Isaías 55:1-13
55 Tayta Dios kaynömi nin:“Yakunaqkuna, yakuta upunaykipaq lapayki shapäkamuy.*Mikuyta rantinaykipaq qellayniki mana kaptinpis mikuq shapäkamuy.Vïnuta y lëchita mana pägaypa apanaykipaq shapäkamuy.
2 Mikuyta rantinaykipa trukan ¿imanirtaq qellaynikita manakaqkunacho usharkaykanki?¿Imanirtaq arupakur gänashqaykita lutankunacho usharkaykanki?Shumaq mayapäkamay.Cäsukamarqa ali mikuytami taripäkunkipaq.Ali alilata mikur kushishqami kawapäkunkipaq.
3 “Wiyamashpayki noqaman shapäkamuy.Nishqäta cäsukamarqa alimi kawapäkunkipaq.Rey Davidta kuyar promitishqäta cumplirmi* qamkunata yanapanäpaq *pactuta rurashun.Tsay pactuta imayyaqpis cumplishaqmi.
4 “Munayniyuq kashqäta maytsay nación runakunapis musyananpaqmi rey Davidta churashqä.Nacionkunapa mandaqnin y yachatsiqnin kananpaqmi churashqä.
5 Tsaynölami qamkunapis mana reqishqayki nación runakunata qayatsinkipaq.Mana reqishuqniki runakunami warakayla qamkunaman shapäkamunqa.Tsayno kanqa TAYTA DIOSNIKI kar qamkunata yanapaptïmi.Noqaqa Israel runakunapa *santu Diosninmi kä”.
6 Kawashqaykiyaq TAYTA DIOSTA *ashipäkuy.Kuyapaykäshushqaykiyaq ruwakäriy.
7 Jutsa rurashqaykita kachapäkuy.Manakaqkunata yarpachakunaykipa trukanqa TAYTA DIOSMAN kutikäriy.Diosnintsi karmi kuyapäshunki.Payqa imaypis perdonashunkimi.*
8 TAYTA DIOSMI kayno nin:“Noqapa yarpaynïqa manami qamkunapa yarpaynikinötsu.Noqa rurashqäkunapis manami qamkuna rurashqaykinötsu.
9 Kay patsapita mas altucho jana patsa kashqannömirurashqäkunapis qamkuna rurapäkushqaykipita mas ali kaykan.Yarpashqäkunapis qamkuna yarpashqaykipita mas alimi kaykan.
10 “Ciëlupita tamyapis ni rajupis manami kashqanman kutintsu.Tsaypa trukanqa alpata ushmarmi ali wayunanpaq murushqankunata winatsimun.Tsaynöpami murupis yapay murunanpaq kaykan.Runa mikunanpaqpis mikuy kanqa.*
11 Palabräpis tamyanömi kaykan.Kachamuptïmi imaypis munashqäta ruran.Manami manakaqlapaqtsu maymanpis chayatsï.
12 “Qamkunaqa maypa aywarpis kushishqami kawapäkunkipaq.Jirkakunapis jirkankunapis rikashushpayki kushishqami cantanqa.Lapan yörakunapis kushikushpanmi rämankunata kuyutsinqa.
13 Kashakunapa trukanmi ciprés yörakuna winamunqa.Ishankakunapa trukanmi arrayán yörakuna winamunqa.Tsayno kaptinmi maytsaychöpis adorapäkamanqa.Tsaytaqa manami pipis qonqanqatsu”.
Ichic wilacuycuna
^ 55.1 Juan 7.37; Apoc. 21.6; 22.17.
^ 55.3 2Sam. 7.4-16; Hech. 13.34.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ 55.7 Lam. 3.40-42; Zac. 1.3; Mal. 3.7.
^ 55.10 2Cor. 9.10.
