Isaías 4:1-6
4 Tsay witsanqa walkalanami kawaykar quëdaqkuna kanqa. Tsaymi qanchis warmikuna juk runalata ruwakur kayno nipäkunqa: “Mikupäkunäpaq kikïkunami arukärishaq. Röpäkunatapis kikïkunami rurakärishaq. Itsanqa japala kashqäpita pipis mana jamurpämänanpaq noqakunapapis runä kaykulay”.
Shamuq watakunacho kushishqa kawananpaq nishqan
2 Tsay witsanmi TAYTA DIOS tsintsitsimushqan kuyaylapaq y kushikuypaq kanqa.Mikuy ali poquptinmi kawaykar quëdaqkuna kushishqa y respitashqa kanqa.
3 Tsaymi *Sión jirkancho quëdaqkunapaq y Jerusaléncho kachaykushqan kaqkunapaq runakuna kayno nipäkunqa:“Paykunaqa Tayta Diosta sirviq *santu runakunami karkaykan”.Tsay nishqannömi kanqa Jerusaléncho padrunashqa kaqkuna.
4 Jerusalén runakunata Tayta Dios castigarmi jutsa ruraq kashqanpita y wanutsikuq kashqanpita maylanqa.
5 Nirkurmi yana pukutayta yuritsimur Sión jirkanta y tsaycho juntaraykaq runakunata lantupanqa.Tsay pukutaymi jatun toldu mashtaraqno paykunata tsapanqa.Tsakaypanami fiyupa atsikyaq ninata yuritsimunqa.Tsay jananpami Tayta Diospa chipchipyaynin kaykanqa.
6 Tsaynöpami fiyupa shanaypis mana rupanqatsuni tamyapis mana ushmanqatsuni shukukuy wayrapis mana apanqatsu.
Ichic wilacuycuna
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
