Isaías 18:1-7
18 ¡Wawalaw, imanöraq kanqa Etiopía nacioncho kaykaq mayukunapita mas washaqancho taq runakuna!*Tsay nacionchöqa yupayta mana atipaypaqmi chukluskuna kaykan.*
2 Etiopía runakunaqa ututupita rurashqa *büquikunawanmi Nilo mayupa kachata kacharkaykan.¡Kacha aywaykaqkuna, nacionnikiman kutipäkuy!¡Jatunkaray y shapraynaq runa mayikikuna tashqanman warakayla kutipäkuy!*Nacionnikicho taq runakunataqa maytsay nacioncho taq runakunapis mantsakunmi.Pasaypa kalpasapa y geniuyuq runakunami kapäkunki.Nacionnikipapis atska mayukunami pasan.
3 Puntakunacho señalta churamuqno y *cornëtata tukamuqnömi Diospa wilakuyninta wilakuykä.Intëru munducho taqkuna, tsay wilakushqäta mayapäkuy.
4 TAYTA DIOSMI kayno nimarqan:“Tashqäpita patsami Etiopía nacionta rikaykä.Tamya pasaptin wapuy shanay shanashqannömi mana tantiyakayla rikaraykä.Cosëcha witsan mana mayakayla shulyashqannömi mana mayakayla rikaraykä”.
5 Tsayno rikaraykashqanchömi elaqpita Etiopía runakunata Tayta Dios castiganqa.Manaraqpis üva cosëcha kaptin,üvapa waytan mayna shushuraykaptiny wayuynin poquraykaptinmirunakunata kachamunqa Etiopía runakunata ushakätsinanpaq.Paykunaqa üva rämankunata lawmarkur jitariqnömi Etiopía runakunata wanutsipäkunqa.
6 Nirkurmi wiskulkuna y jirka uywakuna mikunanpaq ayakunata kachaykunqa.Usya witsanmi wiskulkuna mikunqa.Tamya witsannami jirka uywakunana tulunkunatapis waqrunqa.
7 Kawaykar quëdaqkunanami lapanta mandaq TAYTA DIOSPAQ regälukunata apamunqa.Tsay runakunaqa jatunkaray y shapraynaq runakunami karkaykan.Paykunataqa maytsay nacioncho taq runakunapis mantsakunmi.Fiyupa kalpasapa y geniuyuq runakunami kapäkun.Nacionninpapis atska mayukunami pasan.*Sión jirkanmanmi regäluta apapäkamunqa.Tsaychömi lapanta mandaq TAYTA DIOS kaykan.
Ichic wilacuycuna
^ 18.1 Tsay witsanmi Etiopía nación karqan Sudán nación kanan kashqancho.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 18.2 Tsay witsanmi Etiopía runakuna Jerusalénman aywarqan Asiria nacionta ichipänanpaq tsaycho taq autoridäkunawan wilanakuq. Tayta Dioslaman runakuna yärakunanta munarmi Isaías nirqan nacionninman kutikärinanpaq.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
