Isaías 62:1-12
62 Jerusalén*, qamta kuyaykarqa manami upälakümantsu.Tayta Dios munashqanno kawanaykiyaq y contraykikunapita salvashunaykiyaqmi wilapaykäshayki.Salvashqa karnami patsa waraptin inti atsikyämushqanno kankipaq.
2 Alina kawapäkushqaykita maytsay nación runakunami musyanqa.Lapan reykunami munayniyuq kashqaykita rikapäkunqa.Kikin TAYTA DIOSMI mushuq jutita churapäshunkipaq.
3 Rey jatiräkunan corönanömi TAYTA DIOSPA makincho kankipaq.
4 Kacharishqa kashqaykita nishunaykipa trukanqa TAYTA DIOS pasaypa kuyashushqaykitami nishunkipaq.Tsaynöpis ushakashqa marka kashqaykita nishunaykipa trukanqa Tayta Dioswan casarashqaykitami nishunkipaq.*
5 Jipashwan mözu casarashqannömi Tayta Diospis qamwan casaranqa.Warminwan runa kushishqa kawashqannömi Tayta Diospis qamwan kushishqa kanqa.
6 Jerusalén, perqaykikuna jananmanmi rikachakuqkunata churashqä.*Paykunaqa tsakaypa junaqpapis mana chawaypami Tayta Diosta manakärinqa.TAYTA DIOSTA ruwakuqkuna, ama upälakäriytsu.
7 Jerusalénta altsatsiyta ushananyaq Tayta Diosta ruwakäriy.Maytsaychöpis runakuna Jerusalénta respitananyaq Tayta Diosta manakäriy.
8 TAYTA DIOS munayniyuq kashpanmi jurar Jerusalén markata kayno nirqan:“Chikishuqniki runakuna trïguykita apakunanta manami kachapäshaqnatsu.Nakar rurashqayki vïnuykita juk lädu runakuna upunanpaqpis manami kachapäshaqnatsu.
9 Tsaypa trukanqa shuntashqayki mikuyta kikiki mikurmi alabamankipaq.Üvapita rurashqayki vïnutapis kikikimi *sagrädu templüpa patiuncho upunkipaq”.
10 ¡Marka punkukunapa yarqapäkuy!¡Runakuna shamunanpaq nänita altsapäkuy!¡Nänipita rumikunatapis jitapäkuy!¡Lapan nación runakuna yaykamunanpaq señalta churapäkuy!
11 Maytsaymanpis wilakatsirmi TAYTA DIOS kayno nirqan:“Salvadornin chayamunanpaqna kashqanta *Sión runakunata wilapäkuy.Chayaykamurmi ali kawayman churanqa”.*
12 Kuyashqan runakuna *santu kashqantami nipäkunqa.TAYTA DIOS salvashqan runakuna kashqantami nipäkunqa.Jerusaléntanami maypis täkuypaq marka kashqanta nipäkunqa.Tayta Dios imaypis manana kacharishqan marka kashqantami nipäkunqa.
Ichic wilacuycuna
^ 62.1 Kay capïtulucho Jerusalén markata parlapar Tayta Dios kuyashqan runakunatami parlaparqan.
^ 62.4 Isa. 60.15; Ose. 2.23.
^ 62.6 Isa. 52.8; Eze. 33.
^ sagrädu Liyinki santupita tantiyatsikuyta.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 62.11 Isa. 40.10.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
