Isaías 47:1-15
47 Tayta Diosmi kayno nin:“Babilonia nación, trönuykipita yarqurir pampaman jamakuy.*Kananpitaqa mananami pipis kuyaylapaq kashqaykita nishunkinatsu.
2 Ashmay warminöla maraycho machkaykita aqakuy.Shukutaraykashqayki jakuykita jorquyna.Mama chankayki rikakashqanyaq träjikita qarikurkur mayukunatapis päsay.
3 Qarapächu kaptikimi penqaynikita pïmaypis rikanqa.Lutanta rurashqaykipita castigaptï manami pipis salvashunkipaqtsu”.
4 Tsaynömi nin Israel runakunapa *santu Tayta Diosnin.Paymi salvamaqnintsi kaykan.Paypa jutinmi kaykan lapanta mandaq *Yahweh.
5 “Babilonia nación, tsakaqman yaykuykur upälala jamaräkuy.Mananami pipis nacionkunapa mandaqnin reina kashqaykita nishunkinatsu.
6 “Kuyashqä Israel runakuna rabyanätsimaptinmi makikiman kachapaykurqä.Castiganaykipaq kachapaptïpis aläpami nakatsishqanki.Awkinkunatapis lasaq yüguta matankanman watapaqnömi mana kuyapaypa nakatsishqanki.
7 Imayyaqpis reinala kanaykipaq kashqanta yarparmi lutanta ruraykashqaykitapis mana tantiyakushqankitsu.Ushakänaykipaq kaqta manami imaypis yarpashqankitsu.
8 “Babilonia marka, shumaq mayamay.Trönuncho mana yarpachakuypa jamaraq warmino karmi shonqulaykicho kayno niykanki:‘Manami pipis noqano kantsu.Manami imaypis viüdayäshaqtsu ni wawaynaqpis rikakushaqtsu’.
9 Tsayno niykarpis elaqpitami viüdayankipaq y wawaynaq rikakunkipaq.*Tsay junaqqa manami brüjuykikunapis ni rikakuqnikikunapis tsapäshunkipaqtsu.
10 “Mana alikunata ruraptiki pipis mana rikashushqaykitami yarpashqanki.Musyaq yachaq kashqaykita yarparmi pantakashqanki.Shonquykichömi nirqayki pipis qamno mana kashqanta.
11 Tsayno niptikipis elaqpitami desgracia pasashunkipaq.Tsaypita imano salvakuytapis manami kamäpakunkipaqtsu.Tsay desgraciawanmi chipyaq ushakankipaq.
12 “Unaypita patsa brüju kashqaykiwan mä ima desgracialapitapis tsapakunkikush.Brüju kayta sïguir mä pilatapis mantsakätsinkikush.
13 Yätsishuqnikikuna yätsishushqaykitapis ajayashqankinami.Cada killa imano kanaykipaq kaqtapis wilashunaykipaq qoylar estudiaqkunapis manami kannatsu.Kanan mä salvashunaykipaq shapäkamutsun.
14 “Qamqa yarpanki tsay runakuna mashakunaykipaq shanshano kashqanta.Tsayno yarpaptikipis manami tsaynötsu kaykan, sinöqa nina ushananpaq oqshanölami kaykan.Tsaymi Tayta Diospa castïgunpita imanöpapis salvakuyta mana kamäpakunqatsu.
15 Wamra kashqaykipita patsa rikatsikushqayki brüjuykikunapis lapanmi ushakanqa.Kawaq kaqkuna qeshpir aywakäriptin manami pipis salvashunaykipaq kanqatsu”.
Ichic wilacuycuna
^ 47.1-15 Isa. 13.1—14.23; Jer. 50.1—51.64.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ Yahweh Yahwehtami wakin traduccionkuna castellänucho traducin Jehová nir, wakinmi traducin Yavé nir, wakinmi traducin Yahweh nir y wakinnami traducin EL SEÑOR nir. Quechua Bibliachöpis Yahweh atska kutimi traduciraykan TAYTA DIOS nir.
^ 47.8-9 Apoc. 18.7-8.
