Isaías 66:1-24
66 TAYTA DIOSMI kayno nin:“Jana patsaqa trönümi kaykan.*Patsapis jarukunämi kaykan.*Tsayno kaykaptinqa ¿maychöraq wayita sharkatsipämankiman?¿Maychöraq jamaykunäpaq ruratsipämankiman?
2 Kikïmi ciëlutapis y patsatapis kamashqä.Kamashqa kaptïmi tsaykunapis kaykan.*Noqa TAYTA DIOSMI tsayno nï.
“Noqaqa humildikunata kuyaparmi yanapä.Paykunaqa jutsata rurar lakikunmi.Nishqäkunataqa mantsakuypami cumplipäkun.
3 Wakin runakunami itsanqa jutsa rurayta mana kacharir kikin munashqanno kawapäkun.Tsaymi noqapaq töruta *altarcho rupatsishqanpis runa mayinta wanutsishqanno melanaypaq kaykan.Uyshata altarcho rupatsishqanpis alquta pishtashqannömi kaykan.Tsaki mikuy ofrendankunata apamushqanpis kuchipa yawarninta jichapashqannömi kaykan.Adoramashpan inciensuwan qoshtatsishqanpis ïdulukunapaq qoshtatsishqannömi kaykan.
4 Paykunataqa mantsakushqan desgraciakunawanmi castigashaq.Qayakuykaptïpis manami contestapäkamashqatsu.Wilapaykaptïpis manami chaskikärishqatsu.Tsaypa trukanqa rikaykaptïmi jutsata rurapäkushqa.Mana munashqä kaqtami rurapäkushqa”.*
5 TAYTA DIOSTA cäsukuqkuna, kanan nishushqaykita shumaq tantiyakäriy.Paymi kayno nishunki:“Noqaman yärakamaptikimi wakin marka mayikikunapis chikirkaykäshunki.Tsaymi asipäshushpayki kayno nipäkushunki:‘Kushishqa kawashqaykita rikapäkunäpaq kanan mä TAYTA DIOS yanapashunki’.Tsayno nir manakaqman churashushqaykipitami kikinkuna penqaytukushqa uysuranqa.
6 Contrayki kashqanpitami paykunata castigashaq.Markapita y templupita tsay runakuna qaparashqan mayakämunqami”.
Mushuq Jerusalén kananpaq nishqan
7 “Qeshyaq warmipis manaraq höranchömi wachakushqa.Nanaypis manaraq tsariptinmi olqu wamrata wachakushqa.*
8 ¿Pilaqa mayashqatsuraq imaylapis tsayno kashqanta?¿Pilaqa rikashqatsuraq imaylapis tsayno pasashqanta?¿Juk junaqlacho runakuna miranmantsuraq juk nación rikakushqanyaq?¿Juk yuriylacho yuririnmantsuraq juk nacionman juntaqpaq?Tsayno kaptinpis *Siónmi itsanqa nanay tsarishqan höra atska wamrankunata wachanqa.*
9 Mirananpaq kamaykarqa ¿manatsuraq wachakunanpaqpis yanapashaq?Wamrayuq kananpaq kamaykarqa ¿wamra yurinanta michämantsuraq?*Noqa TAYTA DIOSNIKIMI tsayno nï.
10 “¡Jerusalénta kuyaqkuna, Jerusalénwan kushikäriy!¡Jerusalénpaq waqaqkuna, lapayki kushikäriy!
11 Jerusalénmi mamaykino pachayki saksashqanyaq ali alilata qarashunkipaq.Wamra chuchur kushikushqannömi jawka kawar kushikärinkipaq”.
12 TAYTA DIOSMI kayno nin:“Noqa yanapaptïmi Jerusaléncho maypis täkuypaq ali kaway kanqa.Maytsay nacionkunami cargashqa mayunöraq riquëzankunata apamunqa.Jerusalén marka mamaykino karmi ali alilata qarashushpayki marqaräshunkipaq.Melqaninman jamaykatsirmi pasaypa kuyashunkipaq.
13 Wawanta maman shoqaqnömi noqapis qamkunata Jerusaléncho shoqashayki”.
14 Tsayno kaykaqta rikashpaykimi pasaypa kushikärinki.Tamya killa witsan qewa loqluypa loqlushqannömi qamkunapis tsaycho tashpayki mana qeshyaypa kawapäkunkipaq.Sirviqninkunataqa TAYTA DIOS tsaycho yanapanqami.Contrankunatami itsanqa rabyashpan castiganqa.
15 “Rataykaq nina rurinchömi TAYTA DIOS shamunqa.Carrëtankunapis shukukuy wayranöraqmi shapäkamunqa.Tsayno shamunqa fiyupa rabyashpan runakunata ninawan castigananpaqmi.
16 Ninawan y espädawan castigarmi lapan runakunata TAYTA DIOS juzganqa.Tsayno castigaptinmi atska runakuna wanupäkunqa”.
17 TAYTA DIOSMI kayno nin:“Wakinnikiqa shumaq armakurirmi ïdulukunata adoranaykipaq yalinakurraq huertakunaman aywarkaykanki.Tsaynöpis kuchi aytsata, ukush aytsata y mana mikuna uywapa aytsantami mikurkaykanki.Tsayno kapäkushqaykipitami lapayki ushakankipaq.
Karu nacionkunacho wilakärinanpaq nishqan
18 “Noqa musyämi imata rurapäkushqaykita y imata yarparkaykashqaykitapis. Tsaymi tiempu chayamunqana lapan nación runakuna ima idiömata parlaptinpis juk patsalaman shuntanäpaq. Paykuna shamushpanmi munayniyuq kashqäta rikapäkamanqa.
19 Munayniyuq kashqäta rikapäkunanpaqmi tsaycho señalta rurashaq.
“Kawaykar quëdaqkunataqa juk lädu nacionkunamanmi kachashaq. Tsaymi chayanqa Tarsisman, Libiaman y Ludman. Lud nacioncho taqkunaqa shumaqmi yachapäkun flëchawan flëchayta. Tsaynöpis chayanqa Tubalman y Javánman. Wakintanami kachashaq lamar kuchuncho kaykaq karu nacionkunaman. Tsay nacionkunacho taq runakuna imaypis manami mayashqatsu noqapita parlaqta ni rikashqatsu munayniyuq kashqäta. Tsay nacionkunachömi munayniyuq kashqäta y salvakuq kashqäta wilakärinqa.
20 “Kachashqä runakunami noqapaq ofrendata apamuqno Israel mayinkunata maytsaypitapis pushamunqa. Tsaymi cawallunkunawan, carrëtankunawan, andasninkunawan, mulankunawan y camëllunkunawanpis shapäkamunqa. Sagrädu jirkannïcho kaykaq Jerusalénmanmi pushamunqa. Limpiu puyñukunawan tsaki mikuy ofrendata apamuqnömi templüman apapäkamunqa. Noqa TAYTA DIOSMI tsayno nï.
21 “Paykunapitami wakinta akrashaq cürakuna y *levitakuna kananpaq. Noqa TAYTA DIOSMI tsayno nï”.
Diosta adoraqkuna y contran sharkuqkuna imano kananpaq nishqan
22 Mastapis TAYTA DIOS kaynömi nin: “Jutikita aparänanpaqmi qamkunapita miraqkuna imayyaqpis kanqa. Mushuq ciëluta y mushuq patsata kamaptï imayyaqpis kananpaq kashqannömi* paykunapis mana ushakaypa kanqapaq.*
23 Cada lulu killa y cada jamay junaqmi lapan runakuna templüman shamur adorapäkamanqa. Noqa TAYTA DIOSMI tsayno nï.
24 “Templupita yarqurmi conträ sharkuq runakunapa ayan jitaraykaqta rikapäkunqa. Tsay ayata mikuq kurukuna manami wanunqatsu. Tsaynölami tsay ayakunata rupaq ninapis mana upinqatsu.* Pïmaypis tsayta rikar mantsarinqami”.
Ichic wilacuycuna
^ 66.1a Sal. 11.4; Mat. 5.34; 23.22.
^ 66.1-2 Hech. 7.49-50.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 66.4 Isa. 65.12; Jer. 7.13.
^ 66.7 Apoc. 12.5.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 66.8 Siónqa Jerusalén markami kaykan. Sión wachakushqan wamrakunaqa mushuq Jerusaléncho tänanpaq kaqkunami kaykan.
^ 66.9 Tayta Dios tsayno nirqan mushuq Jerusaléncho kuyashqan runakuna tänanpaq kashqanta tantiyatsirmi.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 66.22a Isa. 65.17; 2Ped. 3.13; Apoc. 21.1.
^ 66.22b Jer. 31.36.
