Isaías 45:1-25
45 Ciruta TAYTA DIOS kaynömi nin:“Qamtami akrashqä rey kanaykipaq.Makïwanmi yanapashayki nacionkunata munaynikiman churanaykipaq,munayniyuq reykunata ushakätsinaykipaqy marka punkuta kichapäshunaykipaq.Tsay punkutaqa manami pipis wichqapäshunkitsu.
2 Kikïmi nawpaykita aywar altu jirkakunatapis pampatsashaq.Bronci punkukunatapis pakirmi ushashaq.Fiërru trancakunatapis aqulurmi ushashaq.
3 Chanin cuestaq tesörukunatami kamaripäshayki.Pakaraykaq riquëzakunatami kamaripäshayki.Tsaynöpami musyankipaq Israel runakunata kuyaq TAYTA DIOS kashqäta.Tsaynömi musyankipaq kikï jutikipa qayashqäta.
4 “Kuyashqä sirvimaqnï Jacob raykumi y akrashqä Israel runakuna raykumi mana reqiykämaptikipis jutikipa qayar qamta akrashqä.
5 Noqami TAYTA DIOS kä.Noqapita mas juk Diosqa manami kantsu.Mana sirviykämaptikipis geniuyuq kanaykipaqmi yanapashayki.
6 Tsayno yanapashayki kay patsapa kuchunpita jukaq kuchunyaq noqala TAYTA DIOS kashqäta pïmaypis musyapäkunanpaqmi.Noqami TAYTA DIOS kä.Noqapita mas juk Diosqa manami kantsu.
7 Noqami kamakätsï junaq kananpaq y tsakay kananpaqpis.Noqami kamakätsï bendición kananpaq o desgracia kananpaqpis.Noqa TAYTA DIOSMI lapan tsaykunata kamakätsï”.
Tayta Dios kamakuq kashqan
8 “Jana patsa kichakätsun.Pukutaypita tamya chayamuqno kay patsaman salvación chaykalämutsun.Kay patsacho salvaciontapis y ali kawaytapis chaskikäritsun.Noqa TAYTA DIOSMI tsayno kananpaq kamakätsï.
9 “¡Wawalaw, imanöraq kanqa kamakuqninwan churakaqkuna!Qamkuna mitu mankanöla kaykashpayki manka ruraqta ‘¿imanirtaq kay niraqta ruraykämanki?’ ¿ninkimantsuraq?‘Mana alitami ruramashqanki’ ¿ninkimantsuraq?*
10 Wamrapis manami mamanta y taytanta kayno ninmantsu: ‘¿Imapaqtaq ruramarqayki?’ ”
11 Kamaqnin karmi Israel runakunapa *santu TAYTA DIOSNIN kayno nin:“Wamräkuna kaptikimi munashqäno qamkunata ashmaykä.Imano ashmashqäpitapis ¿jamurpämankimantsuraq?Qamkunata wara warantin imano rikanäpaqpis ¿yätsimankimantsuraq?
12 “Noqami kay patsata kamashqä.Tsaycho tänanpaqmi runatapis kamashqä.Jana patsatapis makïwan mashtaykurmi lapan qoylarkunatapis tsayman churashqä.
13 Noqami rey Cirutapis lapanta vincinanpaq yanapashaq.Lapan rurashqankunapis ali kananpaqmi kamakätsishaq.Paymi Jerusalén markäta altsatsinqa.Prësu apashqan Israel runakunatapis päguta mana cobraylapami kacharimunqa”.Lapanta mandaq TAYTA DIOSMI tsayno nin.
14 Israel runakunatami TAYTA DIOS kayno nin:“Egipto runakunapa y Etiopía runakunapa riquëzankuna qamkunapanami kanqa.Sabá nacionpita jatusaq runakunapis makikichömi kanqa.Paykunaqa cadinawan liyashqami qepaykita shapäkamunqa.Nawpaykiman qonqurpakuykurmi kuyapänaykipaq kayno nipäkushunkipaq:‘Rasunpami Tayta Dios yanapaykäshunki.Paypita mas juk Diosqa manami kantsu’ ”.
15 Tayta Dios, Israel runakunata salvaq y mana rikakaq Diosmi kaykanki.
16 Ïduluta ruraqkunaqa lapanmi penqakärinqa.*
17 Noqakunatami itsanqa salvapäkamanki.Salvamaptikimi chikimaqnïkuna imaypis manakaqman churamanqanatsu.
18 TAYTA DIOSMI jana patsata kamashqa.Kay patsatapis kamarkur shumaqmi jamatsishqa.Manami manakaqpaqtsu kamashqa, sinöqa runakuna tänanpaqmi kamashqa.Paymi kayno nin:“Noqami TAYTA DIOS kä.Noqapita mas juk Diosqa manami kantsu.
19 Manami tsakaqninman ni pakakunanman aywaykurtsu imatapis parlä.Jacobpita miraqkuna manami manakaqlapaq *ashimänanpaqtsu nï.Noqa TAYTA DIOSQA rasun kaqlatami parlä.Ali kaqlatami musyatsï”.
Ïdulukunata manakaqman churashqan
20 “Juk nación runakuna mana tantiyashpanmi qerupita rurashqa ïdulunkunata umrushqa puritsipäkun.Mana salvaykaptinpis tsaykunatami manakärin.Tsay runakunatami kayno nï:Qamkunata tapunäpaq juntakarkur shapäkamuy.
21 Imata yarpashqaykitapis mä nipäkamay.Kikikikunapurapis mä tapunakäriy.¿Pitaq unaypita patsa nirqan kanan kashqanno imapis pasananpaq kashqanta?¿Manaku noqa TAYTA DIOS tsaykunata wilarqä?Noqapita mas juk Diosqa manami kantsu.Noqapita mas juk manami kantsu alilata ruraq y imaykapitapis salvaq.
22 “Patsapa kuchuncho taqkunapis, cäsukamar yärakamay.Yärakamaptikiqa salvashaykimi.Noqalami Dios kä.Noqapita mas juk Diosqa manami kantsu.
23 Lapanmi nawpäman qonqurpakamunqa.Lapanmi cäsukamänanpaq nimanqa.Tsayno kananpaq kashqanta kikïpa jutïchömi jurashqä.Imatapis kamakätsinäpaq nirqa mana qonqaypami kamakätsï.*
24 “Tsaymi runakuna kayno nipäkunqa:‘Munayniyuq TAYTA DIOSLAMI salvamaqnintsi’.Contran sharkuqkunami itsanqa paypa nawpancho penqaytukushqa puripäkunqa.
25 TAYTA DIOS salvaptinmi Israel runakuna pay munashqanno kushishqa kawapäkunqapaq”.
Ichic wilacuycuna
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 45.16 Isa. 42.17.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ 45.23 Rom. 14.11; Fil. 2.10-11.
