Isaías 9:1-21
9 (8.23) Nakaqkunapaq patsa tsakashqano kaptinpis manami imayyaqpis tsaynölatsu kanqa. Zabulón trïbu y Neftalí trïbu runakunata penqayman Tayta Dios churashqa kaptinpis* shamuq watakunachöqa paykunapaq kushikuymi kanqa.
Paykuna tashqan partiqa Galilea partimi kaykan. Tsaypami pasan lamar kuchunpa aywaq nänipis y Jordán mayupis. Tsaychömi mana Israel runakunapis tarkaykan.*
2 (1) Tsakäpakushqano kawarpis atsikyaqta rikaqnömi salvacionninta rikapäkunqa.Yanawyaykaqchöno kawapäkuptinpis salvacionninqa atskinömi kanqa.*
3 (2) Kuyashqayki runakunatami yanapashqanki.Kushikuytapis paykunapa shonqunmanmi churashqanki.Cosëcha witsan runakuna kushikuqnömi nawpaykicho kar kushikärinqa.Riquëzata rakipänakur kushikushqannömi kushikärinqa.
4 (3) Contrapartinkunata ushakätsirmi paykunapa makinpita salvankipaq.Unay aylunkunata madianita runakunapa munayninpita jorqushqaykinömi yapaypis jorqunkipaq.*
5 (4) Guërra manana kaptinmi soldädukuna jatikushqan bötaskunatapis rupatsipäkunqa.Guërracho pelyashqan yawarlana röpankunatapis rupatsipäkunqami.
6 (5) Tayta Dios tsayno salvamäshun juk wamra yuriptinmi.Paymi yurinqa winarkur mandamaqnintsi kananpaq.Paypa jutinmi kanqa Espantaypaq Tantiyatsimaqnintsi,Contrankunata Vinciq Dios,Imayyaqpis Kawaq Taytantsiy Ali Kawayta Qomaqnintsi.
7 (6) Rey David jamashqan trönuman jamaykurmi imayyaqpis mandamäshun.Munaynincho kashpantsimi imaypis ali kawashun.Tayta Dios munashqanno mandarmi ali kaqlata imaypis ruranqa.*Lapanta mandaq TAYTA DIOS kuyamashpantsimi tsayno kananpaq kamakätsinqa.
Israel nacionta Tayta Dios castigananpaq nishqan
8 (7) Jacobpita miraq Israel runakunata castigananpaqmi Tayta Dios wilakatsishqa.Wilakatsishqannölami castiganqa.
9 (8) Tsaytaqa Samaria markacho taqkuna y Efraín runakuna* lapanpis tantiyanqapaqmi.Paykunami ali chölu tukushpan kayno nipäkun:
10 (9) “Ladrilluwan sharkatsishqantsi wayintsita juchutsiptinpis laqlashqa rumikunawannami yapay sharkatsishun.Sicómoro yörata mutuptinpis cedrutami plantashun”.
11 (10) Tsayno nirkaykaptinmi rey Rezínta* atacananpaq contran runakunata TAYTA DIOS kachamunqa.
12 (11) Inti jeqamunan kaq lädupitami Siria runakunatapis kachamunqa.Inti jeqanan kaq lädupitanami filisteo runakunatapis kachamunqa.Paykunami Israel runakunata juk amuy mikuqnöla ushakäritsinqa.Tayta Dios tsayno castigarpis jinalami rabyashqa kanqa.Yapay castigananpaqpis kamarikushqalami kaykan.
13 (12) Tsayno castigaptinpis runakuna manami tantiyakärinqatsu.Lapanta mandaq TAYTA DIOSMANPIS manami yärakärinqatsu.
14 (13) Tsaymi TAYTA DIOS juk junaqlacho Israel nacionpa umanta y chupanta roqurinqa.Palma yöratapis muturinqa y utututapis achurinqa.*
15 (14) Israel nacionpa umanqa kaykan mayor runakuna y mandaq runakunami.Chupannami kaykan lula profëtakuna.
16 (15) Israelcho mandaq runakuna engañakuq kaptinmi runakunapis oqrakashqano karkaykan.
17 (16) Lapan runakunapis mana yärakuypaq, mana alita ruraqla y manakaqkunata parlaqlami karkaykan.Tsaymi mözukunatapis, waktsakunatapis y viüdakunatapis mana kuyapaypa Tayta Dios castiganqa.Paykunata tsayno castigarpis jinalami rabyashqa kanqa.Yapay castigananpaqpis kamarikushqalami kaykan.
18 (17) Runakuna mana ali rurashqanqa shatatapis kashatapis bunyaypa bunyar rupaq ninanömi kaykan.Muntita rupar qoshtaywan sharkuq ninanömi kaykan.
19 (18) Tsaymi lapanta mandaq TAYTA DIOS rabyashqa castigashqanqa intëru nacioncho rupaq ninano kanqa.Oqshata nina rupar ushaqnömi runakunatapis ushakätsinqa.Tsay witsanqa manami pipis runa mayinta kuyapanqatsu.
20 (19) Alawqa kaq nawpancho tarishqanta mikurpis jinalami yarqaykanqa.Itsuq kaq nawpancho tarishqanta mikuptinpis manami pachan saksanqatsu.Tsurinkunatapis mana kuyapaypami mikupäkunqa.
21 (20) Manasés runakunawan Efraín runakuna pelyapäkunqami.Ishkan juntakarkurnami Judá runakunawanpis guërrata rurapäkunqa.Tsayno pelyapäkunqa Tayta Dios paykunata castigar kamakätsiptinmi.Tsayno castigarpis jinalami rabyashqa kanqa.Yapay castigananpaqpis kamarikushqalami kaykan.
Ichic wilacuycuna
^ 9.1 Tsaycho taq runakunata Tayta Dios penqayman churarqan Asiria runakuna atacar vinciptinmi (2Rey. 15.29).
^ 9.2 Mat. 4.16; Luc. 1.79.
^ 9.4 Jue. 7.15-25.
^ 9.7 Luc. 1.32-33.
^ 9.9 Efraín runakunapaq parlarqa norti läducho kaq Israel nación runakunapaqmi parlaykan. Paykunapa capitalninmi Samaria marka karqan.
^ 9.14 Umatami tinkutsin Israel nacionpa autoridäninkunaman y chupatanami tinkutsin lula profëtakunaman. Palmatami tinkutsin rïcu runakunaman y utututanami tinkutsin waktsa runakunaman.
