Isaías 15:1-9
15 Kaychömi qelqaraykan Moab nación imano kananpaq Tayta Dios revelashqan.*Moab nacioncho kaykaq Ar markataqa juk tsakaylami elqäratsinqa.Moab nacioncho kaykaq Kir markatapis juk tsakaylami ushakätsinqa.
2 Tsayno kaptinmi Dibón markacho taq runakuna fiyupa lakikärinqa.Templunman y *altarkunamanmi aywanqa lakikuypita waqananpaq.
Nebo y Medeba markakunatapis elqäratsinqami.Chipyaq elqätsiptinmi moabita runakuna lakikur waqapäkunqa.Tsayno lakikurmi aqtsantapis y shaprantapis rutukärinqa.
3 Qachqa röpan jatishqami cällikunapapis puripäkunqa.Wayin janankunachöpis* y pläzankunachöpis lapanmi lakikur waqapäkunqa.
4 Hesbóncho y Elealicho taqkuna ausiliuta manakurmi qaparpanqa.Qaparashqan Jahaza markayaqmi mayakanqa.Atacaptinmi moabita soldädukunapis mantsakärinqa.Ali chölu soldädukunapis fiyupami siksikyanqa.
5 Moabita runakuna tsayno nakananpaq kaptinmi shonqü pasaypa lakinan.Paykuna Zoaryaq y Eglat-selesiyáyaqmi qeshpir aywakärinqa.Luhitman witsänan cuestapami waqaraykar aywapäkunqa.Horonaimman aywaq nänipa aywashpanmi iktsuy iktsur waqapäkunqa.
6 Nimrimcho yaku pözukunapis y qewakunapis tsakinqami.Lapan tseqlimuq jachakunapis wanutanqami.Manami ima jachakunapis loqyuranqanatsu.
7 Tsaymi lapan shuntashqankunatapis Sauci Raqraman apapäkunqa.
8 Tsaycho waqashqanqa intëru Moab nacionyaqmi mayakanqa.Eglaimyaq y Beer-elimyaqmi qaparashqan mayakanqa.
9 Atska runakuna wanuptinmi Dimóncho kaq yakumanpis yawar talukanqa.Leonkunatapis Dimóncho taqkunamanmi Tayta Dios kachamunqa.Tsay leonkunami Moabpita qeshpiq runakunata mikur ushanqa.
Ichic wilacuycuna
^ 15.1—16.14 Isa. 25.10-12; Jer. 48; Eze. 25.8-11; Amós 2.1-3; Sof. 2.8-11.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 15.3 Israel nacionchöqa wayita qatananpa trukanqa terrädu jananman tsaqlarkurmi mituwan lashtapäkuq. Tsay jananchönami awakäriq, aqakäriq y trïgutapis akrapäkuq.
