Isaías 51:1-23
51 TAYTA DIOSMI kayno nin:“Alita rurar kawayta munaqkuna, mayapäkamay.Lapan shonquykiwan manakamaqkuna, mayapäkamay.Tantiyakäriy mayqan qaqapita qamkunata jorqamushqäta.Tantiyakäriy maynincho kaykaq rumikunapita yarqapäkamushqaykitapis.*
2 Yarpapäkuy unay ayluyki Abrahampaq y Sarapaq.Qayashqä höra paykunaqa wamraynaqlami karqan.Bendicionnïwanmi paypita miraqkuna atskaman mirapäkurqan.*
3 Tsaynölami raqälana kaykaq *Siónmanpis bendicionnïta yapay churashaq.Chunyaq jirkano kaptinpis Edén huertano kananpaqmi tikratsishaq.Tsaymi Siónchöqa pasaypa kushikur alabapäkamanqa.*
4 “Kuyashqä runakuna, shumaq mayapäkamay.Israel runakuna, shumaq tantiyakäriy.Leynïkunata maytsaychömi wilakärinqa.Yachatsikuynïta chaskikurmi intëru markakunacho atskichönöna kawapäkunqa.
5 Kuyashqä runakunata salvanäpaq walkalanami pishiykan.Lapan nación runakunata jutsata rurashqanman tupumi juzgashaq.Karu nacioncho taq runakunapis noqalaman yärakamarmi shuyarpaykämanqa.
6 Jana patsata rikar yarpachakäriy.Kay patsata rikar tantiyakäriy.Jana patsaqa qoshtaynölami elqanqa.Kay patsapis röpa ushakaqnölami ushakanqa.Tsaynölami runakunapis chuspinöla ushakanqa.Salvacionnïmi itsanqa imaypis mana ushakanqatsu.Munashqäqa imaypis rurakanqami.*
7 “Yachatsishqäkuna imano kashqantapis musyaqkuna, mayapäkamay.Leynïkunata chaskikuq runakuna, mayapäkamay.Runakuna tukuyta ashlishuptikipis ama lakikäriytsu.Imata nishuptikipis ama jaqayaytsu.
8 Röpata y milwata puyu ushaqnömi tsay runakunata kuru ushanqapaq.Salvacionnïmi itsanqa imaypis mana ushakanqatsu.Munashqäqa imaypis rurakanqami”.
9 ¡Rikchayna, TAYTA DIOS!Lapanpaq munayniyuq kashqaykita musyatsiyna.Unay watakuna rurashqaykino kananpis ruraykuy.¿Manaku *Rahab uywatapis elqätsishqanki?*
10 ¿Manaku lamar yakutapis tsakitsirqayki?¿Manaku salvashqayki runakuna pasamunanpaq nänimanna tikratsirqayki?*
11 Tsaynölami kananpis salvamushqayki runakuna cantaraykar Siónman kutipäkamunqa.Tsaychöqa imaypis kushishqami kawapäkunqa.Lakikuypis waqaypis manami kanqanatsu.*
12 Tayta Diosmi kayno nin:“Kikïmi qamkunata shakyätsï.Runakuna qewano ushakaqla kaykaptinqa ¿imanirtaq paykunata mantsakunki?
13 Kamashuqniki TAYTA DIOSMI kaykä.Noqami jana patsatapis y kay patsatapis kamashqä.¿Tsayno kashqäta musyaykarku qonqaykamashqanki?Chikishuqniki runakuna ushakätsishunaykipaq kashqanta musyarmi waran waran pasaypa mantsakashqa karkaykanki.Mantsakuptikipis tsay jurapäshuqniki runakuna ushakänanpaqnami kaykan.
14 Prësu apapäkushqantapis kacharimunqanami.Apashqan runakuna manami carcilchötsu wanunqani mikuytapis mana pishïpakunqatsu.
15 “Noqami TAYTA DIOSNIKI kaykä.Lapanta mandaq *Yahwehmi jutïpis kaykan.Lamarpis pulchaqyänanpaq niptïqa qapararmi pulchaqyan.
16 Jana patsata mashtarmi kay patsatapis shumaq takyatsishqä.Wilakuynïta wilakunaykipaqmi qamkunata churashqä.Ima desgraciapitapis makïwanmi tsapashqä.Sióntami kayno nirqä: ‘Akrashqä markami kanki’ ”.
Jerusalén runakunata Tayta Dios manana castigananpaq nishqan
17 ¡Jerusalén marka,* apurädu rikchay! ¡Jukla sharkuy!Cöpa junta winaraykaq rabyayninta uputsishushpaykimi TAYTA DIOS fiyupa castigashushqanki.Tsaymi sharkuytapis mana kamäpakushqanyaq shinkashqa runano kaykanki.*
18 Atska wawaykikuna kashqa kaptinpis manami juklaylapis kannatsu pusharäshunaykipaq.Lapan ashmashqayki wawaykikunapita manami juklaylapis kannatsu jancharäshunaykipaq.
19 Ishkay desgraciami pasashushqanki.Juk kaykan nacionnikita ushakätsir imaykaykitapis apakushqan.Jukaqnami kaykan muchuy y guërra.¿Pilaraq kuyapaykushunki?¿Pilaraq shoqaykushunki?
20 Toqla* tsariptin luychu jitaraqnömi wawaykikunapis cälli esquïnakunacho atäqui tsariptin jitarpaykan.TAYTA DIOSMI fiyupa rabyar tsayno castigashushqanki.
21 Jerusalén runakuna, musyämi lakikur shinkashqano kashqaykita.Manami vïnuwantsu shinkashqano kaykanki, sinöqa Diospa castïgunwanmi.Tayta Dios nishushqaykita kanan shumaq mayapäkuy.
22 Kuyashqan runakunapa favornin sharkuq TAYTA DIOS kaynömi nin:“Aptaraykashqayki castigakunä cöpata* qechushqänami.Kananpitaqa rabyar uputsishqä cöpata mananami upunkipaqnatsu.
23 Nakatsishuqniki runakunatanami tsay cöpata uputsishaq.Paykunami kayno nishurqayki: ‘Janaykipa pasanäpaq pampaman jitakay’.Tsayno jitakaptikimi pampata jaruqno jarur ushashurqayki”.
Ichic wilacuycuna
^ 51.1 Kay textucho unay aylun Abrahamta y Sarata tinkutsirqan qaqaman y rumikunamanmi. Tsaymi kay textu nirqan Israel runakunapa unay aylun Abrahamta y Sarata yanapashqanno kananpis Israel runakunata Tayta Dios yanapananpaq kashqanta.
^ 51.2 Gén. 12.1-3.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 51.3 Gén. 2.8; Eze. 36.35.
^ 51.6 Sal. 102.25-28; Mat. 24.35.
^ Rahab uywa Unay runakuna nipäkurqan Tayta Dios kay patsata kamashqan witsan Rahabqa lamarcho jatunkaray mantsakuypaq uywa kashqanta. Tsay uywa Tayta Diospa contran kaptinmi Tayta Dios vincirqan (Job 26.12; Sal. 89.10; Isa. 51.9).
^ 51.10 Éxo. 14.21-22.
^ 51.11 Isa. 35.10.
^ Yahweh Yahwehtami wakin traduccionkuna castellänucho traducin Jehová nir, wakinmi traducin Yavé nir, wakinmi traducin Yahweh nir y wakinnami traducin EL SEÑOR nir. Quechua Bibliachöpis Yahweh atska kutimi traduciraykan TAYTA DIOS nir.
^ 51.17 Kay versïculukunacho Jerusalén markata warmimanmi tinkutsin. Tsaymi Jerusalénpa wawankuna Jerusaléncho taqkuna kaykan.
^ 51.17 Jer. 25.15; Apoc. 14.10; 16.19.
^ 51.20 Wakin runakunaqa tsikla nipäkun.
^ 51.22 Kay textucho castïgunta Tayta Dios tinkutsin cöpamanmi.
