Isaías 40:1-31
40 Tayta Diosnintsimi kayno nin:“Kuyashqä runakunata shoqaykulay.
2 Jerusalén mana lakikunanpaq ali shimilaykipa wilapäkuy.Shumaq castigarkurmi jutsa rurashqanta perdonashqä”.
3 Juk runami qayaraypa wilakur kayno nin:“TAYTA DIOS shamunanpaq chunyaq jirkacho nänita altsapäkuy.Wenqu nänikunata derechapäkuy.*
4 Raqrakunatapis pampatsapäkuy.Jirkankunatapis parijapäkuy.Wiksu nänikunatapis derechapäkuy.Uchku uchkukunatapis pampatsapäkuy.
5 TAYTA DIOS shamurnami munayninwan salvanqa.Tsaytaqa maytsaycho taq runakunami rikapäkunqa.*Kikin TAYTA DIOSMI tsayno kananpaq nishqa”.
6 “Lapan kalpaykiwan qayakuy” nimaqtami mayarqä.Tsaymi kayno tapurqä: “¿Imatataq qayakuypa nishaq?”Tsayno tapuptïmi kayno nimarqan:“Lapan runakunapis qewano ushakaqlami.Munayniyuq kashqanpis waytano pasaqlami.
7 Akaq wayrata TAYTA DIOS pükaramuptinqa qewapis tsakikäkunmi, waytapis shushukäkunmi.Runakunaqa rasunpami qewanöla kaykan.
8 Qewapis tsakinmi y waytapis shushunmi.Tayta Diosnintsipa palabranmi itsanqa imayyaqpis kaykanqa”.*
9 *Siónman ali wilakuyta apaq runa, jirkan jananman witsarkur pïmaypis mayashunaykipaq lapan kalpaykiwan qayakuy.Jerusalénman ali wilakuyta apaq runa, mana mantsakuypa qayakuy.Judá markakunacho taqkunata kayno niy:“¡Tayta Diosnintsiqa kaychönami kaykan!”
10 Munayniyuq TAYTA DIOSMI shamunqa.Poderniyuq karmi contrankunata vincirkur kuyashqan runakunata shuntamunqa.
11 Uysha mitsiq runa malwata marqakurkur apaqnömi apamunqa.*Tsayraq wachashqa uyshakunatanömi ali rikanqa.
Tayta Dios munayniyuq kashqan
12 ¿Piraq Tayta Diosno maki paltanwan chaqaylapa lamarta tupunman?Jana patsatapis Tayta Dios cuartaypa tupushqanno ¿piraq tupunman?Kay patsacho alpatapis ¿piraq Tayta Diosno lapanta pësanman?Jirkakunatapis y jirkankunatapis ¿piraq Tayta Diosno balanzawan pësanman?*
13 TAYTA DIOS yarpashqankunata ¿pilaqa musyantsuraq?Yachaq kananpaq ¿pilaqa payta yachatsintsuraq?*
14 Tayta Diosqa ¿pitapis manakuntsuraq tantiyatsinanpaq?Tayta Diosta ¿pilapis tantiyatsinmantsuraq ali kashqanta mana ali kashqantapis?Yachaq kananpaq ¿pilaqa payta yachatsinmantsuraq?
15 Yaku jutuynölami lapan nacionkunapis Tayta Diospaqqa kaykan.Balanzacho polvunölami lapanpis kaykan.Islakunacho kaykaq nacionkunapis juk purash aquyshanölami kaykan.
16 Intëru Líbanucho kaq yörakunata altarman churar rupatsiptintsipis y tsaycho kaq uywakunata pishtaptintsipis manami aypanmantsu Tayta Diospaq sacrificiuta rupatsinantsipaq.
17 Tayta Diospaqqa lapan nacionkunapis manakaqnölami kaykan.
18 Tayta Diosta ¿imamanraq tinkutsishwan?¿Ima ïdulutaraq pay niraqta rurashwan?
19 Ïdulutaqa moldiwanmi rurapäkun.Yachaq runami qoriwan enchapan.Qoripita rurarkurmi walqata walqapan.
20 Qorita mana tarirqa mana puyuq qerutami laqlayta yachaq runaman apapan.Tsay runanami shumaq ichiraq ïduluta rurapan.*
21 Tayta Diospaqqa ¿manaku mayarqayki?¿Manaku nawpapita patsa nishurqayki?¿Manaku kay patsata kamashqanpita patsa wilakärirqan?
22 Tayta Diospa trönunqa ciëlu jananchömi kaykan.Tsaypita patsami chuklustanöla runakunata rikamun.Tolduta runa mashtaqnömi ciëlutapis mashtamun.
23 Munayniyuq runakunatapis manakaqmanmi churan.Kay patsacho reykunatapis ushakätsinmi.
24 Ushakätsiptinmi imaypis mana plantashqano, imaypis mana murushqano y imaypis mana sapitsashqano elqakäkun.Tayta Dios pükariptinqa qewa wanukäkuqnömi paykuna wanupäkun.Oqshata wayra apaptin elqaqnömi lapan elqakanqa.
25 *Santu Tayta Diosmi tapumantsi kayno nir:“Qamkuna ¿imamanraq tinkutsimankiman?¿Piraq noqaman tinkunman?”
26 Ciëlupa nukirkushpantsi tantiyakushun qoylarkunata pï kamashqantapis.Lapan qoylarkunata Tayta Diosmi yupan.Lapantapis jutinpa jutinpami reqin.Tayta Dios munayniyuq y kalpayuqmi kaykan.Tsaymi tsay qoylarkuna juklaylapis mana oqrakantsu.
27 Jacobpita miraq runakuna, ¿imanirtaq nipäkunki TAYTA DIOS mana kuyapäshushqaykita?Israel runakuna, ¿imanirtaq nipäkunki mana cäsushushqaykita?
28 TAYTA DIOSQA imayyaqpis kawaqmi kaykan.¿Manaku tsayta musyapäkunki?¿Manaku tsayta mayapäkushqanki?Paymi intëru kay patsata kamarqan.Pay manami janjampaykachantsu ni utikantsu.Pay yarpashqanqa mana atipaypaqmi kaykan.
29 Utikashqa runakunatapis paymi yanapan.Janjampaykachaq runakunatapis paymi kalpata qon.
30 Mözukunapis mözu kaykar utikanmi.Kalpasapa kaqkunapis kalpan ushakaptin tuninmi.
31 TAYTA DIOSMAN yärakuqkunami itsanqa kalpayuq rikakun.Paykunaqa anka päriqnöraqmi aywapäkun.*Mayjina cörrirpis manami utikantsu.Mayjina aywarpis manami bëtantsu.
Ichic wilacuycuna
^ 40.3-5 Luc. 3.4-6.
^ 40.6-8 Stg. 1.10-11; 1Ped. 1.24-25.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 40.11 Eze. 34; Luc. 15.5; Juan 10.11.
^ 40.12 Job 38.4-11; Prov. 8.29.
^ 40.13 Rom. 11.34; 1Cor. 2.16.
^ 40.18-20 Isa. 41.6-7; 44.9-20; Jer. 10.1-16; Hech. 17.29.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 40.31 Sal. 103.5.
