Génesis 6:1-22
6 Kay patsacho runakuna atskaman miraptin warmi tsurinkunapis atskami karqan.
2 Tsaymi Tayta Diospa tsurinkuna rikarqan runakunapa warmi tsurinkuna kuyaylapaq kashqanta. Paykunapitami munashqanta akrapäkurqan warmin kananpaq.*
3 Tsawraqa TAYTA DIOS kayno nirqan: “Manami runakuna imayyaqpis kawanqatsu. Paykunaqa ushakaqlami kaykan. Tsaymi imayyaqpis kawananpa trukanqa pachak ishkay chunka (120) watalana kawapäkunqa”.
4 Diospa tsurinkunawan runakunapa warmi tsurinkuna tashqan witsanmi jatusaq runakuna kay patsacho kawapäkurqan. Tsay unay runakunami pasaypa mentädu y kalpasapa kapäkurqan.*
5 TAYTA DIOS rikarqan runakuna pasaypa jutsa ruraylacho kawashqanta. Paykunaqa shonqun munashqanno jutsata ruranalanpaqmi yarpachakäriq.*
6 Tsaymi runata kamashqanpita TAYTA DIOS fiyupa maläyashpan kayno nirqan:
7 “¿Imapaqraq kay patsacho runata kamaykarqäpis? Kananqa lapan runakunatami ushakätsishaq. Tsaynöpis lapan uywakunata, pachalanpa, lätaypa puriqkunata y päriqkunatapis ushakätsishaqmi”.
8 Noétami itsanqa Tayta Dios kuyaparqan.
Arcata Noé rurashqan
9 Kaychömi qelqaraykan Noé imano kawashqanpis.
Runakuna jutsata rurar kawapäkuptinpis Noéqa Tayta Dios munashqannömi kawarqan.*
10 Noépa tsurinkunami karqan Sem, Cam y Jafet.
11 Tayta Diosmi rikarqan kay patsacho runakuna pasaypa jutsata rurar y wanutsinakular kawaykashqanta.
12 Maytsaychöpis runakuna jutsata ruralar kawaqta rikarmi Noéta Tayta Dios kayno nirqan:
13 “Kay patsacho lapan runakunatami ushakätsishaq. Paykunami jutsayuq karkaykan kay patsacho wanutsinakuy kananpaq. Tsayno kashqanpitami kay patsacho kaqkunata chipyaq ushakätsishaq.
14 “Tsayno kananpaq kaykaptinqa atska cuartuyuq jatunkaray *arcata weqiyuq qerupita ruray. Yaku mana yaykunanpaq uchkunkunata jananpa y rurinpa breawan lutanki.
15 Tsay arcata ruranki kimsa pachak (300) kuchus larguta, pitsqa chunka (50) kuchus anchuta y kimsa chunka (30) kuchus altuta.*
16 Tsaynöpis ruranki kimsa pïsuyuqta. Qatarashqanpita uraman juk kuchus tupuypita ventänata ruranki. Tsaynöla juk lädunpa punkuntapis ruranki.
17 “Fiyupa diluviu tamyatami tamyatsimushaq maytsaytapis yaku tsapananyaq. Tsay yakuwanmi kay patsacho shenqaypa lapan wanupäkunqapaq.
18 Qamwanmi itsanqa *pactuta rurashaq. Tsaymi arcaman yaykapäkunki qam, warmiki y tsurikikuna warmintin.
19 Tsaynöpis arcaman yaykatsinki kay patsacho kaq tukuy niraq uywakunata chinan orquta, qamkuna salvakushqaykino paykunapis salvakärinanpaq.
20 Qamkunawanmi arcaman yaykunqa tukuy niraq päriqkuna, ashmana kaq y mana ashmana kaq uywakuna y pachalanpa, lätaypa puriqkunapis. Cada ünun chinan orqu yaykutsun. Tsaynöpami paykunapis mana ushakanqatsu.
21 Arca rurinman tukuy niraq mikuykunata pirwanki. Tsay mikuytami mikunkipaq qamkunapis y uywakunapis”.
22 Tsaymi Tayta Dios nishqannöla lapanta Noé rurarqan.*
Ichic wilacuycuna
^ 6.2 Manami shumaq musyakantsu kay textucho ni versïculu 4-chöpis Diospa tsurinkuna pï kashqanpis. Capaz karqan unay reykuna, angilkuna o Diosman yärakuqkunapis.
^ 6.4 Núm. 13.33.
^ arca Arcaqa jatunkaray atska cuartuyuq büquimi karqan. Pelötawan puklakuna pampapitapis mas jatunmi karqan. Tayta Dios niptinmi arcata Noé rurarqan. Tsay arcamanmi diluviupita salvakärinanpaq Tayta Dios nishqanno Noé, warmin, tsurinkuna, lumtsuyninkuna y tukuy casta uywakunapis yaykurqan (Gén. 6.9–9.17).
^ 6.15 Juk kuchusqa chusku chunka pitsqa (45) centïmetrumi kaykan.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
