Isaías 36:1-22
36 Chunka chusku wata Ezequías rey kaykaptinmi Asiria nacionpa mandaqnin rey Senaquerib Judá nacionman soldädunkunawan chayarqan. Chayaykurmi ali murallashqa markakunata tsarikarkärirqan.
2 Rey Ezequíaspa contran sharkurmi Laquis markapita capitanninta tsaytsika soldädunkunatawan Jerusalénman Senaquerib kacharqan. Jerusalénman chayaykurmi campamentuta rurapäkurqan jana kaq pözuman aywaq sekya nawpancho. Tsayqa karqan taqshakuna pampaman aywaq nänichömi.
3 Tsaymi tsay capitanwan parlananpaq Jerusalénpita aywapäkurqan Hilcíaspa tsurin Eliaquim, Sebna y Asafpa tsurin Joa. Eliaquim karqan palaciucho kaqkunata täpaq, Sebna karqan secretariu y Joa karqan Judácho ima pasashqankunatapis qelqaq.
4 Chayapäkuptinmi capitán kayno nirqan: “Ezequíasman kutiykur Asiriapa mandaqnin rey kayno nishqanta wilapäkuy: ‘¿Piman yärakurtaq qam yarpanki noqakunata ichipämänaykipaq kashqanta?
5 ¿Imanirtaq yarpaykanki ali parlaq kashqalaykipita guërracho vincimänaykipaq kashqanta? ¿Pimantaq yärakuykanki noqakunapa conträ sharkunaykipaq?
6 Egipto runakunaman yärakuptikipis paykunaqa manami yanapashunkipaqtsu. Shoqushman tuknakuptiki maki paltaykiman tsalku yaykuqnömi mandaqnin rey Faraónpis qamkunapaq kanqa.* Payman yärakuqkunapaqqa pïmaypaqpis tsaynömi kaykan.
7 “ ‘ “TAYTA DIOSNÏMANMI yärakurkaykä” nimaptikipis manami paypis yanapashunkipaqtsu. Markakunacho kaykaq *altarkunata juchutsir Judá runakuna Jerusalénlacho TAYTA DIOSTA adorananpaq nishqaykipitami payqa rabyashqa kaykan’ ”.
8 “Noqakunawan pelyayta munarqa mandamaqnï rey Senaqueribwan parlay. Cawallu muntaq soldäduykikuna kaptinqa noqami ishkay waranqa (2,000) cawallukunata kamaripäshayki pelyanantsipaq.
9 Qamkunaqa guërra carrëtakunata y cawallu muntakuqkunata Egiptupita pushamurpis tsayraq yachakuq capitannïkuna mandashqan soldädunkunalatapis manami vinciyta kamäpakunkipaqtsu.
10 Tsaynöpis kikin Tayta Diosmi nimashqa kay nacionta ushakätsiq shapäkamunäpaq. Ama yarpapäkuytsu kikïkunapa yarpayniläpita kay nacionta ushakätsinäpaq shapäkamushqäta”.
11 Tsayno niptinmi Eliaquim, Sebna y Joa Asiria soldädukunapa mandaqnin capitanta kayno nipäkurqan: “Murälla janancho kaykaq runakuna nishqaykikunata mana tantiyapäkunanpaq hebreo idiömapa ama parlapäkuytsu, taytakuna. Tsaypa trukanqa arameo idiömapa parlapaykalämay. Noqakuna arameo idiömata tantiyapäkümi”.
12 Tsayno niptinmi Asiria nacionpa capitannin kayno nirqan: “Manami patronnilaykita ni qamkunalata wilanäpaqtsu Asiria nacionpa mandaqnin rey kachamashqa, sinöqa murälla janancho kaykaq runakunatapis wilanäpaqmi. Atacaptïmi paykunapis qamkunapis pasaypa yarqanar ishpaylaykita mikunkipaq y pasaypa yakunar chiwlaylaykita upunkipaq”.
13 Nirkurmi Asiria nacionpa capitannin sharkurkur hebreo idiömapa qayararqan kayno nir: “Shumaq mayakäriy Asiria nacionpa mandaqnin rey kayno niykashqanta:
14 ‘Rey Ezequías nishushqaykita ama cäsupaytsu. Payqa makïpita manami salvashunkipaqtsu.
15 TAYTA DIOSLAMAN yärakunaykipaq nishuptikipis ama criyipäkuytsu. TAYTA DIOS salvashunaykipaq kashqanta nishuptikipis ni kay markata pay tsapänanpaq kashqanta nishuptikipis
16 ama criyipäkuytsu’.
“Asiria nacionpa mandaqnin reymi kayno nin: ‘Conträ sharkapäkunaykipa trukanqa ali chaskikamay. Noqapa munaynïcho karqa cada ünuykimi üvaykikunata y hïgusnikikunata jawkala mikupäkunkipaq. Tsaynöpis kikikikuna uchkutsishqayki pözupitami yakutapis kushishqa upupäkunkipaq.
17 Tsayno kawanaykipaqmi juk nacionman apashayki. Tsay nacionqa kay nacionnikinömi kaykan. Tsaycho tantata ruranaykipaq trïgu alimi wayun. Vïnuta ruranaykipaqpis üva alimi wayun.
18 “ ‘TAYTA DIOSMI salvamäshun’ nishuptikipis Ezequíasta ama criyipäkuytsu. Manami mayqan nacionpa diosninkunapis mayjina manakuptinpis makïpita salvashqatsu.
19 Hamat runakunata atacaptï ¿maychötaq diosninkuna kaykarqan? Tsaynöpis Arfad runakunata y Sefarvaim runakunata atacaptï ¿maychötaq diosninkuna kaykarqan? Samaria markata atacaptïpis manami mayqan diospis salvashqatsu.
20 Tsay nacionkunapa diosninkunapis manami salvayta kamäpakushqatsu. Tsayno kaykaptinqa manami imanöpapis Jerusalénta makïpita DIOSNIKI salvayta kamäpakunqatsu”.
21 Tsayno niptinpis murälla janancho kaykaq runakuna imatapis manami rimakurqantsu. Paykunataqa rey Ezequíasmi yätsirqan imatapis mana rimakunanpaq.
22 Tsawraqa Hilcíaspa tsurin Eliaquim, Sebna y Asafpa tsurin Joa pasaypa lakikushpan röpantapis rachir usharqan. Eliaquim karqan palaciucho kaqkunata täpaq, Sebna karqan secretariu y Joa karqan Judácho ima pasashqankunatapis qelqaq. Paykunami rey Ezequíasman aywapäkurqan Asiria nacionpa mandaqnin runa imata nishqantapis wilapäkunanpaq.
Ichic wilacuycuna
^ 36.6 2Rey. 18.21; Eze. 29.6-7.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
