Isaías 38:1-22
38 Tsay witsanmi rey Ezequías qeshyawan antsakar wanunanpaqna kaykarqan. Tsaymi Amozpa tsurin profëta Isaías watukuq aywar kayno nirqan: “TAYTA DIOSMI kayno nin: ‘Qamqa mananami aliyankipaqnatsu. Lapan imaykaykitapis shumaq disponinaykipaq testamentuykita ruratsikuy’ ”.
2 Tsayno niptinmi Ezequías wayi perqa kaq lädupa tikrakushpan TAYTA DIOSTA manakur
3 kayno nirqan: “TAYTA DIOS, lapan shonqüwan cäsukur munashqaykino kawashqäta yarpaykulay”.
Tsayno nir lakikushpanmi fiyupa waqarqan.
4 Tsayno ruwakuptinmi Isaíasta TAYTA DIOS kayno nirqan:
5 “Kutiykur Ezequíasta kayno wilanki: ‘Unay ayluyki David sirvishqan TAYTA DIOSMI kayno nin: Mayashqämi waqar manakamashqaykita. Tsaymi qeshyashqaykipita aliyätsishayki. Chunka pitsqa wata masraqmi kawankipaq.
6 “ ‘Kawashqaykiyaqqa qamta y Jerusalén markatapis Asiria nacionpa mandaqnin reypa makinpita salvashaykimi.
7 Tsay nishqäta cumplinäpaq kashqanta musyanaykipaq juk milagrutami rurashaq.
8 Acazpa relojnincho señalashqan chunka grädatami lantuyta qepaman kutitsishaq’ ”.
Nishqannölami intipa lantuynin relojcho chunka grädata qepaman kutirqan.
9 Judá nacionpa mandaqnin rey Ezequías qeshyashqanpita aliyarkurmi kay alabanzata qelqarqan:
10 Noqa yarparqä mözularaq kaykar wanunäpaq kashqantami.Tsaynöpis yarparqä wanushkuna kashqanman aywakur manana imaypis atsikyaq patsata rikanäpaq kashqantami.
11 Tsaynöpis yarparqä kay patsacho Tayta Diostapis ni runakunatapis manana rikanäpaq kashqantami.*
12 Uysha täpana tsuklata ushakätsiqnömi ushakätsimanki, Tayta Dios.Awaq runa telarcho awata ruturir jitariqnömi kacharimashqanki.Atsikyaq patsatapis ni tsakaytapis manana rikanäpaq elaqpitami apakamayta munashqanki.
13 Tulükunata león kapchumaptin nanaywan qaparaqnömi warayta qamta ruwakushqä.Tsakaypapis junaqpapis nakatsimashqankimi.
14 Grüllakuna y wayanaykuna* waqaqnömi nanämaptin waqashqä.Paluma waqashqannöraqmi nanämaptin atashqä.Nawïpis utikashqanyaqmi manakamur ciëlupa nukirämushqä.Fiyupami nakashqä. ¡Kuyapaykalämay TAYTA DIOS!
15 Kikiki castigamaptikiqa alfin imanäshaqtaq.Wanushqäyaqmi fiyupa lakikur uysuräkushaq.
16 Tayta Dios, runakunaqa corrigiptikiraqmi munashqaykino kawananpaq tantiyakärin.Noqapis corrigimaptikiraqmi munashqaykino kawanäpaq tantiyakushqä.Kananqa aliyätsimashpaykimi kawayta qomashqanki.
17 Tsaymi nakanäpa trukan alina kawaykä.Lapan jutsa rurashqäkunatapis perdonamashqankimi.Wanunäpaqna kaykaptïpis salvamashqankimi.
18 Wanushqakunaqa mananami alabashunkinatsu.Alpaman kutiqkunaqa promitishqaykita cumpliptikipis manami rikannatsu.*
19 Kawaqkunami itsanqa alabapäkushunki.Tsaynölami noqapis kanan qamta alabaykä.Promitishqaykita cumplishqaykitami tsurinkunatapis taytan wilapan.
20 TAYTA DIOS, qammi wanuypita salvamanki.Tsaymi templuykicho arpata tukashpä waran waran imayyaqpis alabashayki.
21 Ezequías aliyänanpaqmi Isaías kayno nirqan: “Hïgusta aqarkur reypa qerinman emplastuta churapay. Tsay emplastuwanmi aliyanqapaq”.
22 Tsaymi rey Ezequías Isaíasta tapurqan kayno nir: “¿Imanöpataq musyashaq TAYTA DIOS aliyätsimaptin templunman aywanäpaq kashqanta?”
Ichic wilacuycuna
^ 38.11 Kay versïculucho nishqanqa kay patsacho Tayta Diospis ni runakunapis yanapamashqanta mananami probichashaqnatsu ninanmi.
^ 38.14 Grüllaqa llikulliku niraqmi. Itsanqa jatunmi kaykan. Wayanay ninanpa trukan wakin runakunaqa waqya pishqu nipäkun.
^ 38.18-19 Sal. 88.10-12.
