Génesis 37:1-36
37 Jacobqa papänin tashqan Canaánlachömi tarqan.
José sueñushqankuna
2 Kaychömi qelqaraykan Jacobpita y tsurinkunapitapis. Chunka qanchis watayuq kaykarmi Joséqa papäninpa uyshanta y cabranta mitsirqan Bilhapa y Zilpapa wawan kaq wawqinkunawan. Bilha y Zilpaqa karqan taytanpa ashmay kaq warminkunami. Wawqinkuna mana alita rurapäkushqantami Joséqa papäninta imaypis wilapaq.
3 Awkinyaynincho tsurin José yurishqa kaptinmi Israelqa* wakin tsurinkunapita payta mas kuyarqan. Tsaymi kuyaylapaq alinnin tünicata ruraparqan.
4 Joséta taytan mas kuyaptinmi wawqinkunaqa pasaypa chikir rabyashqala parlapaq.
5 Juk kutichömi sueñushqanta José wilaparqan wawqinkunata. Tsaymi wawqinkunaqa masraq chikipäkurqan.
6 Wilaparmi kayno nirqan: “Sueñushqäta wilapäshayki.
7 Sueñuynïchömi chakracho trïguta liyakuykashqantsi. Noqa liyakushqä tersümi kikilan ichirkushqa. Qamkunapa tersuykimi ichiraykaq tersüta adoraqno jiruruparaykashqa”.
8 Tsayno sueñushqanta wilapaptinmi wawqinkuna masraq chikir kayno nirqan: “Tsayno nishpaykiqa ¿mandamaqnï rey kanaykipaq kashqantaku yarpaykanki? ¿Munaynikicho tsararämänaykipaq kashqantaku yarpaykanki?”
9 Tsaypita yapaypis sueñushqanta wawqinkunata wilaparmi José kayno nirqan: “Sueñuynïchömi rikashqä intipis, killapis y chunka juk qoylarkunapis noqata adoraykämaqta”.
10 Tsay sueñushqanta papäninta y wawqinkunata wilapaptinmi papänin olqüparqan kayno nir: “¿Imata yarpartaq tsayno niykämanki? ¿Noqapis mamaykipis y wawqikikunapis qamman qonqurpakamunäpaq kashqantaku yarpaykanki?”
11 Tsayno wilapaptinmi wawqinkunaqa masraq chikipäkurqan.* Papäninnami yarpachakurqan kayno nir: “¿Imapaqraq tsurï tsayno sueñuykushqa?”
Joséta wawqinkuna rantikushqan
12 Juk kutimi Josépa wawqinkuna Siquem partiman aywarqan papäninpa uyshankunata y cabrankunata mitsinanpaq.
13 Tsaymi Joséta taytan Israel kayno nirqan: “Siquem jirkachömi wawqikikuna uyshantsita mitsirkaykämun. Imano kaykashqantapis musyanäpaq ayway watukamunki”.
Tsayno niptinmi José kayno nirqan: “Aywä ari, papä”.
14 Tsaymi papänin kayno nirqan: “Kutiykamur wilamanki uywantsikuna y wawqikikuna imano kaykashqantapis”.
Tsayno nirmi Hebrón pampapita Israelqa Joséta kacharqan Siquem jirkakunapa.
15 Tsawraqa Siquem partiman chayaykur wawqinkunata ashir pantakashqa purirqan. Tsayno puriykaptinmi juk runa Joséwan tinkurkur kayno nir tapurqan: “¿Imatataq ashiykanki?”
16 Tsawraqa José kayno nirqan: “Wawqïkunatami ashiykä. ¿Manaku rikalashqanki maynincho mitsikurkaykaqtapis?”
17 Tsawraqa nirqan: “Paykunaqa kaypita maynami aywakushqa. ‘Dotán lädupa aywakushun’ nir wilanakuykaqtami mayashqä”.
Tsaypita José aywarmi wawqinkunata Dotáncho tarirqan.
18 Karulataraq José aywaykämuqta rikaykurmi wawqinkuna wilanakurqan wanutsinanpaq.
19 Tsaymi juknin juknin kayno nipäkurqan: “¡Taqä sueñupäkuq chölu aywaykämun!
20 Jukla wanuratsir pözuman jitarpushun pipis mana tarinanpaq. Nirkur papänintsita wilashun jirka uywakuna mikushqanta. Tsayno ruraykuptintsi mä sueñushqannökush kanqa”.
21 Tsayno wilanakushqanta mayaykurmi wawqin Rubénqa imanöpapis tsapayta munar kayno nirqan: “Ama wanutsishuntsu.
22 Wawqintsipa yawarninta jichanantsipa trukanqa kay chunyaq pözuman winarpushun. Ama kikintsiqa wanutsishuntsu”.
Rubén tsayno nirqan Joséta imaykanöpapis kawaykaqta taytanman kutitsiyta munarmi.
23 Tsaymi wawqinkuna kaqman José chayaykuptin kuyaylapaq tünicanta jukla loqtiparqan.
24 Nikurnami tsaki pözuman jitarpurqan.
25 Tsaypitanami mikapakur jamarpaykashqancho rikarqan ismaelita runakuna atskaq aywaykaqta. Paykunami Galaadpita *camëllunkunawan aparkaykarqan perfümikunata, balsamuta y mïrrata Egiptucho rantikunanpaq.
26 Tsaymi wawqinkunata Judá kayno nirqan: “Wawqintsita wanurkatsir mana musyaq tukushqantsiwan ¿imatataq jorqushun?
27 Payqa yawarnintsimi. Wanutsinantsipa trukanqa taqay ismaelita negociantikunata rantikuykushun”.
Judá tsayno niptinmi wawqinkuna “alichari kanman” nipäkurqan.
28 Madiánpita ismaelita negociantikuna pasaykaptinmi pözupita Joséta jorqaramur ishkay chunka (20) siclo* qellaycho rantikuykurqan.* Tsaynöpami Josétaqa Egiptuman apakärirqan.
29 Pözuman Rubén kutir Joséta mana tarirmi fiyupa lakikushpan röpanta rachirqan.
30 Tsaypitami wawqinkuna kaqman aywaykur kayno nirqan: “¡Pözuman winashqantsi mözu manami kantsu! Kananqa ¿imatataq rurashaq?”
31 Tsawraqa cabrata pishtarkur Josépa tünicanta yawarwan pichupäkurqan.
32 Tsayno rurarkurnami papäninman apatsirqan. Apaqtanami kayno wilananpaq yätsirqan: “Kay tünicata taripäkushqä chunyaq jirkachömi. Shumaq reqiykulay, papä, tsurikipa tünican kashqanta o mana kashqantapis”.
33 Chayaykur wilaptinmi tsurinpa tünicanta reqiykur Jacob kayno nirqan: “¡Kayqa tsurïpa röpanchaq! ¡Jirka uywakunachari Josétaqa mikushqa!”
34 Tsawraqa lakikushpan röpanta rachirir lütu röpatana jatikurqan. Tsurinpaq yarpararmi pasaypa waqar purirqan.
35 Warmipis olqupis tsurinkuna shoqaptinpis masraq waqarmi kayno nirqan: “Wanur tsurïwan tinkunäyaqmi lütushaq”.
36 Madianita negociantikunanami Egiptuman Joséta chayaykatsir Faraónpa wardiankunapa capitannin Potifarman rantikuykurqan.
Ichic wilacuycuna
^ 37.3 Israelqa Jacobpa jukaq jutinmi karqan.
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ 37.28 Juk siclo qellayqa juk killa arur gänashqannömi karqan.
