Isaías 28:1-29
28 ¡Wawalaw, Samaria marka!Ali pampa janaqan jirkanchömi sharkatsishqa kaykanki.Tsay jirkancho kuyaylapaq marka karmi Efraín runakunapa* corönanno kaykanki.Qamcho taqkunaqa vïnuta upyaykälarmi qoyarkärinpis.Shinkashqa kar runa tukur kawaykashqanchömi kuyaylapaq wayta tsakishqanno ushakanqa.
2 Paykunata ushakätsinanpaqmi kalpayuq y munayniyuq runata Tayta Dios akrashqa.Tsay runaqa runtu tamyano, löcu wayrano y cargashqa mayunömi imatapis tarishqan kaqta ushakätsinqa.
3 Shinkashqa Efraín runakunapa corönanno Samaria marka kaptinpis tsay markata jarurmi ushanqa.
4 Tsaymi tsay ali pampa janaqan jirkancho kaykaq markaqa kuyaylapaq kaykarpis wayta ushakashqanno ushakanqa.Punta poquq hïgusta jukla palar mikushqannömi tsay markata ushakätsinqa.
5 Tsay witsanmi kawaykar quëdaq runakunapa corönan lapanta mandaq TAYTA DIOS kanqa.Kuyashqan runakunapa kuyaylapaq adornunmi kanqa.
6 Demanduta shumaq arreglananpaqpis paymi juezkunata ali tantiyatsinqa.Marka täpaq soldädukunatapis geniuyuq kananpaqmi valorta qonqa.
7 Kananqa cürakunapis y profëtakunapis vïnuta y shinkatsikuqta upyakurkurmi tsankapaykachaykan.Shinkashqa karmi Diospa wilakuyninta wilakärinanpaqpis mana musyapäkuntsu.Shumaq juzgaytapis manami kamäpakärintsu.
8 Gumitashpanmi lapan mësankunatapis qanratashqa.Paykuna kashqanchöqa lapanpis qanratashqami kaykan.
9 Tsay runakunaqa pipis anyapaptin kaynömi nipäkun:“¿Pita yachaykätsishqaykitataq yarpaykanki?¿Pï kashqäta yarpartaq Diospa wilakuyninta wilapaykämanki?¿Chuchuykaq wamra kashqätaku yarpaykanki?¿Tsayraq wasqishqa wamra kashqätaku yarpaykanki?
10 Parlapämashqaykiqa wamra rimayta yachakur ‘ba, be, bi, bo, bu’ nishqannömi kaykan.Maytsaychöpis tsaylatami niykämanki”.
11 Tsaymi tsay runakunata castigar mana tantiyashqan idiömapa Tayta Dios parlapanqa.*
12 Paykunatami Tayta Dios kayno nirqan:“Kaychömi jawka kawayta taripäkunki.Utikashqa kaykaqkunapis kaychömi jamayta tarinqa”.Niptinpis manami cäsukärishqatsu.*
13 Tsaymi paykunata castigar mana tantiyashqan idiömapa TAYTA DIOS parlapanqa.Tsay parlapashqanqa “ba, be, bi, bo, bu” niqnölami kanqa.Wakcho kaychöpis tsaylatami tantiyapäkunqa.Tsaymi puriyta yachakuykaq wamra ankalaypa tunir jitarashqanno jitarpanqa.Contrankunapa makinman chayaptinmi prësu tsarirkur apakärinqa.
Jerusalén markapa autoridäninkunata castigananpaq nishqan
14 Jerusaléncho pitapis mana respitaq autoridäkuna, TAYTA DIOS nishqanta mayapäkuy.
15 Qamkunaqa kaynömi nirkaykanki:“Wanuywanmi parlakärishqä.Sepultürawanmi *pactuta rurapäkushqä.Lulakuymanmi pakakurkaykä.Engañakuymanmi yärakurkaykä.Tsaymi noqakunamanqa wanuypis mana chayamunqatsu”.*
16 Makincho tsararämaqnintsi TAYTA DIOSMI kayno nin:“*Siónmanmi cimientupaq alinnin rumita churä.Tsay rumiqa akrashqami kaykan.Wayi esquïnancho kamaraq y mana kuyukuqmi kaykan.Pipis tsay rumiman yärakuq kaqqa manami manakaqlapaqtsu yärakunqa.*
17 “Wayita sharkatsinäpaq* cordilnïpis y plomädäpis kaykanmi.Cordilnïqa alikunalata rurashqämi kaykan.Plomädänami pitapis mana jananpaypa juzgashqä kaykan.Qamkuna yärakärishqaykiqa mana väliq amparakunayki wayinömi kaykan.Tsaymi runtu tamya y bunyaypa bunyar aywaq yaku wayita ushakätsishqanno contraykikuna shamur qamkunatapis ushakätsishunkipaq.Amïguykikuna salvashunaykipaq yärakärishqaykiqa manakaqlapaqmi kanqa.
18 “Wanuywan pactuta rurashqaykitapis y sepultürawan wilanakushqaykitapis manakaqmanmi churashaq.Castïgu shamurqa löcu tamyanömi ushashunkipaq.
19 Cadala chayamurmi qarachashqa apapäkushunkipaq.Waran waranmi tsakaypapis junaqpapis tsayno ushapäkushunkipaq.Chayamunanpaq kashqanta musyarmi mantsakushpayki siksikyankipaq.
20 Taksha kawitucho tsulatakuyta mana kamäpakushqaykinömi kapäkunkipaq.Taksha jaku qatakunaykipaq mana aypashqannömi kapäkunkipaq”.*
21 Perazim jirkancho pelyashqannömi yapay TAYTA DIOS pelyanqa.*Gabaón pampacho rabyakushqannömi yapay rabyakunqa.*Mana criyiypaqmi runakunata castiganqa.Pipis tantiyayta mana atipashqantami ruranqa.
22 Tsayta rurarqa kay nacionta chipyaqmi ushakätsinqa.Ushakätsinanpaqmi lapanta mandaq TAYTA DIOSMI nin.Tsayno kaptinqa wilakuyninta manakaqman ama churapäkuytsu.Tsaynöla mana cäsukuq kaptikiqa mas peorraqmi castigapäkushunkipaq.
23 Wilapashqäta tantiyakärinaykipaq shumaq mayapäkuy.Imata nishqätapis shumaq tantiyakäriy.
24 Murunantsipaqqa manami yaparir yaparir barbichalartsu kakuntsi.Tsaynöpis manami kurpata takar qewankunata tapshilartsu kakuntsi.
25 Tsaypa trukanqa inöjutapis, comïnustapis, trïgutapis, cebädatapis y avënatapis murunantsipaq kaqman juklami matsintsi.
26 Tsayno shumaq arunantsipaq Tayta Diosmi yarpayta qomantsi.
27 Inöjutaqa manami uywawan jarutsintsitsu.Comïnustapis manami carrëtawan jarutsintsitsu.Tsaypa trukanqa llanu qeruwanmi wiruntsi.
28 Trïgutami itsanqa jarutsintsi.Jarurkatsirnaqa manami yapay jarutsintsinatsu.Carrëtawan jarutsirpis manami muruntaqa ñutqushqanyaq jarutsintsitsu.
29 Lapanta mandaq TAYTA DIOSMI tsay yarpaytaqa qomashqantsi.Paypa yachatsikuyninqa espantaypaqmi kaykan.Pay yachashqanmanqa manami imapis tinkuntsu.*
Ichic wilacuycuna
^ 28.1 Efraín runakunapaq parlarqa norti kaq lädu Israel nacioncho taqkunapaqmi parlaykan. Tsay nacionpa capitalninmi Samaria karqan.
^ 28.11 Kay textucho mana tantiyashqan idiömapaq parlarqa Asiria runakunapa idiömanpaqmi parlan. Tsaymi mana tantiyashqan idiömapa Tayta Dios parlapanqa ninanqa Asiria runakunatami Tayta Dios kachanqa Israel runakunata atacar vincinanpaq ninanmi. Tsaynölami niykan 28.13 versïculuchöpis.
^ 28.11-12 1Cor. 14.21.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 28.15 Egipto runakunawanmi Judá runakuna pactuta rurarqan Asiria runakuna atacaptin yanapananpaq. Tsayno kaptinpis Isaías tantiyarqan mana yanapananpaq kashqantami. Tsaynöpis tantiyarqan Egipto runakunaman yärakur wanunanpaq kashqanta. Tsaymi Egipto runakunawan pactuta rurapäkushqanta ninanpa trukanqa Isaías nirqan wanuywan pactuta rurapäkushqanta.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 28.16 Sal. 118.22-23; Rom. 9.33; 10.11; 1Ped. 2.6.
^ 28.17 Tsay rumi jananman wayita Tayta Dios sharkatsishqanqa paypa makincho kawaymi kaykan.
^ 28.20 Kay textucho Egipto nacionta tinkutsin taksha kawituman y taksha jakumanmi. Tsaymi Israel runakuna Egipto runakunaman manakaqlapaq yärakurqan.
^ 28.21a 2Sam. 5.17-21.
^ 28.21a 2Sam. 5.17-21.
^ 28.28-29 Kay textucho kaynömi tantiyatsimantsi: “Trïguta jarutsir murunta mana ñutqutsishqannömi kuyashqan runakunata Tayta Dios aläpaqa mana castiganqatsu”.
