Isaías 14:1-32
14 Jacobpita miraqkuna, TAYTA DIOS kuyapämäshunmi.Israel runakuna, yapay akramashpantsimi nacionnintsiman shuntamäshun.Jäpa nación runakunapis qelikämushpanmi noqantsiwan tanqapaq.
2 Nacionnintsiman kutimunantsipaq maytsaycho taq runakunami yanapamäshun.Prësu apamaqnintsi runakunatapis kikintami prësu tsarirkur munaynintsicho tsararäshun.
Babilonia nacionpa mandaqnin reypa contran nipäkushqan
3 Babilonia nacionpa mandaqnin rey nakatsimashqantsipita, lakikatsimashqantsipita y yana bürruntano arutsimashqantsipitami TAYTA DIOS jamayta qomäshun.
4 Tsay junaqmi Babilonia nacionpa mandaqnin reypa contran sharkur kayno nishun:“¡Pasaypa mantsakuypaq fiyu runa benëchu ushakashqana kaykan!
5 Fiyu runakuna munayniyuq kashqanta TAYTA DIOSMI manakaqman churashqa.Mandaq kaynintapis qechushqami.
6 Paykunaqa mana kuyapaypami may markatapis ushakätsiq.Maytsay naciontapis munaynincho tsarararmi mana kuyapaypa nakatsiq.
7 “Paykuna ushakashqana kaptinmi maytsaychöpis kushishqana kawar cantapäkun.
8 Babiloniapa mandaqnin rey ushakashqanpitami ciprespis y Líbanucho kaykaq cedrupis kushikur kayno nipäkun:‘Kananqa pitapis manami kachamunkipaqnatsu mutumänanpaq’.
9 “Babilonia nacionpa mandaqnin rey, wanuqkunapa almankuna rikaq rikaqlami shuyarpaykäshunki.Punushqanpita rikcharkurmi chaskikushunaykipaq kamarikurkaykan.Maytsaycho wanuq reykunapa almanpis jamarpaykashqanpitami chaskikushunaykipaq listuna karkaykan.
10 Paykunaqa lapanmi kayno nishunki:‘Qampaqpis wanuy kashqami ¿aw?Kananqa noqakunanölanami wanushqanki.
11 Pampashuptikiqa munayniyuq kashqaykipis ushakashqanami kaykan.Fiestata ruraptiki arpayki waqashqanpis ushakashqanami kaykan.Kaychöqa qeshtaykipis y qataykipis kurulami kanqa’.
12 “Waraq qoylar, ¡imanöpataq ciëlupita jeqamushqanki!*Qamqa atska nacionkunatachaq vincirqayki.Tsayno kaykaptikipis kananqa kikikitami pampaman jitamushushqanki.
13 Runa tukurmi shonqulaykicho kayno niq kanki:‘Jana patsayaqmi chayashaq.Diospa qoylarninkunapita mas janachömi trönü kanqa.Dioskuna juntakänan norti kaq lädu jirkacho jamaykurmi mandashaq.
14 Pukutay jananmanmi witsäshaq.Poderniyuq Tayta Diosnömi kashaq’.
15 “Tsayno yarparpis wanushkuna kaykashqanmanmi chayashqanki.Patsa rurinpitapis mas rurimanmi chayashqanki.*
16 Wanushqa jitaraykaqta rikashushpaykimi mantsakashqa kayno nipäkunqa:‘¿Kaychi pïmaytapis mantsakätsiq karqan?¿Kaychi lapan nacionkunatapis ushakätsiq karqan?
17 ¿Kaychi maymanpis chayashqan kaqta chunyaqta kachariq, markakunatapis ushakätsiq y prësukunatapis mana kachariq karqan?’
18 “Nacionkunapa mandaqnin reykunaqa kuyaylapaq sepultürachömi lapan pamparaykan.
19 Qamtami itsanqa tsayno mana pampashunkitsu, sinöqa qanratanömi jitapäkushunkipaq.Guërracho wanutsishqatano y soldädukuna jarukushqan ayatanömi wakin runakunapa ayantawan juk uchkulaman jitarpushunkipaq.
20 Nacionkunata ushakätsishqaykipita y marka mayikikunata wanutsishqaykipitami wakin reykunatanöqa mana pampapäkushunkitsu.Fiyu runa kashqaykipitami alqu wiruqlapaqpis tsurikikunata mana churapäkunqatsu.
21 ¡Qampa tsurikikunata lapanta wanutsipäkutsun!¡Mandaq rey ama katsuntsu!Rey karqa markakunatami maytsaychöpis duëñu tukärinqa”.
22 Lapanta mandaq TAYTA DIOS kaynömi nin:“Babilonia markapa contran sharkurmi chipyaq elqätsishaq.Manami munayniyuqnatsu kanqa.Babilonia runakunapa tsurinkunatapis y wilkankunatapis chipyaqmi ushakätsishaq.
23 Tsay partitaqa iwsanki* täkunanman y sinigamanmi tikratsishaq.Pitsaypa pitsarmi Babiloniata ushakätsishaq”.Lapanta mandaq TAYTA DIOSMI tsayno nin.
Asiria nación ushakänanpaq nishqan
24 Lapanta mandaq TAYTA DIOSMI kayno nin:“Nishqäqa nishqämi kanqa.Yarpashqänömi lapanpis rurakanqa.
25 Israel nacionman yaykamuq Asiria runakunata chipyaqmi ushakätsishaq.*Jirkakunachöpis jarurishaqmi.Kuyashqä runakunapa matankanman yüguta churapashqantapis jorqushaqmi.Lasaq qepita aparipashqantapis jitarishaqmi.*
26 Maytsay nacionkunapaqmi tsayno yarpaykä.Lapan nación runakunata castiganäpaqmi kamarikushqa kaykä.
27 Lapanpaq munayniyuq kaykaptïqa ¿piraq michämanqa?Ushakätsinäpaq aywaptïqa ¿piraq tsapämanqa?”
Filistea nación imano kananpaqpis nishqan
28 Rey Acaz wanushqan watami Isaíasta revelar Tayta Dios kayno nirqan:
29 “Filistea nación runakuna, atacashuqniki Asiria nacionpa mandaqnin rey wanushqanpita ama kushikäriytsu.*Paypa tsurinkunapitami juk rey kanqa.Tsay reyqa fiyupa venënuyuq culebrapita mas peormi kanqa.
30 “Tsayno fiyu kaptinpis waktsakunataqa ali qewacho uyshata mitsiqnömi rikashaq.Muchuq runakunapis kushishqami kawapäkunqa.Filisteo runakunatami itsanqa muchuywan wanunanpaq kamakätsishaq.Kawaykar quëdaq runakunatapis lapantami ushakätsishaq.
31 “Filistea markakunapa punkunkuna, ¡waqapäkuy!Filistea markakuna, ¡mantsakur qaparpay!Filisteo runakuna, ¡mantsakushpayki lapayki siksikyapäkuy!Qoshtatarraqmi norti kaq lädupita soldädukuna aywaykämun.Fïlanpita ni jukpis mana yarquypami shamurkaykan”.
32 Filisteo runakuna kachamushqan runakunatami kayno nishunpaq:“*Sión jirkantaqa TAYTA DIOSMI rikaykan.Tsaymi imaypis nakarqa kuyashqan runakuna tsayman amparakunqa”.
Ichic wilacuycuna
^ 14.12 Apoc. 8.10; 9.1.
^ 14.13-15 Mat. 11.23; Luc. 10.15.
^ 14.23 Iwsankiqa kuchi malwa tamäñu kashayuq uywami kaykan.
^ 14.24-27 Isa. 10.5-34; Nah. 1.1—3.19; Sof. 2.13-15.
^ 14.25 Yüguta churapashqanta y qepita aparipashqanta nirqa fiyupa nakatsishqantami nirqan.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
