Jeremías 1:1-19
1 Kaychömi qelqaraykan Hilcíaspa tsurin Jeremías wilakushqan. Jeremíasqa cüra aylumi karqan. Pay karqan Benjamín particho kaq Anatot markapitami.*
2 Amónpa tsurin Josías* chunka kimsa watana Judá nacionpa mandaqnin rey kaykaptinmi* Jeremíasta TAYTA DIOS revelarqan wilakuyninta wilakunanpaq.
3 Tsaynölami Josíaspa tsurin Joacim* Judá nacionpa mandaqnin rey kashqan witsanpis Jeremíasta Tayta Dios revelarqan. Tsaypitanami Josíaspa jukaq tsurin Sedequías* chunka juk wata Judá nacionpa mandaqnin rey kashqan witsanpis atska kuti revelarqan. Tsay watami pitsqa kaq killacho* juk lädu nación soldädukuna shamur rey Sedequíasta y Jerusaléncho taq runakunata prësu apakärirqan.
Wilakunanpaq Jeremíasta Tayta Dios revelashqan
4 TAYTA DIOSMI kayno nimarqan:
5 “Mamaykipa pachancho manaraqpis kamarmi qamta reqirqä. Manaraqpis yuriptikimi qamta akrarqä maytsay nación runakunapaq profëta kanaykipaq”.*
6 Tsayno nimaptinmi kayno nirqä: “¡TAYTA DIOS! Noqaqa mözularaq kar rimaytapis mana kamäpakütsu”.
7 Tsayno niptïpis TAYTA DIOS kaynömi nimarqan: “Ama yarpaytsu mözularaq kar rimayta mana kamäpakushqaykita. Maytsaymanpis kachashqäman aywarmi lapan nishqäkunata wilakunki.
8 Ima desgraciapita salvanäpaq qamwanmi kaykäshaq. Pitapis ama mantsakuytsu”.
Tsaynömi TAYTA DIOS nimarqan.
9 Nirkurmi shimïta yataykamar TAYTA DIOS kayno nimarqan: “Noqami wilakuynïta shimikiman churamushqä.
10 Kanan junaqmi qamta churaykä maytsay markakunacho y nacionkunacho ima pasananpaq kashqantapis wilakunaykipaq. Wilakushqaykinölami wakin nacionkuna ushakanqa y wakin nacionkuna mas munayniyuq rikakunqa”.
11 Nirkurnami kayno nir TAYTA DIOS tapumarqan: “Jeremías, ¿imatataq rikaykanki?”
Tsawraqa kayno nirqä: “Almendru yörapa rämantami rikaykä, Tayta”.
12 Niptïmi TAYTA DIOS kayno nimarqan: “Aw, almendru yörami kaykan. Tsaynölami noqapis alcäbu* kaykäshaq wilakunaykipaq niptï wilakushqaykita cumplitsinäpaq”.*
13 Yapaymi TAYTA DIOS kayno nimarqan: “Kananqa ¿imatataq rikaykanki?”
Tsawraqa noqa nirqä: “Norti kaq läducho manka timpur puwaykaqtami* rikaykä”.
14 Tsawraqa TAYTA DIOS kayno nimarqan: “Tsay rikashqaykinömi norti kaq lädupita fiyupa mantsariypaq nakaykuna kay nacioncho taq runakunaman shamunqa.
15 Noqa TAYTA DIOSMI kayno nï: Norti kaq lädu nacionkunacho taq runakunatami qayamushaq. Paykuna shamurmi Jerusalén yaykuna punkukunaman trönunkunata churapäkunqa. Atacashpanmi marka murällata juchuratsir yaykapäkunqa. Tsaynölami Judá nacioncho kaykaq wakin markakunatapis atacanqa.
16 “Tsay markakunacho taq runakuna jutsata rurashqanpitami tsayno castigashaq. Paykunaqa qonqaykamarmi juk lädu nación runakuna adorashqan dioskunapaq inciensuwan qoshtatsipäkun. Tsaynöpis kikinkuna rurashqan ïdulukunatami adorapäkun.
Jeremías wilakunanpaq Tayta Dios nishqan
17 “Jeremías, tsay runakunaman aywaykur lapan nishqäkunata mana mantsakuypa wilapay. Paykunataqa ama mantsakuytsu. Mantsakuptikiqa paykunapa nawpancho mas peormi mantsakätsishayki.
18 “Qamta churaykä shumaq corralashqa markano, fiërru tushano y bronciwan perqashqa murällano kay nacioncho kanaykipaqmi.* Tsayno kaykarqa mana mantsakuypa wilapanki Judá nacionpa mandaqnin reykunata, autoridäninkunata, cürankunata y lapan runakunatapis.
19 Noqami qamwan kaykäshaq ima peligrupitapis tsapänäpaq. Tsaymi paykuna contrayki sharkurpis mana vincishunkipaqtsu. Noqa TAYTA DIOSMI tsayno nï”.
Ichic wilacuycuna
^ 1.1 1Rey. 2.26-27.
^ 1.2 Tsay wata karqan 627 a. C.
^ 1.3a 2Rey. 23.36—24.7; 2Crón. 36.5-8.
^ 1.3 Tsay killa karqan pulan agostupita pulan setiembriyaq, wata 586 a. C.
^ 1.5 Isa. 49.1; Gál. 1.15.
^ 1.12 Hebreo idiömacho almendru nipäkunanpaq shaqea nipäkun y alcäbu nipäkunanpaq shoqea nipäkun. Ishkan palabra tsay niraqla kaptinmi almendru yörata rikatsir Jeremíasta Tayta Dios tantiyatsirqan alcäbu kashqanta.
^ 1.12 Isa. 55.10-11; Eze. 12.28.
^ 1.13 Wakin runakunaqa püsaykaqtami nipäkun.
^ 1.18 Jer. 15.20.
