Jeremías 13:1-27
13 TAYTA DIOSMI kayno nimarqan: “Lïnupita awashqa wachkuta rantirkur wachkakunki. Itsanqa ama ushmatsinkitsu”.
2 TAYTA DIOS nimashqanno rantirkurmi wachkuta wachkakurqä.
3 Tsaypitanami TAYTA DIOS yapay kayno nimarqan:
4 “Wachkaraykashqayki wachkuta apakurkur Perat raqraman ayway.* Tsaychöna qaqa uchkunman pakaykunki”.
5 TAYTA DIOS nimashqannölami Perat raqraman aywaykur pakaykurqä.
6 Tsaypita qepatanami TAYTA DIOS kayno nimarqan: “Perat raqraman kutiykur tsay pakashqayki wachkuta apamunki”.
7 Tsaymi Perat raqraman kutiykur pakashqä wachkuta tarirqä pasaypa ismushqata y imapaqpis mana väliqta.
8 Tsawraqa TAYTA DIOS kayno nimarqan:
9 “Noqa TAYTA DIOSMI kayno nï: Kay wachku ismushqannömi Judá nación runakuna y Jerusalén runakuna orgullösu kashqanpis ushakanqapaq.
10 Tsay runakunaqa fiyu karmi cäsukamayta mana munapäkuntsu. Paykunaqa shonqun munashqanno kawarmi juk lädu runakuna adorashqan dioskunata adorarkaykan. Tsayno karmi ismushqa wachku imapaqpis mana välishqanno karkaykan.
11 “Tseqlancho wachkuta chanaq wachkakushqannömi noqapis Israel runakunata y Judá runakunata makïcho tsararashqä. Tsayno tsararashqä munashqäno kawaptin pïmaypis alabamänanpaqmi. Tsayno kaptinpis paykunaqa manami cäsukamashqatsu. Noqa TAYTA DIOSMI tsayno nï”.
Urpukunaman tinkutsiypa tantiyatsishqan
12 “Jeremías, kuyashqä runakunata kayno ninki: ‘Israel runakunata kuyaq TAYTA DIOS kaynömi nin: “Lapan urpukunaman juntaqpaqmi vïnuta winapäkunqa”. Niptikimi paykuna nishunki: “¿Pitaq mana musyantsu urpuman juntaqpaq vïnu winana kashqanta?” ’
13 “Tsayno nishuptiki kayno ninki: ‘TAYTA DIOSMI kayno nin: Qamkunata vïnuwanmi shinkatsishayki.* David jamarashqan trönucho jamaraq reyta, cürakunata, profëtakunata y Jerusaléncho taq runakunatapis lapaykitami shinkatsishayki.
14 Urputa pakir ushaqnömi qamkunata castigar ushakätsishayki. Qamkunapa taytaykita y tsurikikunata mana perdonaypa ni mana kuyapaypami lapaykita ushakätsishayki. Noqa TAYTA DIOSMI tsayno nï’ ”.
Jutsa rurashqanta kacharinanpaq nishqan
15 ¡Shumaq cäsukäriy!Kikin TAYTA DIOS niykäshuptikiqa ¡chölu tukunaykipa trukanqa mayapäkuy!
16 Desgracia manaraq pasashushqaykiyaq TAYTA DIOSTA cäsukäriy.Yanawyaykaq tsakaycho jirkakunapa qeshpir manaraq tunishqaykiyaq jutsa ruraykunata kachariy.Salvashunaykipaq yarpaptikipis jutsa ruraykunata mana kacharirqa manami salvashunkipaqtsu.
17 Mana cäsukäriptikiqa qamkunapaq pakaylapami waqashaq.TAYTA DIOS kuyashqan runakuna kaptikipis prësu apakushuptikimi lakikushpä fiyupa waqashaq.
18 Tayta Dios kaynömi nimarqan:“Reyta y maman reinata kayno nishqäta wilay:Contraykikuna shamur corönaykita umaykipita jorqunanpaqnami karkaykan.Tsayno kaykaptinqa jutsa rurayta kacharir pampaman jamakur perdonta manakamay.
19 Jutsaykikunata mana kachariptikiqa *Neguevcho kaykaq markakunata contrayki soldädukunami jirururpanqa.Markapita manami pipis yarqunqatsu ni yaykunqatsu.Judá runakunataqa lapantami prësu apakärinqa.
20 Shumaq rikachakäriy.Norti kaq lädupitami contraykikuna aywaykämun.¿Maytaq mitsinaykipaq Tayta Dios qoshushqayki kuyaylapaq uyshaykikuna?”*
21 Jerusalén runakuna, ¿imanöraq kanki amïguykikuna contrayki rikakur atacashuptiki?¿Imanöraq kanki tsay atacashuqniki runakunata mandaqniki kananpaq Tayta Dios churaptin?¿Manatsuraq wachay nanay tsariptin warmi nakashqanno qamkunapis nakapäkunkipaq?
22 Tsay contraykikuna vincishushpayki warmita qarapachaykur tsaripakuqnömi munashqanta rurapäkushunkipaq.Imanir tsayno pasashushqaykitapis yarpachakurqa tantiyapäkunkimanmi aläpa jutsa rurashqaykipita nakarkaykashqaykita.
23 Yana runa ¿yoraqman tikranmantsuraq?Tigripis muru kashqanpita ¿juk colorman tikranmantsuraq?Tsaynölami qamkunapis mana ali ruraykunaman umayki churakashqa kar ali ruraytaqa mana kamäpakärinkitsu.
24 “Tsayno kashqaykipitami qamkunataqa chunyaq jirkapita shamuq löcu wayra oqshata mashtashqanno qarqushayki.*
25 Noqata qonqakaykamar ïdulukunaman yärakärishqaykipitami tsayno nakapäkunaykipaq destinashqä.Noqa TAYTA DIOSMI tsayno nï.
26 “Runanta jarukuq warmita castigar ruripanta umanman shukuparkuptin penqakushqannömi qamkunapis castigaptï penqakärinkipaq.
27 Qamta rikashqämi *wayrapakuq warmi runakunaman aywapaqno juk dioskunata adoraq aywapäkushqaykita.Jirkankunachöpis chakrakunachöpis tsayno adorapäkushqaykita rikashqämi.Tsayno rurapäkushqaykiqa pasaypa penqakuypaqmi kaykan.¡Ay Jerusalén runakuna, imanöraq kanki!¿Imaylaqa jutsaykipita maylashqanatsuraq kanki?¿Imayyaqpis jutsata rurar qanralatsuraq kaykanki?
Ichic wilacuycuna
^ 13.4 Hebreo idiömacho Perat raqrapa jutin y Éufrates mayupa jutin cäsi tsay jutinölami kaykan. Tsaymi Perat raqraman Jeremías aywananpaq nir Éufrates mayu läduman Judá runakuna prësu chayananpaq kashqanta Tayta Dios musyatsirqan. Perat raqraqa Jeremíaspa markan Anatotpita juk lëwami karqan. Éufrates mayuqa Anatotpita pachak chunka (110) lëwapita masmi kaykan.
^ 13.13 Kay textuchömi Tayta Dios rabyayninta vïnuman tinkutsin. Shinkatsishayki ninanqa castigashayki ninanmi.
^ Neguev Neguevqa Israel nacionpa sur kaq lädunchömi kaykan. Neguevcho kaykan Beerseba, Siclag, Gerar y Arad markakunami. Neguevcho shumaq mana tamyaptinmi aläpaqa mana murukärintsu. Tsaymi tsay partichöqa uyshata y cabrata ashmakular täkärin (Gén. 24.62; Núm. 13.17; Jos. 11.16).
^ 13.20 Kay versïculukunachömi reyta tinkutsin mitsikuqman. Judá runakunatanami uyshankunaman tinkutsin.
^ 13.24 Sal. 1.4; Ose. 13.3; Sof. 2.2.
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
