Génesis 49:1-33
49 Tsaypitanami lapan tsurinkunata qayaykur Jacob kayno nirqan: “Nawpäman lapayki witimuy. Waray warantin imano kanaykipaq kashqantami kanan wilashayki.
2 “Lapayki witiykamur nishqäta mayapäkamay.
3 Rubén, qammi kanki qechpa tsurï.Mözularaq kaykarmi qamta tsurïkurqä.Lapan wawqikipis alimi rikashurqayki.Paykunapita mas munayniyuqmi karqayki.
4 Cargashqa mayuta tsapayta mana kamäpakushqannömi qamtapis jutsa rurayta munaptiki tsapayta mana kamäpakushunkitsu.*Concubïna warmïwan punushpaykimi jutsata rurar penqayman churamashqanki.*Tsaymi qechpa derëchuykita perdishqanki.
5 “Simeónwan Levíqa tsay yarpaylami karkaykan.Paykunami cuchilluwan tuksiypa runakunata ushakätsirqan.
6 Pasaypa rabyarmi runakunata wanutsipäkurqan.*Asikunan kashqalami törukunapa ankunta kutsurqan.Tsaymi paykuna juntakashqanchöqa juntakaytapis mana munätsu.
7 Paykuna rabyashqanqa pasaypa mana alimi karqan.Paykunapita miraqkunatami destinaykä Israel nacioncho talukashqa tänanpaq.
8 “Judá, qampita miraqkunatami itsanqa lapan Israel mayinkuna kuyanqapaq.Contrankunataqa munayninmanmi churanqapaq.Lapan Israel mayinkunapis respitarmi nawpanman qonqurpakunqapaq.
9 Manta león uywata mikukurkuqnömi kaykanki, hïju.Uywata tsarinanpaq pampaman lätakuykuq leonnömi kaykanki.Mantsaypaq kaptiki ¿piraq achäquilatapis ashipaykushunkiman?*
10 Judá aylulapitami reykuna imaypis kanqa.Manami pipis munayniyuq rey kashqanta qechunqatsu.Tsayno kanqa lapanpaq munayniyuq kaq rey chayamushqanyaqmi.Tsay reytami maytsay nación runakunapis cäsukärinqapaq.
11 Tsay witsanmi üvapis tampiyparaq wayunqa.Tsaymi üva yöralamanna bürruntapis watapäkunqa.Vïnupis röpanta taqshananpaq tsaytsika yakunnömi kanqa.
12 Tsaytsika üva kaptinmi runakunapa nawinkunapis vïnupita mas yanaraq kanqa.Tsaytsika lëchi kaptinmi kirunkunapis lëchipita mas yoraqraq kanqa.
13 “Zabulónpita miraqkunaqa lamar kuchunkunachömi tanqa.*Büqui chayanan y yarqunankunachömi markankunapis kanqa.Lindërunkunapis Sidónwan tinkuqyaqmi kanqa.*
14 “Isacarpita miraqkunaqa corralcho kaykaq kalpayuq bürrunömi kanqa.
15 Tashqan markankunaqa maypis täkuypaqmi kanqa.Tsaymi qepita apananpaqpis waqtanta kamapanqa.Ashmay karpis kushishqalami kawapäkunqa.
16 “Danpita miraqkunaqa wakin Israel trïbukunanömi trïbun kaq runakunata mandanqa.
17 Tsaynöpis näni nawpancho mayaq mayaq pakaraykaq culebranömi kanqa.Paykunaqa cawallupa chakinta picar muntaraqta jitatsiqnömi kapäkunqa.
18 TAYTA DIOS, ¡qamlamanmi salvamänaykipaq yärakamü!
19 “Gadpita miraqkunatami tsaytsika soldädukuna achäquita ashipanqa.Jina kaqtami kikinkunata qatikachanqa.
20 “Aserpita miraqkuna tashqanchöqa atskami mikuypis kanqa.Tsaymi rey mikushqanno imaypis ali alilata mikupäkunqa.
21 “Neftalípita miraqkunaqa luychuno munashqanpa purikuqmi kanqa.Luychu kuyaylapaq malwakunata qeshpitsiqnömi kanqa.
22 “Josépita miraqkunaqa yaku kuchuncho winamuq yöranömi kanqa.Paykunaqa tampiyparaq wayuq yöranömi kanqa.Loqluyparaq yöra winar perqa jananpapis pasaqnömi kanqa.
23 Paykunatami pasaypa chikir flëchankunawan atacanqa.Tsaynölami imaypis rabyanätsinqa.
24 Tsayno kaptinpis Josépita miraqkunapa rikrankuna pasaypa kalpayuqmi kanqa.Flëchananpaq flëchakunantapis fuertimi tsararanqa.Tsayno kalpayuq kanqa lapanpaq munayniyuq Tayta Dios yanapaptinmi.Paymi Israel runakunata mitsir munayninwan imapitapis tsapan.
25 Yärakushqä Tayta Dios yanapaykuläshunki.Lapanpaq munayniyuq Tayta Dios jana patsapita bendicionninta qoykuläshunki.Patsa rurinpita yakutapis pashtaykatsilämutsun.Wamraykikuna y uywaykikunapis atska kananpaq bendicionninta churaykalämutsun.
26 Papänï bendicionninta qomashqanpita masmi qamtaqa bendicionnïta qoykä.Kay bendicionqa jirkakuna mana ushakaq kashqannömi qampaq y qampita miraqkunapaq imaypis kanqa.Qamtaqa wawqikikunapitami Tayta Dios akrashushqanki.*
27 “Benjamínpita miraqkunaqa mantsariypaq *löbunömi kanqa.Tsarishqan uywata tsaka tsakala mikuqnömi kanqa.Tardipanami soldädu mayinkunata aypunqa”.
28 Tsayno nirmi tsurinkunata Jacob bendicionta qorqan. Chunka ishkay tsurinkunapita miraqkunami Israel runakunaqa chunka ishkay trïbukuna kaykan.
Jacob wanushqan
29 Tsaypitami tsurinkunata Jacob kayno nirqan: “Unay aylükuna kaqman aywakunäpaqnami kaykä. Wanukuptï taytä y awkilü pamparashqanman apaykamar pampaykamanki. Paykuna pamparaykan heteo runa Efrónpa chakrancho kaykaq machaychömi.
30 Tsay machayqa *Canaáncho kaykaq Mamripa tsimpan Macpelachömi kaykan. Tsay machaytaqa chakrantinta Efrón runapitami awkilü Abraham rantirqan aylunkunawan pampakärinanpaq.*
31 Tsaychömi pamparaykan awkilü Abraham, awilä Sara, papänï Isaac* y mamä Rebecapis. Warmï Leatapis tsaymanmi pamparqä.
32 Tsay machaytaqa chakrantinta heteo runakunapitami awkilü rantirqan”.
33 Tsurinkunata tsayno yätsirkurmi Jacobqa cämanman chachaykur wanurqan.*
Ichic wilacuycuna
^ concubïna Concubïnaqa manami runapa legïtimu warmintsu karqan. Concubïnanwanqa manami pakaylapatsu purikurqan, sinöqa warminwannömi tarqan (Jue. 8.31; 19.1-4; 2Sam. 5.13; 15.16; 16.21-22; 20.3; Est. 2.9).
^ 49.4 Gén. 35.22.
^ 49.6 Gén. 34.24-30.
^ 49.9 Núm. 24.9; Apoc. 5.5.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 49.13 Deut. 33.18-19; Jos. 19.10-16.
^ 49.22-26 Deut. 33.13-17.
^ löbu Löbuqa jatusaq fiyu alquno munti uywami kaykan.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 49.30 Gén. 23.1-20.
^ 49.31 Gén. 25.9-10; 35.27-29.
^ 49.33 Hech. 7.15.
