Isaías 23:1-18
23 Kaychömi qelqaraykan Tiro markata ima pasananpaq kaqtapis Tayta Dios revelashqan.*¡Jatusaq *büqui manijaq runakuna, lakikushpayki fiyupa waqapäkuy!¡Tiro markata ushakätsirmi büqui chayanan puertukunatapis ushakätsinqa!Tsayno ushakätsinanpaqmi Quitim* islapita patsa wilakamun.
2 ¡Lamar kuchuncho taq Sidón* runakuna, pasaypa lakikäriy!Qamkunami negocianti kar büquikunawan maytsaymanpis aywapäkunkipaq.
3 Jatunkaray lamarpa pasarkurmi mikuytapis rantipäkamunkipaq.Tsay mikuyqa Nilo mayu pampakunacho wayushqan mikuymi kaykan.Qamkunawanmi maytsay nación runakuna negociuta rurapäkun.
4 Lamar kuchuncho kaykaq Sidón runakuna, ¡fiyupa penqakäriy!Tiro marka ushakashqa kaptinmi lamarpis lakikur kayno niykan:“Tiro runakunaqa wawäkunanömi karqan.Paykuna ushakaptin kananqa imaypis mana wachaqnönami kaykä.Mözukunata y wamrakunata imaypis mana ashmaqnömi kaykä”.
5 Tiro marka ushakashqanta musyaykur Egipto runakunapis fiyupami lakikärinqa.
6 ¡Lamar kuchuncho taqkuna, Tarsisman aywaykur fiyupa waqapäkuy!
7 Tiro markaqa unay markami karqan.Tsaychöqa imaypis fiestalami kakuq.Tiro runakuna maytsaychöpis mushuq markakunatami sharkatsipäkuq.
8 Tsay markakunachömi reykunatapis churapäkuq.Tiro markapita puriq negocianti runakunaqa maytsaychöpis reynöraqmi respitashqa kapäkuq.
Tiro markata ushakätsinanpaq pï kamakätsishqantapis tantiyakushun.
9 Lapanta mandaq TAYTA DIOSMI kamakätsishqa runa tukuqkunata penqayman churananpaq y munayniyuq runakunata manakaqman churananpaq.
10 Tarsis runakuna, lamar kuchuncho büquikuna ichiränanpaq puertukuna manami kannatsu. Kananqa büquiwan mikuyta apamunaykipa trukan kikikikunana Nilo mayucho taq runakunano mikuyta murupäkuy.
11 TAYTA DIOSMI lamar jananpa makinta joqarkur maytsay nacionkunata siksikyätsishqa.*Canaáncho* amparakuna corralashqa markakunata ushakätsinanpaqmi nishqa.
12 Sidón marka runakunatami kayno nishqa:“Qamkunaqa tsaripakushqa jipashnömi karkaykanki.Tsayno kaykarqa fiestatapis amana rurapäkuynatsu.Quitim islapa aywakurpis manami jamayta tarinkipaqtsu”.
13 ¡Tantiyakäriy Babilonia markata imano ushakätsishqantapis!Yaykur atacananpaqmi Asiria runakuna törrikunatapis sharkatsishqa.Markaman yaykurmi palaciunkunatapis raqälatana kachaykushqa.Kananqa jirka uywakunalanami tsaycho tarkaykan.*
14 ¡Büqui manijaq Tarsis runakuna, lakikur waqapäkuy!¡Büqui ichiränan puertukunapis manami kannatsu!
15 Ushakashqanpita qanchis chunka (70) watayaqmi Tiro markata pipis mana yarpanqatsu. Tsay watakuna kanqa qanchis chunka wata rey kawashqannömi. Qanchis chunka wata cumplirkuptinqa *wayrapakuq warmipaq runakuna cantashqannömi Tiro markapaqpis cantapäkunqa. Cantarmi kayno ninqa:
16 “Qonqakashqa kaykaq wayrapakuq warmi, arpaykita apakurkur markapa tumamuy.Pilapis yarpäshunaykipaq tukapalanpa yaparir yaparir cantay”.
17 Qanchis chunka wata cumplirkuptinqa Tiro markata yapaymi TAYTA DIOS yanapanqa. Tsaymi tsay markacho taq runakuna yapay rantikuyta qalaykärinqa. Yapaymi maytsay nación runakunawan negociuta rurapäkunqa.
18 Itsanqa manami kikinkunapaqnatsu gänashqanta shuntanqa, sinöqa TAYTA DIOSPAQNAMI. Tiro runakuna gänashqanwanmi TAYTA DIOSTA sirviqkuna pacha junta mikupäkunqa y ali röpata jatikärinqa.
Ichic wilacuycuna
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 23.1 Quitimqa Chipre islapa unay jutinmi kaykan.
^ 23.2 Sidón markaqa Tiro markapita chusku chunka (40) kilömetru norti kaq läduchömi karqan.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 23.11 Canaánchömi Tiro markapis Sidón markapis karqan.
^ 23.13 Kay versïculucho niykan Babilonia nacionta ushakätsishqanno Tiro markatapis ushakätsinanpaq kashqantami.
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
