Isaías 37:1-38
37 Asiria nacionpa mandaqnin rey nishqanta wilaptinmi rey Ezequías pasaypa mantsakar jatirashqan röpanta rachirir qachqa röpata jatikurqan. Nirkurnami templuman aywaykur TAYTA DIOSTA manakurqan.
2 Amozpa tsurin profëta Isaíasta wilananpaqmi kacharqan palaciuta täpaq Eliaquimta, secretariu Sebnata y mas mayor cürakunata. Tsayno kachaptinmi qachqa röpan jatishqa lapan aywapäkurqan.
3 Isaías kaqman chayaykurmi rey Ezequías nishqanta wilar kayno nipäkurqan: “Kanan junaq fiyupa lakikuycho y penqaychömi kaykantsi. Warmi wachakuyta nakar kalpaynaq rikakushqannömi noqantsipis kalpaynaq kaykantsi.
4 TAYTA DIOS mayashqami kanqa Asiria nacionpa mandaqnin rey kachamushqan capitán paypa contran parlashqanta. Tsayno parlashqanpita TAYTA DIOS castigaykulätsun. Tsay runa nishqanno mana ushakätsimänantsipaq TAYTA DIOSTA manakuykulay, tayta”.
5 Rey Ezequíaspa yanapaqninkuna tsayno wilapäkuptinmi
6 Isaías kayno nirqan: “Mandamaqnintsi reyta wilapäkuy TAYTA DIOS kayno nishqanta: Asiria nacionpa mandaqnin rey kachamushqan runakuna manakaqman churamashpan tukuyta nishuptikipis ama mantsakäriytsu.
7 Noqami kamakätsishaq markancho mana ali novedäta mayananpaq. Tsayta mayar tsay rey kutiykuptinmi markancho wanutsipäkunqa”.
8 Tsayyaqmi Asiria nacionpa mandaqnin reyqa Laquis markapita Libna markamanna aywarqan atacananpaq. Aywashqanta mayaykurmi Jerusalénman kachashqan runakuna paypa qepanta aywapäkurqan.
9 Libnacho kaykarmi Asiria nacionpa mandaqnin rey mayarqan Etiopía nacionpa mandaqnin Tirhaca soldädukunawan payta atacananpaq aywarkaykämushqanta. Tsay soldädukunawan pelyaq yarqunanpaqmi Ezequíaspaq cartata qelqarkur kachakunawan apatsirqan. Tsay cartachömi kayno nirqan:
10 Judá nacionpa mandaqnin rey Ezequías: Yärakushqayki Dios capaz nishushqanki Jerusalénta atacayta mana kamäpakärinäpaq kashqanta. Tsayno nishuptikipis ama criyiytsu.
11 Qam musyankimi Asiria nacionpa lapan mandaqnin reykuna mayqan naciontapis ushakätsiyta munarqa ushakätsishqanta. ¿Tsayno kaptintsuraq salvakuyta yarpaykanki?
12 Unay aylükunaqa Gozán, Harán y Resef nacionkunatapis ushakätsirqanmi. Telasarcho taq Edén runakunatapis ushakätsiptin manami mayqan diosninkunapis salvarqantsu.
13 Hamat nacionpa, Arfad nacionpa, Sefarvaim nacionpa, Hena nacionpa y Iva nacionpa mandaqnin reykuna ushakashqannömi qampis ushakankipaq.
Tayta Diosta Ezequías manakushqan
2 Reyes 19.14-19
14 Tsay cartata liyirkurmi Ezequíasqa templuman aywaykur TAYTA DIOSPA nawpanman carta kicharaykaqta churarqan.
15 Nirkurnami TAYTA DIOSTA manakur kayno nirqan:
16 “Israel runakunata kuyaq TAYTA DIOS, lapantapis munaynikichömi tsararaykanki. *Querubinkunapa chawpinchömi jamaraykanki.* Qam japalaykimi kay patsacho lapan nacionkunapaq munayniyuq kaykanki. Tsaynöpis japalaykimi kay patsatapis y jana patsatapis kamashqanki.
17 Manakamushqäta mayaykalämay, TAYTA DIOS. Noqakuna imano kashqätapis rikaykulay. Senaquerib kachamushqan capitán manakaqman churashushqaykita ama qonqaykulaytsu.
18 “Carta nishqannömi Asiria nacionpa mandaqnin reykunaqa nacionkunata pasaypa ushakätsishqa, Tayta.
19 Adorapäkushqan ïdulukunatapis rupatsirmi ushashqa. Tsay ïdulukunaqa manami rasunpatsu munayniyuq karqan, sinöqa qerupita y rumipita rurashqalanmi. Tsaymi Asiria runakuna ushakätsiptinpis tsay ïdulukuna mana imanarqanpistsu.
20 “TAYTA DIOSNILÄ, Asiria nacionpa mandaqnin reypa makinpita salvaykalämay. Tsaynöpami maytsay nacioncho taq runakuna musyanqa qam japalayki munayniyuq Dios kashqaykita”.
Senaqueribpita Isaías wilakushqan
2 Reyes 19.20-37; 2 Crónicas 32.20-21
21 Tsaypitami Amozpa tsurin Isaías kacharqan rey Ezequíasta kayno nir wilananpaq: “Israel runakunata kuyaq TAYTA DIOS kaynömi nin: ‘Noqa mayashqämi Asiria nacionpa mandaqnin rey Senaqueribpa makinpita salvanäpaq manakamashqaykita.
22 Tsaymi tsay reypaq kayno nï:“ ‘Qamta manakaqman churashushpaykimi *Sión asikun.Jerusalén markapis pasaptiki umantami awipäshunki.
23 ¿Imanirtaq manakaqman churamar ashlimashqanki?¿Imanirtaq conträ rimashqanki?¿Imanirtaq alqa nawikipa* rikapämashqanki?¿Manaku musyanki Israel runakunapa *santu Diosnin kashqäta?
24 “ ‘Kachamushqayki runakunawan ashlitsimarmi kayno nishqanki:“Yupaytapis mana atipaypaq carrëtäkunawanmi jirkakunamanpis yaykushqä.Pipis mana yaykunan Líbano jirkakunamanmi chayashqä.Tsaychömi jatusaq cedrukunatapis mutushqä.Kuyaylapaq pïnukunatapis muturmi ushashqä.Mas altunnin jirkakunamanpis chayashqämi.Mas kuyaylapaq muntikunamanpis yaykushqämi.
25 Juk lädu nacionkunachömi pözuta uchkurir yakuta upushqä.Chakiläwanmi Egiptucho kaq lapan mayukunatapis tsapashqä”.*
26 “ ‘Tsayno nir ¿manaku tantiyanki lapanchöpis yanapashqäta?Manami kikilaykipitatsu nacionkunata vincishqanki.Vincinaykipaqqa noqami unaypita patsa kamakätsishqä.Noqa kamakätsiptïmi lapantapis tsayno rurashqanki.Tsaymi ali murallashqa markatapis juchutsir qotukashqa rumitano kachaykushqanki.
27 Noqa kamakätsiptïmi tsay markakunacho taqkunapa kalpankunapis ushakashqa.Pasaypa mantsakashqa karmi qewano ushakaqla rikakushqa.Wayi janancho winamuq qewakuna shanaywan tsakikäkuqnömi rikakushqa.
28 “ ‘Noqa musyämi lapan rurashqaykita.Musyämi maypa aywashqaykita y maypita shamushqaykitapis.Musyaykämi conträ sharkuykashqaykitapis.
29 Conträ sharkur fiyupa olqushqaykipitami senqaykiman argöllata churashaq.Shimikimanpis frënutami churashaq.Nirkurnami shamushqayki nänilapa kutitsishaykipaq’ ”.
30 Tsaypitanami Ezequíasta Isaías kayno nirqan:“Nishqäkuna rasunpa kashqanta musyanaykipaq kanan wilashayki ima pasananpaq kaqtapis.Kay wata y watanpis shiwalatami mikupäkunkipaq.Juknin kaq watami itsanqa murupäkunkipaq y cosechapäkunkipaq.Tsaynölami üvakunata plantapäkunkipaq y cosechapäkunkipaq.
31 “Kawaykar quëdaq Judá runakunaqa shumaq sapitsashqa yöranömi mana yarquypa markancho tanqa.Ali wayuq yöranömi atskaman mirapäkunqa.
32 Manami lapan Jerusalén runakunatsu wanupäkunqa.Sión jirkancho taq wakin runakuna kawaykanqaraqmi.Lapanta mandaq TAYTA DIOSMI qamkunata kuyashushpayki salvashunkipaq”.
33 “Asiria nacionpa mandaqnin reypaqmi TAYTA DIOS kayno nin:Jerusalénman manami yaykunqatsu.Manami ni juk kutilapis flëchanqatsu.Manami escüdun aptashqa atacanqatsu.Marka tsaparaq perqa waqtankunamanpis yaykunanpaq manami alpata qotutsinqatsu.
34 Shamushqalanpami kutikunqa.Manami imanöpapis Jerusalénman yaykunqatsu.Noqa TAYTA DIOSMI tsayno nï.
35 Kikïmi kay markata tsapar salvashaq.Tsayno salvashaq runakuna alabamänanpaqmi.Tsayno rurashaq sirvimaqnï Davidta promitishqa karmi”.
36 Tsaypitanami tsay tsakay Asiria soldädukunapa campamentunman aywaykur TAYTA DIOSPA *angilnin juk pachak pusaq chunka pitsqa waranqa (185,000) soldädukunata wanutsirqan. Patsa wararkuptinnami kawaq kaq soldädukuna tarirqan tsaytsika soldädu wanushqa jitarpaykaqta.
37 Tsaymi Asiria nacionpa mandaqnin rey Senaquerib toldunkunata paskar soldädunkunawan Nínive markaman kutikurqan.
38 Juk kutichömi diosnin Nisrocpa templuncho Senaquerib adoraykaptin tsurinkuna Adramelec y Sarezer yaykuykur espädankunawan wanuratsirqan. Nirkurnami qeshpir aywakärirqan Ararat partiman. Senaqueribpa trukannami tsurin Esar-hadónna rey kayta qalaykurqan.
Ichic wilacuycuna
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ 37.16 Éxo. 25.17-22; Núm. 7.89.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 37.23 Wakin runakunaqa nanaq nawiykipa nipäkun.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 37.24-25 Tsaykunata rey Senaquerib nirqan mayjina sasa kaqkunata rurashqanta alabakurmi.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
