Isaías 17:1-14
17 Kaychömi qelqaraykan Damasco marka imano kananpaq Tayta Dios revelashqan.*Damasco marka chipyaq ushakarmi raqälana rikakunqa.
2 Aroer particho kaykaq markakunacho runakuna manami tanqanatsu.Atska qewalana kaptinmi pipis mana mantsatsiptin uywakunala täkunqa.
3 Efraín runakuna* tashqancho corralashqa markakunapis manami kanqanatsu.Damasco markachöpis rey manami kanqanatsu.Siria nacioncho* quëdaq runakunapis Israel nacionchönömi walkalana kanqa.Lapanta mandaq TAYTA DIOSMI tsayno nin.
Israel nación castigashqa kananpaq wilakushqan
4 Tsay witsanmi Israel nacionpis munayniynaq rikakunqa.Uyu runanölami tsay nación kanqa.
5 Refaim pampacho trïguta achuriptin raströjulana quëdashqannömi kanqa.
6 Olïvu yörata tapshir wayuyninta shuntaptin juk ishkaylana quëdashqannömi quëdanqa.Mas copösu kaqkunacho kimsa chuskula quëdashqannömi quëdanqa.Israel runakunata kuyaq TAYTA DIOSMI tsayno nin.
7 Tsay witsanmi kamaqnin Tayta Diosta ruwakärinqa.Israel runakunapa *santu Diosninmanmi yärakärinqa.
8 Juk dioskunata manakärinanpaq manami perqashqan *altarkunaman aywanqanatsu.Manami kikinkuna rurashqan *Asera diösamanpis yärakärinqanatsuni altarkunacho diosninkunapaq manami inciensuwan qoshtatsinqanatsu.
9 Tsay witsanqa Israelcho kaykaq corralashqa markakunachöpis runakuna manami tanqanatsu. Heveo runakunata y amorreo runakunata Israel runakuna ushakätsishqanno ushakätsiptinmi pasaypa raqälana rikakunqa.
10 Tsayno kankipaq salvashuqniki Tayta Diosta qonqapäkushqaykipitami.Imapitapis tsapäshuqniki Tayta Diostami kachariykushqanki.Tsaymi juk lädu nacionpita apaykatsimur chawcha mikuykunata muruptikipis
11 y murushqayki junaqla winarkamur warantilan chinyaraypa waytarpis mana wayunqatsu.Tsay junaqqa pasaypa nakar waqaptiki shonquykipis fiyupami nananqa.
12 Lamar bunyaypa bunyaqnöraqmi contrantsi nacionkuna olqushqan mayakaykämun.Qaparpashqanpis cargashqa mayu bunyaypa bunyar aywaqnöraqmi mayakaykämun.
13 Tsayno qaparar shapäkamuptinpis Tayta Dios olqüpaptinqa karupami qeshpir aywakärinqa.Jirkacho oqshata wayra apashqanno y polvuta shukukuy apashqannömi aywakärinqa.
14 Tsay runakuna patsa tsakarpuptinqa fiyupa mantsakuypaqmi karkaykan.Patsa wararkuptinnaqa manami kannatsu.Tsaynömi elqanqa imaykantsitapis apakuqkuna y markantsitapis ushakätsiqkuna.
Ichic wilacuycuna
^ 17.1-3 Jer. 49.23-27; Amós 1.3-5; Zac. 9.1.
^ 17.3a Efraín runakunapaq parlarqa norti läducho kaq Israel nación runakunapaqmi parlaykan.
^ 17.3b Siria nacionpa capitalnin Damasco markami karqan.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
