Isaías 52:1-15
52 ¡*Sión, rikchay, rikchay!¡Shumaq kalpatsakuy!¡*Santu Jerusalén marka, kuyaylapaq röpaykita jatikuy!*Diosta mana cäsukuq jäpa runakuna manami imaypis atacashunkipaqnatsu.
2 ¡Jerusalén, sharkur janaykicho kaykaq qanrata tapshikuy!Prësu kaykaq Sión, kunkaykicho wataraykaq cadinakunata jorqurir trönuykiman jamakuy.
3 TAYTA DIOSMI kayno nin:“Juk lädu nacionman prësu apashuptiki manami ima pägutapis chaskishqätsu.Tsaymi qamta jorqamushpä imatapis mana pägashaqtsu”.
4 TAYTA DIOSMI kayno nin: “Unaymi kuyashqä runakuna Egiptuman aywaykur tsaycho tarqan. Qepatanami manapis achäquita ashipaykaptin Asiria runakunana nakatsishqa.
5 Tsaymi kayno nï: Kananqa ¿imanataq pasashqa? Imatapis mana pägamaypami kuyashqä runakunata juk lädu nacionman apakärishqa. Munaynincho tsararaqkunaqa ali tukushpanmi asipan. Waran waranmi manakaqman churapäkaman.*
6 Tsaymi tiempun chayamuptin kuyashqä runakuna rikapäkamanqa munayniyuq kashqäta. Promitishqäno salvaptïmi tantiyapäkunqa yanapaykashqäta”.
7 Jirkakunapa shamur ali wilakuyta apamuq runa pasaypa kushikuypaqmi kaykan.*Tsay wilakuq runami jawka kawanantsipaq kaqta y salvashqana kanantsipaq kaqta wilakun.Siónta kaynömi nin: “¡Tayta Diosnikimi lapanta mandaykan!”
8 Tsayta mayarmi rikachakuqnikikuna kushikuypita qaparpaykan.Siónman TAYTA DIOS kutimuqta rikashpanmi kushikärin.
9 Jerusaléncho kaykaq raqäkunapis, ¡kushishqa cantapäkuy!Kuyashqan runakunata TAYTA DIOSMI yanapanqa.Contrankunapita Jerusalénta salvanqanami.
10 Tsayno salvarmi maytsay nación runakunata TAYTA DIOS musyatsinqa munayniyuq kashqanta.Mayjina karu nación runakunapis rikanqami Tayta Diosnintsi salvamashqantsita.
11 ¡Babiloniapita witikäriy, witikäriy!¡Imatapis *impüruyätsikuqkunata ama yatapäkuytsu!¡Jäpa markacho tashqaykipita yarqukäriy!¡TAYTA DIOSPA manëjunkunata kutitsiqkuna, purificakäriy!*
12 Manami jananta rurintatsu yarqapäkunkipaq.Tsaynöpis manami qeshpiypatsu aywapäkunkipaq.Tsaypa trukanqa kikin TAYTA DIOSMI jorqushushpayki nawpaykita aywanqa.Qepaykitapis Israel runakunata kuyaq Tayta Diosmi aywanqa.
Sirviqnin nakananpaq nishqan
13 Sirviqninpaqmi Tayta Dios kayno nin:“Tantiyakäriy. Sirvimaqnï rurashqanqa lapanpis alimi kanqa.Paytami lapanpitapis mas munayniyuq kananpaq churanqa.Paymanqa manami pipis tinkunqatsu.
14 Contrankuna maqaptinmi qaqlanpis mana reqiypaq karqan.Tsaymi payta rikar runakuna pasaypa mantsakarqan.
15 Tsaypitanami maytsay nación runakuna espantashqa rikakärinqa.Reykunapis manami ima niytapis kamäpakunqatsu.Pipis mana wilapashqantami musyanqa.Imaypis mana mayashqantami mayanqa”.* *
Ichic wilacuycuna
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 52.1 Apoc. 21.2, 27.
^ 52.7 Nah. 1.15; Rom. 10.15; Efe. 6.15.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 52.11 2Cor. 6.17.
^ 52.15 Imaypis mana mayashqanqa Diospa sirviqnin fiyupa nakashqan y nirkur respitar adorashqanmi kanqa.
^ 52.15 Rom. 15.21.
