Génesis 44:1-34
44 Tsaypitanami Joséqa mayor ashmayninta mandarqan kayno nir: “Kay runakunapa costalnin juntata trïguta winaparkur pägashushqayki qellaynintapis costalninkunapa shiminman winapanki.
2 Shulka kaqpa costalninman qellaypita rurashqa väsüta y trïgupita pägashqan qellaytapis winapanki”.
Tsaymi José nishqannöla tsay ashmayninqa lapantapis rurarqan.
3 Patsa wararkuptinnami wawqinkunata José despacharqan. Tsawraqa bürrunkunaman trïguta cargakurkur aywakärirqan.
4 Cercalataraq aywaykaptinmi Joséqa mayor ashmayninta kacharqan kayno nir: “Ayway tsay trïgu rantiq runakunapa qepanta. Taripaykur kayno ninki: ‘Patronnï qamkunawan ali kaykaptinqa ¿imanirtaq qellaypita rurashqa väsunta suwakamushqanki?
5 Tsay väsuqa kaykan patronnï upunanpaq y imatapis adivinananpaqmi. Tsayta suwakamur mana alitami rurapäkushqanki’ ”.
6 Tsayno niptin taripaykurmi patronnin nishqannöla runakunata nirqan.
7 Tsayno niptinmi paykuna kayno nirqan: “¿Imanirtaq noqakunata tsayno tumpamanki? Tsaytaqa manami ruraykümantsu.
8 Costalnïkunapa shimincho tarishqä qellaytapis *Canaánpita patsami kutitsimushqä. ¿Imanöpataq patronnikipa wayinpita qellayninta ni qorintapis suwakamüman karqan?
9 Mayqanïpa costalnïchöpis väsuta tariptikiqa wanutsishqa katsun. Wakinnïpis patronnikipa ashmayninmi kapäkushaq”.
10 Tsawraqa mayor ashmay kayno nirqan: “Qamkuna nishqaykino katsun. Itsanqa mayqaykipis väsuta tsararaq kaqlami ashmaynï kananpaq quëdanqa. Wakinnikiqa markaykiman kutikärinki”.
11 Tsayno niptinmi jinan höra cargankunata paskarir juknin jukninpis costalninkunapa shiminta kichaparqan.
12 Tsawraqa ashipayta qalaykurqan mayor kaqpa costalninpita shulka kaqpa costalninyaq. Tsayno ashipaykashqanchömi Benjamínpa costalnincho väsuta tarirqan.
13 Tsaymi fiyupa mantsakärishpan röpantapis rachipäkurqan. Nirkurmi jinan höra bürrunkunata cargakurkur José kaykashqan markaman kutipäkurqan.
14 Wawqinkunawan Judá kutirmi Joséta taripäkurqan wayilanchöraq. Tsawraqa pasaypa mantsakärishpanmi nawpanman lätakaykärirqan.
15 Tsaymi José kayno nirqan: “Qamkuna ¿imanirtaq suwakushqanki? ¿Manaku musyapäkushqanki adivïnu kar imatapis musyashqäta?”
16 Tsawraqa Judá kayno nirqan: “Manami ima niytapis kamäpakütsu, tayta. Jutsata rurashqätami* Tayta Dios rikapäkamashqa. Kananqa väsuykita tsararaqnintin lapanïchari qampa ashmayniki kapäkushaq”.
17 Tsayno niptinmi José kayno nirqan: “Lapayki manami ashmaynï kankimantsu. Väsüta suwaq kaqlami ashmaynïqa kanqa. Wakinnikiqa papäniki kaqpa kutikäriy”.
Benjamínta mana quëdatsinanpaq Judá ruwakushqan
18 Tsayno niptinmi Josépa nawpanman witiykur Judá kayno nirqan: “Qam kaycho kaykanki kikin Faraónnömi. Ruwakuptï mana rabyakuylapa mayaykalämay, tayta.
19 Nawpata shapäkamuptï tapumarqayki papänï kawaykashqanta y maspis wawqï kashqanta.
20 Tsayno tapumaptikimi noqakuna wilarqä papänï kawaykashqanta y awkinyayninchöraq yuriq tsurin mözularaq kaykashqantapis. Tsaynöpis wilapashqä tsay mamalapita jukaq wawqï elqashqanta y nunush kaq wawqilanna kawaptin papänï pasaypa kuyashqantami.
21 Tsaymi nimarqayki reqinaykipaq shulka wawqïta pushapäkamunäpaq.
22 Noqakunami nirqä tsay tsurinta apapäkamuptïqa papänï lakikuypita wanunanpaq kashqanta.
23 Tsayno wilaptïpis nimarqayki shulka wawqïta mana pushamuptïqa mana chaskimänaykipaq kashqantami.
24 “Tsaymi papänï kaqman kutiykur lapan nimashqaykita wilapäkushqä.
25 Tsaypitami papänïqa nimarqan trïgu rantiq kutipäkamunäpaq.
26 Tsaymi kayno nipäkurqä: ‘Manami kutipäkushaqtsu shulka wawqïta mana pusharqa. Payta mana pushaptïqa tsay mandaq runa manami chaskipäkamanqatsu’.
27 Tsawraqa papänï kayno nimarqan: ‘Qamkunaqa musyankimi tsay mamalapita ishkay tsurï kashqanta.
28 Jukaq tsurïtaqa yarqushqanpita patsa kananyaq manami rikätsu. Rasunpami jirka uywakuna mikushqa kanqa.
29 Shulka kaq tsurïta pushaykaptiki imapis pasaptin qamkunami jutsayuq kankipaq lakikuypita wanuptï’ ”.
30 Tsayno nirkushpanmi Judá kayno nirqan: “Kay tsurintaqa papänï pasaypami kuyan. Payta mana kutitsiptïqa
31 lakikuylapitachari wanunqa. Tsayno wanunqapaq noqakunapa jutsäpitami.
32 Noqami papänïta promitishqä imaykanöpapis tsurinta kutitsinäpaq. Payta mana kutitsirqa wanunäyaqpis jutsayuq kanäpaq kashqantami nirqä.
33 Tsaymi qamta ruwakü tayta, shulka wawqïpa trukan ashmayniki noqa quëdakunäpaq. Payqa wawqïkunawan papänï kaqman kutikutsun.
34 Shulka wawqï mana kutiptinqa papänï kaqman manami kutïmantsu. Manami munätsu papänï kuyapaypaq waqananta”.
Ichic wilacuycuna
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 44.16 Josépa väsunta mana suwashqa karpis Judá reconöcirqan wawqinta unay rantikushqanpita jutsayuq kashqanta. Tsaymi jutsata rurashqätami Tayta Dios rikapäkamashqa nirqan. Tsaypita masta musyanaykipaq liyinki Gén. 42.21-22.
