Jeremías 10:1-25
10 Israel runakuna, TAYTA DIOS nishushqaykita cäsukäriy.
2 TAYTA DIOSMI kayno nin:“Juk lädu nación runakunanöqa ama kapäkuytsu.Ciëlucho espantaypaq kaqkunata rikar fiyupa mantsakäriptinpis qamkunaqa ama mantsakäriytsu.
3 Tsay runakunaqa imapaqpis mana väliq ïdulukunamanmi yärakärin.Tsay ïdulukunata rurananpaqqa muntipitami qeruta apapäkamun.Nirkurmi laqlayta yachaq runawan shumaq laqlatsipäkun.
4 Qoriwan y qellaywan adornarkurmi mana qotukänanpaq shumaq clävapäkun.*
5 Tsay ïdulukunaqa kaykan chakracho pishqu mantsakunanpaq ichitsishqan muñicano* mana rimakuqmi.Puriyta mana puëdiptin umrushqa puritsipäkun.*Tsay ïdulukunataqa ama mantsakäriytsu.Manami alitapis ni mana alitapis rurapäkuntsu”.*
6 TAYTA DIOS, qamnöqa manami pipis kantsu.Qamqa lapanpaq munayniyuqmi kaykanki.
7 Maytsay nacionkunapa mandaqnin reymi kaykanki.Tsayno kaykaptikiqa ¿piraq mana *mantsakushunkimantsu?*May nacioncho yachaq runapitapis mas yachaqmi kaykanki.Pïmay reypitapis mas munayniyuqmi kaykanki.Tsayno kaykaptikiqa ¿piraq mana mantsakushunkimantsu?
8 Ïduluta ruraqkunaqa lapanpis yarpayniynaq mana tantiyakuqmi karkaykan.Qerupita rurashqa ïduluqa manami imatapis runakunata yachatsintsu.
9 Tsay ïdulukunataqa laqlayta yachaqkunalami rurapäkun.Laqlarkurmi Tarsispita apamushqan qellaywan y Ufazpita apamushqan qoriwan enchapan.Nirkurmi azul y granäti tëlata jirarkur jatipan.
10 Rasunpa kaq Diosqa TAYTA DIOSLAMI kaykan.Paymi imayyaqpis kawaq Dios kar imaypis rey kaykan.Pay rabyanaptinqa kay patsapis siksikyanmi.Pay castigaptinqa manami may nacionpis awantantsu.
11 Tayta Diosmi kayno nimarqan:“Ïdulukunata adoraqkunata kayno niy:‘Adorashqayki ïdulukunaqa manami kay patsata ni jana patsatapis rurashqatsu.Tsaykunaqa lapanmi kay patsacho ushakanqa’ ”.
12 Tayta Diosmi munayninwan kay patsata kamashqa.Yachaq karmi kay munduta jamatsishqa.Yarpayniyuq kashpanmi jana patsatapis kamashqa.
13 Pay mandaptinmi ciëlucho kaykaq yakupis qaparämun,pukutaypis patsapa kuchunpita sharkamun,tamyashqan höra elquypis atsikyämun,y wayrapis churaräkunanpita yarqamun.*
14 Runakunaqa lapanpis upano karmi imatapis mana tantiyakärintsu.Ïdulukunata rurashqanpitami penqakärinqa.Tsay ïdulukunaqa manami imatapis rurapäkuntsu.Runakuna yärakuptinpis manami yanapantsu.
15 Manakaqlapaqmi karkaykan.Tayta Dios castiganan junaqmi tsay ïdulukuna ushakanqa.
16 Jacob yärakushqan TAYTA DIOSQA manami ïdulukunanötsu kaykan.Paymi lapan imaykatapis kamashqa.Herencian kanantsipaqmi Israel runakunata akramashqantsi.Jutinpis lapanta mandaq *Yahwehmi kaykan.
Judá nacionta asulashqan
17 Judá runakuna, imaykaykikunatapis kamarikäriy. Contraykikuna tsapaykäshunkinami prësu apashunaykipaq.
18 TAYTA DIOSMI kayno nin: “Kay nacionpita karumanmi qamkunata qarqushayki. Tsayno castigaptïmi fiyupa nakapäkunkipaq”.
19 Marka mayïkunapaq lakikuptïmi shonqu fiyupa nanan.Tsaynöla nanaptinqa manami awantämantsu.Tsayno kaptinpis alfin imanäshaqtaq.
20 Tänä toldüpis chipyaqnami ushakashqa.Tsararaq waskankunapis rachirmi ushakashqa.Tsurïkunatapis lapantami prësu apakärishqa.Manami juklaylapis quëdashqatsu.Pïnïpis manami kantsu yapay toldüta ichitsinanpaq ni cortïnankunata churananpaq.*
21 Tsayno desgracia pasashqa rey y autoridäkuna yarpayniynaq upa kar TAYTA DIOSTA mana *ashipäkushqanpitami.Tsaymi lapan runakuna maytsaypapis aywakärishqa.*
22 Judá runakuna, ¡lapayki mayapäkuy!¡Norti lädupitami mana ali wilapa chayamushqa!Markantsikunata elqätsinanpaqshi atska soldädukuna punta punta aywaykämun.Paykuna ushakätsimaptintsi *chacalkunalanami markantsikunachöpis tanqapaq.
Tayta Diosta Jeremías manakushqan
23 TAYTA DIOS, qamlami musyanki wara warantin imano kapäkunäpaq kashqantapis.Tsayqa manami kikïkunapitatsu kaykan, sinöqa qampitami.*
24 Corrigirpis mana rabyakuylapa corrigiykalämay.Rabyashqa corrigimarqa elqätsimankichari.*
25 Rabyashqa elqätsipäkamänaykipa trukan juk lädu nación runakunata elqaykatsilay.Kuyashqayki Israel runakuna kaykaptïmi tsay runakunaqa noqakunata ushakätsimashqa.Intëru kay nacionnikitami chipyaq ushakätsishqa.Tsay runakunaqa jutikita manami joqarintsu ni *reqishunkitsu.*
Ichic wilacuycuna
^ 10.3-4 Sal. 115.4-8; 135.15-18; Isa. 40.19-20; 44.9-20.
^ 10.5 Wakin runakunaqa nunayluno nipäkun.
^ 10.5a Isa. 46.1, 7.
^ 10.5b Isa. 41.23-24, 29.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 10.7 Apoc. 15.4.
^ 10.13 Sal. 135.7.
^ Yahweh Yahwehtami wakin traduccionkuna castellänucho traducin Jehová nir, wakinmi traducin Yavé nir, wakinmi traducin Yahweh nir y wakinnami traducin EL SEÑOR nir. Quechua Bibliachöpis Yahweh atska kutimi traduciraykan TAYTA DIOS nir.
^ 10.20 Kay textucho Jerusalén markata Jeremías tinkutsirqan tunishqa tolduman. Jerusaléncho taq runakunatanami tinkutsirqan kikinpa tsurinkunaman. Manaraq castïgu kaptinpis mayna pasashqatanönami kay versïculukunacho Jeremías parlarqan.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ 10.21 Jer. 23.1-4; Eze. 34.1-10.
^ chacal Chacalqa atuq niraq jirka uywami kaykan. Chacalqa atuqpita mas jatulanmi. Atuqkunaqa castankunawanmi puripäkun. Chacalkunami itsanqa majanwan majanwan puripäkun (Isa. 13.22; Jer. 9.11; Lam. 4.3).
^ 10.23 Prov. 20.24.
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ 10.25 Sal. 79.6-7.
