqan Nahat, Zera, Sama y Miza. Paykunami karqan Esaúpa y warmin Basematpa wilkankuna.
14 Esaúpa warmin Aholibamachönami tsurinkuna karqan Jeús, Jaalam y Coré. Aholibama karqan Anápa tsurin Zibeónpa wilkanmi.
15 Esaúpa qechpa tsurin Elifazpa tsurinkuna mandaqmi karqan. Paykunami karqan Temán, Omar, Zefo, Cenaz,
16 Coré, Gatam y Amalec. Tsay mandaqkunaqa lapanpis karqan Elifazpa tsurinkunami. Paykuna mandaq karqan Edom nacionchömi. Paykunaqa karqan Esaúpa y warmin Adapa wilkankunami.
17 Esaúpa tsurin Reuelpa tsurinkunapis mandaqmi karqan. Paykunami karqan Nahat, Zera, Sama y Miza. Paykunaqa karqan Esaúpa y warmin Basematpa wilkankunami.
18 Esaúpa jukaq warmin Aholibamapa wawankunapis mandaqmi karqan. Paykunami karqan Jeús, Jaalam y Coré. Aholibamaqa Aná jutiyuq runapa tsurinmi karqan.
19 Tsay mandaqkuna lapanpis karqan Esaú aylumi. Esaúpa jukaq jutinmi karqan Edom.
20 Seir partiman Esaú manaraq chayaptinmi horeo runakuna tsaycho tarqan. Paykuna mirapäkurqan Seir jutiyuq runapitami. Seirpa tsurinkunami karqan Lotán, Sobal, Zibeón, Aná,
21 Disón, Ezer y Disán. Paykunami karqan Edomcho Seir aylu horeo runakunapa mandaqninkuna.
22 Lotánpa tsurinkunami karqan Hori y Hemam. Lotánpa paninmi karqan Timna.
23 Sobalpa tsurinkunami karqan Alván, Manahat, Ebal, Sefo y Onam.
24 Zibeónpa tsurinkunami karqan Aja y Aná. Taytan Zibeónpa bürrunkunata mitsiykashqanchömi Aná tarirqan chunyaq jirkacho pukyukunata.
25 Anápa tsurinkunami karqan warmi olqu. Olqu kaqpa jutinmi karqan Disón y warmi kaqpanami Aholibama.
26 Disónpa tsurinkunami karqan Hemdán, Esbán, Itrán y Querán.
27 Ezerpa tsurinkunami karqan Bilhán, Zaaván y Acán.
28 Disánpa tsurinkunami karqan Uz y Arán.
29 Horeo runakunapa mandaqninkuna karqan Lotán, Sobal, Zibeón, Aná,
30 Disón, Ezer y Disán. Tsay runakunaqa juknin jukninpis horeo runakunapa mandaqninmi karqan. Cada aylupa jutinqa mandaqninpa jutin kashqannömi karqan. Tsay aylukunami Seir particho tarqan.
31 Israel nacioncho rey manaraq kaptinmi Edom nacionchöqa reykuna karqan. Kaychömi tsay reykunapa jutinkuna qelqaraykan:
32 Juk rey karqan Beorpa tsurin Bela. Belapa markanmi karqan Dinaba.
33 Bela wanuykuptinnami Zerapa tsurin Jobab rey karqan. Pay karqan Bosra markapitami.
34 Jobab wanuykuptinnami trukan rey karqan Husam. Pay karqan temanita runakuna tashqanpitami.
35 Husam wanuykuptinnami trukan rey karqan Bedadpa tsurin Hadad. Paymi Moab particho wanutsirqan madianita runakunata. Hadadpa markanmi karqan Avit.
36 Hadad wanuykuptinnami trukan rey karqan Samla. Pay karqan Masreca markapitami.
37 Samla wanuykuptinnami rey karqan Saúl. Pay karqan Éufrates mayu nawpancho kaykaq Rehobot markapitami.
38 Saúl wanuykuptinnami rey karqan Acborpa tsurin Baal-hanán.
39 Baal-hanán wanuykuptinnami rey karqan Hadar. Pay karqan Pau markapitami. Hadarpa warminpa jutinmi karqan Mehetabel. Mehetabelqa karqan Matredpa tsurin y Mezaabpa wilkan.
40 Esaúpita miraqkunapa mandaqninkuna karqan Timna, Alva, Jetet,
41 Aholibama, Ela, Pinón,
42 Cenaz, Temán, Mibzar,
43 Magdiel y Iram. Tsay runakunapa jutinkuna kashqannölami mandashqan markakunapapis jutinkuna karqan. Tsaynölami paykunapita miraqkunataqa reqipäkuq mandaqninpa jutilanpa.
Lapan tsay runakunaqa edomita runakunami kaykan.
Ichic wilacuycuna
^ 36.2 Gén. 26.34-35.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ concubïna Concubïnaqa manami runapa legïtimu warmintsu karqan. Concubïnanwanqa manami pakaylapatsu purikurqan, sinöqa warminwannömi tarqan (Jue. 8.31; 19.1-4; 2Sam. 5.13; 15.16; 16.21-22; 20.3; Est. 2.9).
