Isaías 44:1-28
44 “Jacobpita miraq sirvimaqnïkuna, akrashqä Israel runakuna, shumaq mayapäkamay.
2 Kamashuqniki TAYTA DIOS karmi kayno nï:Jacobpita miraq sirvimaqnïkuna, ama mantsakäriytsu.Jesurún runakuna,* * akrashqä runakunami karkaykanki.Mamaykipa pachanchömi qamkunata kamashqä.Qamkunata yanapanäpaqmi kaykä.
3 Chunyaq jirkakunachöpis noqami yakuta pashtatsimushaq.Tsaki pampakunapapis mayunöraq yaku aywananpaqmi kamakätsishaq.Qamkunapita miraqkunamanmi Espïritüta kachamushaq.Paykunami bendicionnïta chaskipäkunqa.
4 Qewa loqluypa loqlur winaqnömi kapäkunqa.Mayu kuchunkunacho sauci verdiraqnömi kapäkunqa.*
5 Wakinmi kayno nipäkunqa: ‘Kikin TAYTA DIOSPAMI kaykä’.Wakinnami Jacob jutin kananpaq churakärinqa.Wakin kaqnami makinkunaman jutïta qelqanqa.Israeltami jutinkunatapis churakärinqa”.
6 Israel runakunata salvaq rey y lapanta mandaq TAYTA DIOS kaynömi nin:“Noqami qalaykunan y ushanan kaykä.*Noqapita mas juk Dios manami kantsu.
7 ¿Pilaqa noqano kantsuraq?Karqa mä shamur nimätsun.Ima pasananpaq kaqta ¿pilapis unaypita patsa parlashqatsuraq?Ima pasananpaq kaqtapis mä wilashunki.
8 “Ama mantsakäriytsu.Unaypita patsami qamkunata wilashqä ima pasananpaq kaqtapis.Qamkunaqa testïgükunami kaykanki.Noqapita mas juk Dios manami kantsu.Manami mas juk kantsu tsapäshunaykipaq.Mas jukta manami reqïtsu”.
Ïdulu adoray mana ali kashqan
9 Ïdulukunata ruraqkuna* manami imapaqpis välintsu.Mayjina kuyaylapaqta rurashqanpis manami välintsu.Ïduluta adoraqkunapis toqshun tsakishqami kaykan.Kikinkunapis penqaytukushqami kanqa.
10 Diosnin kananpaq ïduluta rurarqa tiemputami perdirkaykan.
11 Ïdulu ruraqpis manami Diostsu kaykan, sinöqa runalami.Tsaymi ïduluta ruraqpis y adoraqpis juzgaptï pasaypa mantsakur penqakärinqa.
12 Maski tantiyakushun herrëru imano ïduluta rurashqantapis.Fiërrutami pukayashqanyaq shanshacho waylatsin.Nirkurmi combuwan y cincilwan takaykälar munashqanno kananpaq ruran.Tsayno arur yarqanaptinmi kalpanpis ushakan.Yakulatapis mana upurqa pasaypami janjampachan.
13 Carpintërupis metrunwanmi qeruta tupun.Imano rurananpaqpis läpizwanmi dibujan.Formonwan takapaylapami laqlan.Shumaq yarqunanpaq compaswanmi dibujan.Tsaynöpami tsay ïduluta kuyaylapaq runatano ruran.Rurayta usharkurnami ïdulupaq rurashqan wayiman churan.
14 Wakin runami cedruta, cipresta y encinata muturir ïduluta ruratsinanpaq apamun.Wakinnami pïnuta plantan tamyawan winarkuptin ïduluta ruratsinanpaq.
15 Tsay apamushqan yörakunapita ïduluta ruraykurmi nawpanman qonqurpakun.Putsuq kaqtami yantapaq tseqtan.Wakin yantawanmi mashakunanpaq ninata ratatsin.Wakin yantawanmi tantata masarananpaq hornuta waritsin.
16 Wakin yantawannami ninata ratarkatsir aytsata kankan saksashqanyaq mikunanpaq.Ninacho mashakurmi kayno nin:“Nina nawpanchöqa qoñuptin maypis jamaräkuypaqmi kaykan”.
17 Ïduluta tsayno ruraykurmi nawpanman qonqurpakun.Tsaychömi adorashpan kayno nir manakun:“¡Qammi kanki diosnï! ¡Salvaykalämay!”
18 Tsay runakunaqa manami musyantsu ni cuentatapis qokuntsu.Nawin wichqashqano karmi mana tantiyakärintsu manakaqta rurapäkushqanta.
19 Tantiyakunanpaqpis manami juiciun kantsu.Manami shumaq yarpachakuntsu.Shumaq yarpachakurqa kayno nirmi tantiyakunman:“Pulan kaq qeruta tseqtarirmi tsaywan yanukushqä.Shanshanchönami tantata kuwashqä.Tsaychömi aytsatapis kankarkur mikushqä.Tsaypita putsuq kaq qeruwan manami ïduluta rurämantsu.Mutushqä taksha qeruman manami qonqurpakümantsu”.
20 Ïduluta adoraq runaqa uchpata mikuqno karmi mana tantiyakuq kaykan.Lutanta yarparmi tsayno ruraykan.Manami tantiyantsu alawqa kaq makincho aptaraykashqan ïdulu mana väliq kashqanta.
Israel runakunata Tayta Dios perdonar salvashqan
21 “Jacobpita miraq Israel runakuna, tsay nishqäkunata ama qonqapäkuytsu.Qamkunaqa sirvimaqnïmi karkaykanki.Noqami qamkunata kamashqä.¡Ama qonqapäkamaytsu!
22 Lapan jutsa rurashqaykikunatami perdonashqä.Pukutayta elqätsishqänömi jutsaykikunata elqätsishqä.Qamkunata salvaykaptïqa yapay noqaman yärakamay”.
23 Jana patsa, ¡TAYTA DIOS salvakuq kashqanpita kushikur cantay!¡Patsa rurincho kaqkunapis, vivar qaparpay!¡Jirkakuna, fiyupa kushikushpayki fuerti cantapäkuy!¡Munticho kaykaq yörakuna, lapayki kushikur cantapäkuy!¡Jacobpita miraq Israel runakunata TAYTA DIOS salvashqanami!¡Munayniyuq kashqanta musyatsishqanami!
24 Israel runakuna, mamaykipa pachancho kamashuqniki y salvashuqniki TAYTA DIOS kaynömi nin:“Noqami imaykatapis kamaq TAYTA DIOS kaykä.Jana patsatapis kikï kamarkurmi mashtamushqä.Pipis mana yanapaykämaptinmi kay patsatapis kamashqä.
25 “Lula profëtakuna wilakushqanno mana kamakänanpaq noqami tsapata churapä.Rikakuqkunatapis noqami manakaqman churä.Yachaqkuna lutanta yätsinanpaqpis yarpayninta noqami pantakätsï.Nishqankuna mana välinanpaqpis noqami kamakätsï.*
26 Sirvimaqnï wilakushqantami itsanqa cumplitsï.Wilakuqnïkuna nishqannöla kananpaqmi kamakätsï.Jerusaléncho runakuna yapay tänanpaqpis noqami nï.Judácho markakunata raqälana kaykaqtapis yapay marka kananpaq noqami kamakätsï.
27 Noqa niptïqa lamar yakupis tsakikäkunmi.Noqami mayukunatapis tsakitsï.
28 “Noqami rey Cirupaq kayno nï:‘Uysha mitsiqnï karmi lapan munashqäta ruranqa’.Tsaymi Jerusalénta Ciro altsatsinqa.Tsaynölami templupa cimientunta perqatsinqa”.*
Ichic wilacuycuna
^ 44.2 Jesurún ninanqa ali kawaq ninanmi. Tsayno nirqan Israel runakunatami.
^ 44.2 Deut. 32.15; 33.5, 26.
^ 44.6 Isa. 41.4; 48.12; Apoc. 1.17; 22.13.
^ 44.25 1Cor. 1.20.
^ 44.28 2Crón. 36.23; Esd. 1.2.
