Isaías 8:1-22
8 TAYTA DIOSMI kayno nimarqan: “Pïmaypis liyinanpaq jatun tablaman qelqay Maher-salal-hasbazta”.*
2 Nimashqanno qelqanäpaqmi cüra Uríasta* y Jeberequíaspa tsurin Zacaríasta testïgupaq churashqä.
3 Tsaypitanami warmï profetïsa qeshyaq rikakushpan olqu wamrata wachakurqan. Tsawraqa TAYTA DIOS kayno nimarqan: “Tsay wamrapa jutinta churapay Maher-salal-hasbaz jutin kananpaq.
4 Tsay wamra ‘mamä, papä’ niyta manaraq pashtatsiptinmi Damascuta y Samariata vinciykur Asiria nacionpa mandaqnin rey tsay markakunapita lapan riquëzankunata apakunqa”.
5 Tsaypitanami yapay TAYTA DIOS kayno nimarqan:
6 “Siloé raqracho ali yakuno kaykaptïmi Judá runakunaqa Rezínta y Remalíaspa tsurinta* mantsakur mana yärakamantsu.
7 Tsayno kaptinmi Asiria nacionpa mandaqnin reyta kachamushaq Judá nacionta asulananpaq. Soldädunkunawan shamur Éufrates mayu bötiypa bötir aywar imaykatapis ushakätsishqannömi Judá runakunatapis atacar ushakätsinqa.
8 Cargashqa mayu runata kunkanyaq tsapashqanno y älanta anka luylukurkur aywaqnömi intëru nacionta soldädukuna atacanqa. ¡Emanuel, nacionnikita tsaynömi rurapäkunqa!”
Contran nacionkuna ushakänanpaq nishqan
9 Juk lädu nación runakuna, mayapäkamay.Pasaypa ushakätsinaykipaq juntakarpis kikikikunami ushakankipaq.Asulanaykipaq kamarikäriptikipis kikikikunatami asulashunkipaq.
10 Imata ruranaykipaq wilanakushqaykipis manami kamakanqatsu.Imata ruranaykipaq yarpaptikipis manami rurakanqatsu.Tsaynöqa kanqa Tayta Dios noqakunawan kaptinmi.*
Tayta Diosman yärakärinanpaq nishqan
11 Judá runakuna yarpashqanno mana yarpänäpaqmi TAYTA DIOS shumaq tantiyatsimar kayno nimarqan:
12 “Reypa contran sharkuykashqanta maliciarmi runakuna jukno jukno rimarkaykan.Tsayno rimaptinpis ama criyinkitsu.Paykuna mantsakärishqantapis ama mantsakunkitsu.*
13 Tsaypa trukanqa munayniyuq y *santu kashqäta tantiyar cäsukamanki.Runakunata *mantsakunaykipa trukanqa noqata mantsakamanki.
14 Tsayno kaptikiqa ima desgraciapitapis tsapäshaykimi.Israel runakunapaq y Judá runakunapaqmi itsanqa takakätsikuq y tunitsikuq rumino kashaq.*Jerusaléncho taq runakunapaqpis redno y toqlanömi* kashaq.
15 Paykuna atskaqmi takakanqa, tuninqa y wanunqa.Wakintanami prësu watarätsinqa.
16 Revelashqäta qelqarkur mana oqrakänanpaq shumaq churanki.Nirkur cuidananpaq cäsukamaqkunata qoykunki”.
17 Jacobpita miraqkunata TAYTA DIOS mana yanapaptinpis noqaqa paytami imaypis shuyäshaq.Imano kaptinpis paylamanmi yärakushaq.
18 Tayta Dios qomashqan wamräkunawanmi kaycho kaykä.*Israelcho señal kanäpaqmi noqatapis y tsurïkunatapis churapäkamashqa.Payqa *Sión jirkancho taq lapanta mandaq TAYTA DIOSMI kaykan.
Rikakuqkunawan y brüjukunawan mana rikatsikunanpaq nishqan
19 Wakinkunaqa kaynömi nipäkushunki: “Imata ruranantsipaq kashqanta musyanantsipaq rikakuqkunawan, brüjukunawan y adivïnukunawan rikatsikamushun”.
Tsayno nishuptikiqa kayno nipäkunki: “¡Imanirtaq wanushkunapa almanta tapukushwan! Tsaypa trukanqa kuyashqan runakuna kaykarqa ¿manaku kikin Tayta Diosta tapukushwan?”
20 ¡Tayta Diospa leyninkuna y yachatsikuyninkuna imata nishqantapis yarpapäkuy! Runakuna nishushqaykiman Tayta Dios nishqankuna mana tinkuptinmi musyapäkunkipaq tsay nishuqnikikuna imatapis mana tantiyaq karkaykashqanta.
21 Paykunaqa lakishqa y yarqanaykarmi maypapis puripäkunqa.Yarqanarmi fiyupa rabyashpan mandaqnin reyta maldicionanqa.Tsaynölami jana patsata rikärir Tayta Diostapis maldicionanqa.
22 Kay patsacho maypa purirpis munashqanta tarinanpa trukan nakaylatami taripäkunqa.Ima ruraytapis mana kamäpakurmi pasaypa yanawyaykaq tsakaychöno kapäkunqa.
Ichic wilacuycuna
^ 8.1 Maher-salal-hasbaz ninanqa juklami ushakätsinqa ninanmi.
^ 8.2 2Rey. 16.10-16.
^ 8.10 Tayta Dios noqakunawanmi kaykan ninanqa Hebreo idiömacho Emanuel ninanmi.
^ 8.12 1Ped. 3.14.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 8.14 Wakin runakunaqa tsiklanömi nipäkun.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
