Jeremías 14:1-22
14 Fiyupa usya kaptinmi Jeremíasta TAYTA DIOS kayno nirqan:
2 “Wanupakushqami Judá nación kaykan.Markakunacho taqkunapis pasaypa lakikurmi pampacho jamarpaykan.Jerusaléncho waqashqan maytsaychöpis mayakaykanmi.*
3 Rïcukunapa ashmayninkunapis pözukunaman yaku ashiq aywar manami tarimuntsu.Mana tarirmi puyñutapis jinaylata kutitsimun.Fiyupa penqakushpanmi umantapis shukutakärin.
4 Mana tamyaptinmi fiyupa usyawan pampapis rachikaykan.Murunanpaq mana ali kaptinmi runakuna umanta tsarikurkur fiyupa lakikärin.
5 Usyawan qewa mana kaptinmi luychukunapis wachariykular wawanta wasqiriykun.
6 Chucaru bürrukunapis chunyaq jirkakunaman witsarkurmi *chacalkunano jäkalyaykachaykan.Mikunanpaq qewa mana kaptinmi nawinkunapis toqukashqa purirkaykan”.
7 Tsaymi runakuna kayno nipäkun: “TAYTA DIOS, nishqaykita manami cäsukärishqätsu.Jutsata rurarmi qamta pasaypa rabyanätsishqä.Pasaypa jutsasapa kapäkuptïpis kuyapäkuq kashqaykita pïmaypis tantiyakunanpaq yanapaykalämay.
8 Qamlamanmi noqakuna yärakamü.Fiyupa nakapäkuptïpis qamlami salvapäkamanki.Kananqa ¿imanirtaq kay nacioncho jäpano kaykanki?¿Imanirtaq qorpanöla kaykanki?
9 Salvamänaykipa trukanqa ¿imanirtaq ukakashqano rikarämanki?¿Imanirtaq pitapis washayta mana kamäpakuq soldäduno kaykanki?Imano kaptinpis noqakunawanmi kaykanki.Pïmaypis musyanmi kuyashqayki runakuna kapäkushqäta.¡Noqakunata ama kacharimaytsu!”
10 TAYTA DIOSMI kayno nirqan:“Kay nación runakunaqa ïdulukunata adorar yachakashqami karkaykan.Tsayno kashqan mana gustamaptinmi jutsa rurashqankunapita mana kuyapaypa castigashaq”.
Jeremíasta Tayta Dios nishqan
11 Nirkurmi TAYTA DIOS kayno nimarqan: “Kay runakunata yanapanäpaq amana manakamaytsu.
12 Paykuna atska junaq ayunashpan manakamaptinpis manami cäsushaqnatsu. Tsaytsika uywakunata y tsaki mikuy ofrendakunata noqapaq apamuptinpis manami chaskishaqnatsu. Tsaypa trukanqa ushakätsinäpaqmi guërrata, muchuyta y qeshyata kachamushaq”.
13 Tsayno nimaptinmi kayno nirqä: “TAYTA DIOS, lula profëtakunami runakunata criyiykätsin guërrapis ni muchuypis mana kananpaq kashqanta. Kay nacionchöqa jawka kawananpaq kashqantami nirkaykan”.
14 Tsawraqa TAYTA DIOS kayno nimarqan: “Noqapa jutïcho wilakurpis tsay profëtakunaqa lulakuykanmi. Tsay runakunataqa manami kachashqätsu ni minkakushqätsu ni imatapis nishqätsu. Paykunaqa jamuynilanpitami manakaqkunalata wilakurkaykan.
15 “Noqa TAYTA DIOSMI kayno nï: Mana kachaykaptï jutïcho wilakärishqanpita y kay nacioncho guërrapis ni muchuypis mana kananpaq kashqanta wilakärishqanpitami tsay profëtakunata guërrawan y muchuywan ushakätsishaq.
16 Tsaynölami tsay profëtakuna lulapashqan runakunatapis guërrawan y muchuywan ushakätsishaq. Warminkunapis y tsurinkunapis lapanmi wanur ushakanqa. Pampananpaq pipis mana kaptinmi Jerusalén cällikunacho ayankuna jitarpanqa. Jutsata rurashqanpitami tsayno castigashaq.
17 “Jeremías, nishqäta runakunata kayno wilay:“ ‘Kuyashqä Jerusalén markaman mantsariypaq castïgu chayashqanpitami mana chawaypa paqasta junaqta waqaykä.*Tsay markami tulun pakikushqano kar pasaypa nakaykan.
18 Jirkakunapa purirpis guërracho wanutsishqan runakunapa ayankuna jitarpaykaqtami rikaykä.Markaman yaykurpis yarqaywan wanushqa runakuna jitarpaykaqtami tarishqä.Imanir tsayno pasashqantapis mana tantiyar profëtakunapis y cürakunapis mantsakashqami purirkaykan’ ”.
Tayta Diosta Jeremías manakushqan
19 Tayta Dios, ¿Judá nacionta mananaku rikaytapis munanki?¿Tsayjinanpaku *Sión jirkanta chikiykunki?¿Imanirtaq desgracia pasamänanpaq kachapashqanki?Ali kawayta munapäkuptïpis manami ali kaway kannatsu.Yanapamänaykipaq kashqanta yarpapäkuptïpis jinalami desgracia pasapäkaman.
20 TAYTA DIOS, qampa contraykimi rikakärishqä.Unay aylükuna rabyanätsishushqaykinömi noqakunapis pasaypa rabyanätsishqä.
21 Tsayno kaptinpis noqakunata ama qonqaykamaytsu.Qonqamaptikiqa runakuna manakaqmanmi churashunkipaq.Tsaynöpis trönuyki kananpaq akrashqayki markata manakaqman ama churaytsu.Noqakunata yanapamänaykipaq *pactu rurashqaykita ama qonqaykulaytsu.
22 Kay patsacho ima ïdulupis manami munayniyuqtsu kaykan tamyatsimunanpaq.Ciëlupis manami kikilanpitaqa tamyatsimuntsu, sinöqa qamraqmi tamyatsimunki, TAYTA DIOS.Lapan pasashqankunapis qampitami kaykan.Tsaymi salvapäkamänaykipaq qamlaman yärakärimü.”
Ichic wilacuycuna
^ 14.2 Isa. 3.26; Lam. 1.4.
^ chacal Chacalqa atuq niraq jirka uywami kaykan. Chacalqa atuqpita mas jatulanmi. Atuqkunaqa castankunawanmi puripäkun. Chacalkunami itsanqa majanwan majanwan puripäkun (Isa. 13.22; Jer. 9.11; Lam. 4.3).
^ 14.17 Tsay castïgu manaraq chayaptinpis Tayta Dios parlarqan mayna pasashqantanöna.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
